உங்கள் மதிப்பு

AR Murugesan · AR Murugesan Sat Mar 08, 2014 2:24 pm

ஒரு பிரபல பேச்சாளர் ஒரு செமினாரில் இருபது டாலர் பில்லை உயர்த்திக் காட்டி, “இந்த இருபது டாலர் பில் உங்களுக்கே உரியது நீங்கள் இதை வைத்து இருபது டாலருக்கு இந்த ஹோட்டலில் எது வேண்டுமானாலும் சாப்பிடலாம். உங்களில் யாருக்கு இது வேண்டும்?” என்று கேட்டார்.

இலவசாமாக கிடைக்கிற எந்தப் பொருளுக்கும் எப்போதும் ஒரு டிமாண்ட் இருக்குமே… அதனால், எல்லோரும் கை உயர்த்தினார்கள். உடனே அந்தப் பேச்சாளர், “சரி… உங்களில் ஒருவருக்கு இந்த $20ஐ நான் கொடுக்கத்தான் போகிறேன். ஆனால் அதற்கு முன் ஒன்று செய்யப் போகிறேன்.” என்றவர், அந்த டாலர் பில்லை கசக்கினார். பிறகு, “இன்னும் இந்த பில் உங்களுக்குத் தேவைப்படுமா?” என்று கேட்டார்.

என்ன ஆச்சர்யம்! எல்லோருடைய கைகளும் காற்றில் உயர்ந்தே இருந்தது. ஒரே ஒருவரை தவிர… அந்த கை தூக்காத நபர் எழுந்து, “கசங்கிய பில்லை ஹோட்டல் நிர்வாகம் ஏற்றுக் கொள்ளுமா?” என்று கேட்டார். . (முன் ஜாக்கிரதை தனம்!) “கண்டிப்பாக ஏற்றுக் கொள்ளும்” என்றார் பேச்சாளர். உடனே அவர் கையும் உயர்ந்தது
“நல்லது! அடுத்து இதை என்ன செய்கிறேன் என்று பாருங்கள்” என்றவர் அந்த டாலர் பில்லை தரையில் போட்டு தன்னுடைய பூட்ஸ் காலால் நசுக்கி விட்டு பிறகு அதை கையில் எடுத்து, “இப்போது?” என்று கேட்டார். அட… எந்த கையும் இறங்கவில்லை. அதை பார்த்த பேச்சாளர் சிறிது நேரம் அமைதி காத்தார். பிறகு-

”நண்பர்களே இன்று நீங்கள் ஒரு பாடம் கற்றுக் கொண்டீர்கள். நான் இந்த டாலர் பில்லை கசக்கினேன். காலில் போட்டு மிதித்தேன். இருந்தாலும், அதை நீங்கள் விரும்பினீர்கள். காரணம் அதன் மதிப்பு! இன்னும் அது தன் $20 மதிப்பை இழக்கவில்லை. நம்முடைய வாழ்விலும் பல சமயங்களில் நம்முடைய தீர்மானங்களாலும், சுற்றுப்புறச் சூழல்களாலும் கீழே தள்ளப் படுகிறோம், கசக்கப் படுகிறோம், உதாசீனப்படுத்தப் படுகிறோம், புழுதியில் வீசப் படுகிறோம். அப்போது நீங்கள் எப்படி உணர்கிறீர்கள்? ‘நான் மதிப்பில்லாதவன், மற்றவர்கள் என்னை மதிப்பதில்லை’ என்று உணர்கிறீர்கள். டாலர் பில் கசக்கப்பட்டாலும், கீழே போட்டு மிதிக்கப் பட்டாலும் எப்படி தன்னுடைய $20 மதிப்பை இழக்கவில்லையோ அது போல் தான் நீங்களும் உங்கள் மதிப்பை இழக்கவில்லை. உங்கள் திறமை மதிப்பு மிகுந்தது. ஒவ்வொருவரிடமும் பல வகையான திறமைகள் ஒளிந்து கிடக்கிறது. அதை மெருகேற்றுங்கள். வெளிக்காட்டுங்கள். நீங்கள் முற்றிலும் ஸ்பெஷலாகிப் போவீர்கள். இதை என்றும் மறக்காதீர்கள்.!” என்று முடித்தார்

இணையத்தில் படித்த ஆங்கிலக் குட்டிக் கதை!