மலேசியா: தினக்குரல் நாளிதழ் வெளிவராது – உள்துறை அமைச்சு தற்காலிக தடை உத்தரவு!

மலேசியாவில் வெளிவரும் ஆறு தமிழ்ப் பத்திரிக்கைகளில் ஒன்றான ‘தினக்குரல்’ நாளை முதல் வெளிவராது என்றும், அந்தப் பத்திரிக்கையை உள்துறை அமைச்சு மூன்று மாதங்களுக்குத் தற்காலிகத் தடை செய்துள்ளது என்றும் அறிவிக்கப்பட்டுள்ளது.

தடை உத்தரவுக்கான காரணங்கள் என்ன என்று இன்னும் அறிவிக்கப்படவில்லை.

இன்று வெளிவந்த தினக்குரல் பத்திரிக்கையின் முதல் பக்கத்தில் இது குறித்து அந்தப் பத்திரிக்கையின் ஆசிரியர் பிஆர்.இராஜன் அறிவிப்பு ஒன்றை எழுதி வெளியிட்டிருக்கின்றார். அதன்படி, தினக்குரல் நாளை முதல் வெளிவராது என்றும், மூன்று மாதங்களுக்கு அந்தப் பத்திரிக்கையைத் தற்காலிகத் தடை செய்து உள்துறை அமைச்சு உத்தரவு பிறப்பித்துள்ளதாகவும் அவர் எழுதியிருக்கின்றார்.

‘தமிழுக்கு வந்த சோதனை’ என்ற தலைப்பில் பிஆர்.இராஜன் எழுதியுள்ள அந்தக் கட்டுரையில் தாங்கள் தடை உத்தரவுக்கு எதிராக மேல் முறையீடு செய்திருப்பதாகவும், ஆனால் பதில் எத்தனை நாட்கள் ஆகும் என்பது தங்களுக்குத் தெரியவில்லை என்றும் இராஜன் குறிப்பிட்டுள்ளார்.

புதிய நாளிதழ் ‘புதிய பார்வை’

தான் எழுதியுள்ள கட்டுரையில் தினக்குரலுக்கு பதிலாக அதே ஊழியர்களுடன் ‘புதிய பார்வை’ என்ற மற்றொரு நாளிதழைத் தாங்கள் வெளியிடவிருப்பதாகவும் இராஜன் தெரிவித்துள்ளார்.

உள்துறை அமைச்சின் அங்கீகாரத்தைப் பெற்ற புதிய பார்வை என்ற பத்திரிக்கை ஒரு ம.இ.கா. தலைவரின் ஆதரவு பெற்ற பத்திரிக்கை என்று ம.இ.கா வட்டாரங்கள் தெரிவித்தன.

தினக்குரல் வெளிவரும் வரை அதே பாணியில் அதே கோணத்தில் புதிய பார்வை பத்திரிக்கை வெளிவரும் என்றும், அதற்கும் வாசகர்கள் தங்களின் ஆதரவை வழங்கி வர வேண்டும் என்றும் பிஆர் இராஜன் கேட்டுக் கொண்டுள்ளார்.

தினக்குரலுக்கான மேல் முறையீடு வெற்றி பெற்றால், புதிதாக வெளிவர இருக்கும் புதிய பார்வை நிறுத்தப்படுமா அல்லது அதுவும் தொடர்ந்து வெளிவருமா என்பது குறித்து எந்த தகவலும் இல்லை.

அவ்வாறு புதிய பார்வையும் தொடர்ந்து வெளிவந்தால், அச்சின் வழி மலேசியாவில் வெளிவரும் நாளிதழ்களின் எண்ணிக்கை ஏழாக உயரும் என்பது குறிப்பிடத்தக்கது.

செல்லியல்

இன்று முதல் ‘தினக்குரல்’ பத்திரிக்கைக்கு பதிலாக ‘புதிய பார்வை’!



கோலாலம்பூர், மார்ச் 28 – மலேசியாவில், வெளிவரும் 6 தமிழ் தினசரிகளில் ஒன்றான ‘தினக்குரல்’ நாளிதழ், அரசாங்கத்தால் தற்காலிகமாக தடை செய்யப்பட்டுள்ளது. இன்று முதல் அந்தப் பத்திரிக்கை வெளிவருவது நிறுத்தப்பட்டுள்ளது.

உள்துறை அமைச்சு விதித்த 3-மாதத் தடை உத்தரவுக்கு எதிராக அந்தப் பத்திரிக்கையின் நிர்வாகம் மேல்முறையீடு செய்திருப்பதாக அறியப்படுகின்றது.

இச்சூழலில், ‘தினக்குரல்’ நாளிதழுக்கு பதிலாக அதே கோணத்தில், அதே ஆசிரியர் குழுவினரைக் கொண்டு, புதிய நாளிதழான, ‘புதிய பார்வை’ என்ற பத்திரிக்கை இன்று வெளியிடப்பட்டுள்ளது.

புதிய பார்வையின் அனுமதியை மற்றொரு நிறுவனம் ஏற்கனவே உள்துறை அமைச்சிடம் இருந்து பெற்று கைவசம் வைத்திருந்தது.

தற்போது தினக்குரல் தடை செய்யப்பட்ட நிலையில், தினக்குரல் பத்திரிக்கையின் ஆசிரியர் குழுவிற்கும் மற்றும் நிர்வாகம், மற்ற ஊழியர்களுக்கும் கைகொடுக்கும் விதமாக புதிய பார்வை பத்திரிக்கையை வெளிக் கொணர அதன் உரிமையாளர்கள் முடிவு செய்திருப்பதாகவும் பத்திரிக்கை வட்டாரங்கள் தெரிவித்தன.

புதிய பார்வையின் பின்னணியில் ம.இ.காவின் முக்கியத் தலைவர் ஒருவர் இருப்பதாகவும் பத்திரிக்கை வட்டாரங்கள் தெரிவித்துள்ளன.