கல்விக்கடன் பெறுவது எப்படி?

**இளமாறன்** · **இளமாறன்** Tue Apr 10, 2012 1:34 am

சென்னை : "நான்கு லட்ச ரூபாய் வரை கல்விக்கடன் பெற, எவ்வித செக்யூரிட்டியும் தேவையில்லை' என்று வங்கி அதிகாரி விருதாசலம் பேசினார்.

"தினமலர்' நாளிதழ் நடத்தும், "வழிகாட்டி' நிகழ்ச்சியில், மாணவர்கள் கல்விக்கடன் பெறுவது குறித்து வங்கி அதிகாரி விருதாசலம் பேசியதாவது: கோவில் கட்டுவது, உணவு வழங்குவது உள்ளிட்ட மற்ற நல்ல காரியங்களை விட, ஏழைக்கு கல்வி அளிப்பது மிகச் சிறந்தது என்பது பாரதியின் கருத்து. அதை செயல்படுத்தும் விதத்தில் அரசு, ரிசர்வ் வங்கி, வங்கிகளின் கூட்டமைப்பு ஆகியவை இணைந்து, கல்விக்கடன் திட்டத்தை கொண்டு வந்துள்ளன. வசதியில்லை என்ற காரணத்திற்காக மாணவர்கள் யாரும் படிக்காமல் இருந்து விடக்கூடாது என்பது தான், இந்த திட்டத்தின் நோக்கம்.

எல்லா விதமான படிப்புக்கும் கல்விக்கடன் பெறலாம். ஆனால், அந்த படிப்பு அங்கீகாரம் பெற்றதாக இருக்க வேண்டும். உள்நாட்டுப் படிப்புக்கு அதிகபட்சமாக 10 லட்ச ரூபாயும், வெளிநாட்டு படிப்புக்கு 20 லட்ச ரூபாயும் வங்கிகள் கல்விக் கடனாக வழங்குகின்றன. இதில், நான்கு லட்ச ரூபாய் கடன் பெறுவதற்கு எவ்வித செக்யூரிட்டியும் தேவையில்லை. அதற்கு மேற்பட்டு ஏழரை லட்சம் வரை கடன் பெறுவோர், சொத்து வைத்துள்ள ஒருவரின் ஜாமினை வங்கிக்கு வழங்க வேண்டும். ஏழரை லட்சத்தில் இருந்து கூடுதலாக கடன் பெற விரும்புவோர், தங்களது சொத்துப் பத்திரத்தை வங்கியில் வழங்க வேண்டும்.

சராசரியாக 12 முதல் 13 சதவீத வட்டி கல்விக் கடனுக்கு விதிக்கப்படுகிறது. சில குறிப்பிட்ட தொழில் படிப்புகளை படிக்கும்போது, கடனுக்கான வட்டியை மத்திய அரசு ஏற்றுக் கொள்கிறது. படிப்பு முடிந்த ஒரு ஆண்டில் துவங்கி ஐந்து ஆண்டுகளுக்குள் கடனை திருப்பிச் செலுத்த காலக்கெடு வழங்கப்படுகிறது. இந்த வாய்ப்பை பயன்படுத்தி, மாணவர்கள் தன்னம்பிக்கையோடு படிக்க வேண்டும். அதோடு, இறைவனை நம்பியிருந்தால், முக்கியமான தருணத்தில் அது உங்களுக்கு கை கொடுக்கும். இவ்வாறு அவர் பேசினார்.

தினமலர்