கவலைகள் நீக்கும் கார்த்திகை!

**சிவா** · **சிவா** Tue Nov 27, 2012 10:52 pm

கார்த்திகை மாதத்தில் விரதம் இருப்போரைப் பார்த்து, ‘நாமும் இவ்வாறு விரதம் கடைப்பிடிக்க வேண்டும்’ என்று நினைத்தாலே போதும்; சகல பாவங்களும் விலகும் என்கின்றன ஞானநூல்கள். அதேபோல் இந்தப் புண்ணிய மாதத்தில் செய்யப் படும் தானம், தவம் மற்றும் மந்திர ஜபங்களுக்கும் கூடுதல் பலன் உண்டு.

கார்த்திகை மாதத்தில் தீபம் ஏற்றிய விளக்கை தானமளிப்பதால் துன்ப இருள் அகலும். முறைப்படி வழிபட்டு நெல்லிக்கனியை தானமளித்தால் ராஜ யோகம் கிடைக்கும்.

கார்த்திகை மாதம் முழுவதும் அதிகாலையில் நீராட, துன்பங்கள் நீங்கும். நெல்லி மரத்தடியில் அமர்ந்து விஷ்ணுவை பூஜித்து, அன்னதானம் அளித்தால் புண்ணியம் பெருகும்.

கார்த்திகை மாதத்தில் கோயில்களுக்குச் சென்று தரையைக் கழுவி கோலமிடுவதால், நற்பலன்கள் கிடைக்கும். கார்த்திகை மாதம் முழுவதும் சிவாலயங்களில் விளக்கேற்றி வழிபடுவதால், நம் வாழ்விலும் வெளிச்சம் உண்டாகும்.

**சிவா** · **சிவா** Tue Nov 27, 2012 10:54 pm

தீப லட்சுமியே போற்றி!

கார்த்திகை தினத்தில், தீபத்தை ஏற்றி வைத்து, ‘தீப சரஸ்வதி போற்றி, தீப லட்சுமி போற்றி, தீப துர்கா போற்றி என்று ஒவ்வொரு நாமத்தையும் மூன்று முறை சொல்லி வழிபடவேண்டும். அத்துடன், குலதெய்வத்தின் திருநாமத்தையும் மூன்று முறை சொல்லி, தீபத்தை பன்னிரண்டு முறை நமஸ்காரம் செய்து வணங்குவதால், வீட்டில் எல்லா சுபிட்சங்களும் நிறையும்.