சீனாவில் சிவன் கோயிலைக் கட்டிய சீனச் சக்கரவர்த்தி!

**சாமி** · **சாமி** Thu Jul 18, 2013 12:04 am

சீனாவில் சிவன் கோயிலில்...

நமது அ(ச)ண்டை நாடான சீனாவும், பண்டைய தமிழகமும் பல நூற்றாண்டுகளுக்கு முன்பே நட்புறவு கொண்டிருந்தன என்பதற்கு சீனாவில் காணப்படும் தமிழ் கல்வெட்டு ஒன்று ஆதாரமாகத் திகழ்கிறது. சீனாவின் காண்டன் நகரின் வடக்கே 500 மைல் தொலைவில் உள்ள சூவன்சௌ என்னும் துறைமுக நகரில் அமைந்துள்ளது இந்த தமிழ் கல்வெட்டு. இந்தக் கல்வெட்டின் கடைசி வரி மட்டும் சீன மொழியிலும், மற்ற அனைத்து வரிகள் தமிழிலும் காணப்படுகின்றன. இந்தக் கல்வெட்டு அங்குள்ள ஒரு சிவன் கோயிலுக்குள்ளே அமைந்துள்ளது என்பது குறிப்பிடத்தக்கது.

இந்த சிவன் கோயிலைக் கட்ட ஆணையிட்டது, கடல் கடந்து நாடு பிடித்த தமிழக மன்னர்கள் கிடையாது.‘குப்லாய் கான்’ என்கிற புகழ் பெற்ற சீன மன்னன். சக யுகம்(கி.பி.1203 - 1281) சித்ரா பவுர்ணமி அன்று கட்டப்பட்ட இந்த ஆலயத்தில் நிறுவப் பெற்றுள்ள சில விக்கிரகங்களும் இந்த குப்லாய் கானின் ஆணைக்கிணங்க அமைக்கப்பட்டவையே. வரலாற்றில் கொடூரமான ஆட்சியாளர்களில் ஒருவராகக் கருதப்படும் செங்கிஸ் கானின் பேரன் தான் இந்த குப்லாய் கான்.

‘திருக்கதாலீசுவரம்’ என அழைக்கப்படும் இந்த ஆலயத்தில் உள்ள சிவன், ‘திருக்கதாலீசுவரன் உதயநாயனார்’ என அழைக்கப்படுகிறார். ‘தவச்சக்கரவர்த்திகள் சம்பந்தப் பெருமாள்’ என்பவரே சீனச் சக்கரவர்த்தி குப்லாய் கானின் ஆணைக்கேற்ப இந்த சிவன் கோயிலைக் கட்டி முடித்தவர். உடல்நலம் குன்றி இருந்த குப்லாய் கான், தன் உடல்நிலை சீராக வேண்டி திருக்கதாலீசுவரம் கோயிலைக் கட்ட ஆணையிட்டதாக கோயிலினுள் அமைந்துள்ள கல்வெட்டு குறிப்பிடுகிறது.குப்லாய் கானின் முழு பெயர் குப்லாய் சேக்சன் கான். சேக்சன் கான் என்கிற பெயர் மருவி, தமிழில் ‘சேகாசை கான்’ எனக் கல்வெட்டில் குறிப்பிடப்பட்டுள்ளது.
நன்றி-புதிய தலைமுறை