டாஸ்மாக் பார்களில் சைட் டிஷ்ஷாகும் சிட்டுக்குருவிகள்!

DERAR BABU · DERAR BABU Wed Mar 20, 2013 4:18 pm

சிட்டுக்குருவி இனம் மெல்ல, மெல்ல அழிந்து வரும் நிலையில், கரூரில் உள்ள டாஸ்மாக் மதுபான கடை பார்களில் சிட்டுகுருவி கறி விற்பனை செய்யப்படுவதாக வெளியாகியுள்ள தகவல் அதிர்ச்சியை ஏற்படுத்தியுள்ளது.

பல்வேறு காரணங்களினால் அழிவின் விலும்பில் இருக்கும் சீட்டுகுருவி, கரூர் டாஸ்மாக் கடைகளில் சைட் டிஷ்ஷாக விற்பனை செய்யப்படுகிறது என இயற்கை ஆர்வலர் திலாவருக்கு அண்மையில் ஒரு மின்னஞ்சல் வந்தது.

அந்த மின்னஞ்சலில், கரூர் டாஸ்மாக் பார்களில் மதுவுடன் வழங்கப்படும் சைட் டிஷ்ஷாக சிட்டுக்குருவி கறி அளிக்கப்படுகிறது. வனப்பகுதியில் இருந்து பிடித்து வரப்படும் இந்த சிட்டுக்குருவிகள் ஒன்று 5 ரூ வீதம் என்ற கணக்கில் வாங்கப்படுகிறது. இப்பகுதியில் உள்ள பல்வேறு மதுபான கடைகளில், சிட்டுக்குருவி கறி விற்பனை அமோகமாக நடைப்பெற்றுவருகிறது. ஒரு சிட்டுக்குருவி கறி பிளேட் 30 ரூபாய்க்கு விற்பனை செய்யபடுவதால், இது மதுபான கடைகளின் வருவாயை அதிகரிப்பதில் முக்கிய பங்கு வகிக்கிறது. ஆதலால்,மது அருந்துவோர் விருப்பத்திற்கு இணங்க அப்பகுதியில் உள்ள அனைத்து பார்களிலும் சிட்டுக்குருவி கறி தொடர்ந்து விற்பனை செய்யப்படுகிறது எனக் குறிப்பிடப்பட்டிருந்தது.

இதனை கண்டு அதிர்ச்சி அடைந்த திலாவர், உடனடியாக இது குறித்து சோதனை செய்ய இயற்கை ஆர்வலர் அமைப்பை கேட்டுக்கொண்டார். இதனை தொடர்ந்து கரூர் பார்களில் நடைபெற்ற சோதனையில் அங்கு சிட்டுக்குருவி கறி விற்பனை செய்யப்பட்டது உறுதியானது.

பின்னர் இது தொடர்பாக புகார் அளிக்கப்பட்டதன் பேரில் வனத்துறை காவல் துறையினர் நடவடிக்கை மேற்கொண்டுள்ளனர்.

வெப்துனியா