அலுவலகத்தில், ஆண்களிடம் எப்படி நடந்து கொள்ள வேண்டும்

இன்றைய சூழலில் ஆணும், பெண்ணும் சேர்ந்து வேலை செய்வது என்பது, தவிர்க்க இயலாதது. இப்படிப்பட்ட சூழலில், சக ஆண்களிடம் இருந்து பிரச்னைகள் வராமல் இருக்க வேண்டுமெனில், அவர்களிடம் நாம் எப்படி நடந்து கொள்ள வேண்டும்? பழக்கத்தின் எல்லை எதுவரை இருக்கலாம்? இதோ, உங்களுக்கு உதவ சில பயனுள்ள ஆலோசனைகள்:

* நம் உடைகள், எதிரிலிருப்பவர், நம்மை உற்று நோக்காத வகையில் இருப்பது முக்கியம். "மாடர்ன்' ஆக உடுத்தினாலும் கூட, நேர்த்தியாக உடுத்துங்கள்.

* முக்கியமாக, உடன் வேலை பார்க்கும் ஆண்களிடம், நம்முடைய, "பர்சனல்' விஷயங்களை பகிர்ந்து கொள்ள வேண்டாம்.

* சொந்த, குடும்ப விஷயங்களுக்கு, "ஐடியா' கேட்காதீர்கள். "பர்சனல்' மொபைல் எண்களை யாருக்கும் தராதீர்கள்.

* பிரச்னை வரும்போது, "எடுத்தேன், கவிழ்த்தேன்' என்று கையாளாமல், பிரச்னை தீரும் வகையில் ஜாக்கிரதையாக அணுகுவது நன்மை பயக்கும்.

* சிலர், தங்களுக்கு ஒத்துழைக்க வில்லை என்றால், அவர்களின் பழி வாங்கும் படலம், உங்கள் வேலைகளில் குறை கண்டுபிடிப்பதில் ஆரம்பிக்கும். அதனால், முடிந்தவரை, வேலைகளில் தவறு செய்யாதீர்கள்.

* ஆண் நண்பர்களிடம் கைக் குலுக்குவது தவறல்ல. அதற்காக, எல்லாவற்றுக்கும் கைகொடுப்பது, தொட்டுப் பேசுவது கூடாது.

* உங்களின் பொருளாதார இயலாமை மற்றும் குடும்ப நிலைமையை, உடன் பணி புரியும் ஆண்களிடம் கூறுவதில் தவறில்லை. ஆனால், அவர் உண்மையான நட்புடன் பழகுபவராக இருக்க வேண்டும்; எல்லை மீறுபவர் எனத் தெரிந்தால், ஒதுங்க வேண்டும்.

* நட்பு ரீதியாக புன்னகைக்கலாம். ஆனால், காரணமில்லாமல் எல்லாவற்றுக்கும் ஆண்களிடம் சிரிக்காதீர்கள்.

* எந்த ஆணுடனும் ரகசியக் குரலில் பேசாதீர்கள். இது கேட்பவருக்கும், பார்ப்பவருக்கும் தப்பான அபிப்ராயத்தை ஏற்படுத்தும்.

* "ஜல் ஜல்' என அதிக ஓசை கொண்ட கொலுசும், கண்ணாடி வளையல் அணிவதையும் தவிர்க்கலாம்.

* ஆடை பற்றியோ அல்லது உங்களுக்கு உள்ள திறமை பற்றியோ பாராட்டும் போது, நன்றி என்று நேரடியாக சொல்லுங்கள்; தேவையில்லாமல் வெட்கப்படுவதை தவிருங்கள்.

* யாரிடம் பேசினாலும் கண்ணைப் பார்த்து பேசுங்கள்; அவர்களையும் அப்படியே பேச அனுமதியுங்கள்.

* அரட்டையில், ஜோக்ஸ் என்ற பேரில் விரச ஜோக்குகளை அனுமதிக்காதீர்கள்.

* எந்த ஆணாவது உங்களிடம் தவறாக நடந்து கொண்டால், முதலில் நீங்களே, இரண்டொரு முறை எடுத்துச் சொல்லி கண்டித்துப் பாருங்கள். அப்படியும் தொடர்ந்தால், உங்கள் மேலதிகாரியிடம் புகார் செய்யலாம்.

* எந்த பிரச்னைகளுக்காகவும் அழாதீர்கள்; அழும் பெண்களை சுலபமாக ஆண்கள் திசை திருப்பி விடுவர்.

* தேவையே இல்லாமல், எதற்கெடுத்தாலும் சத்தமாக சிரிக்காதீர்கள்.

* உடன் வேலை பார்க்கும் ஆணை விழா, விசேஷம் தவிர தேவை இல்லாமல் வீட்டுக்கு அழைக்காதீர்கள்; நீங்களும் செல்லாதீர்கள்.

* ஆண்கள், தன் மனைவியை உங்களோடு ஒப்பிட்டு பேசுவதையோ அல்லது அவளுக்கு ஒண்ணுமே தெரியாது என்று மதிப்பை குறைத்துப் பேசுவதையோ அனுமதிக்காதீர்கள்.

* பெண்களுக்கு தங்கள் விஷயங்களை பகிர்ந்து கொள்ள, நட்பு ரீதியிலான பழக்கம் ஆணிடமோ, பெண்ணிடமோ ஏற்படுவது இயல்பானது தான். ஆனால், அது அவளது கவுரவத்தை எந்த வகையிலும் பாதிக்காத வகையில் இருக்க வேண்டும். அதுவே பாதிப்புகளை ஏற்படுத்தாது.

"நிமிர்ந்த நன்னடை, நேர் கொண்ட பார்வையும் நிலத்தில் யாருக்கும் அஞ்சாத நெறிகளும்...' பாரதியார் பாடலை கொஞ்சம் நினைவுக்கு கொண்டு வந்து, உங்கள் மதிப்பு, மரியாதையை காப்பாற்றிக் கொள்ளுங்கள் தோழிகளே...

- ஐடியா அம்புஜம்.

"நிமிர்ந்த நன்னடை, நேர் கொண்ட பார்வையும் நிலத்தில் யாருக்கும் அஞ்சாத நெறிகளும்...'
நல்ல அறிவுரை
நன்றி அண்ணா ....!

நல்ல பதிவு தல