தமிழில் வருமா மின் புத்தகங்கள்?

அமேசான் இணையச்சந்தை தளம் இந்தியாவில் அதன் விற்பனையை அமோகமாக நடத்திவருவது அனைவரும் அறிந்த விஷயமே. ஷேவிங் ரேஸர் ட்ரிம்மர், கம்மல், கேமரா, கம்ப்யூட்டர், அடுக்களை சாமான்கள் என்று (அம்மா அப்பா தவிர) சகலவிதமான பொருள்களையும் விற்றுவருகிறார்கள். இதில் புத்தக வகையறாக்கள் மிகவும் பிரசித்தியான ஒன்று.

அமேசானால் ஈ-இன்க் தொழில்நுட்பத்தில் அறிமுகப்படுத்தப்பட்டிருக்கும் சாதனம் கிண்டில். சாதாரண மொபைல் ஃபோன் மற்றும் இதர எலக்ட்ரானிக் சாதனங்களின் திரையிலிருப்பவைகளை, சூரியஒளி நேரடியாக இறங்கும் பொதுவெளியில் பார்க்கவோ படிக்கவோ சிரமப்பட வேண்டியிருக்கும். ஆனால், கிண்டிலில் அச்சடித்த காகிதத்தில் புத்தகத்தைப் படிப்பது போன்று இலகுவாகப் படிக்க இயலும்.

இது கண்களுக்கு அயர்ச்சி ஏற்படாத வண்ணம் பலமணி நேரம் புத்தகங்களைப் படிக்க ஏதுவாகவும் வடிவமைக்கப்பட்டுள்ளது. மேலும் கிண்டில் மென்பொருளை கணினியிலோ அல்லது ஐஃபோன் போன்ற திறன்பேசிகளில் நிறுவிக்கொண்டோ தரவிறக்கிய புத்தகங்களைப் படிக்கலாம்.

இந்தக் கையடக்கச் சாதனத்தில் ஒரு புத்தக அலமாரியையே சுமையின்றி சுலபத்தில் அடக்கிவிடலாம். இச்சாதனம் வையகமெங்கும் புத்தக ஆர்வலர்களால் பெரிதும் போற்றிப் புகழப்படுகிறது.

இத்தகைய சத்குணவிசேஷங்கள் நிரம்பிய இச்சாதனத்தில் புத்தகங்களைப் படிக்க, மொபி, பிடிஎஃப் போன்ற வடிவத்தில் தயாராக இருக்கும் கோப்புகளை அமேசான் தளத்தில் பதிவேற்ற வேண்டும்.

இப்படிப் படைப்புகளைப் பதிவேற்றம் செய்யும் போது அப்படைப்பின் மொழியைத் தேர்ந்தெடுக்க வேண்டும்.

Made for India என்பதை தாரகமந்திரமாகத் தாங்கி இணையத்தில் விற்பனை செய்துவரும் amazon.in இணையதளத்தில் கிண்டிலில் படிக்க ஏதுவாக தமிழ் உள்பட எந்தவொரு இந்திய மொழி மின் புத்தகமும் அந்த மொழிப் பட்டியலில் இல்லாதிருப்பது ஏமாற்றமளிக்கிறது.

சுதாகர் கஸ்தூரி என்பவர் தானெழுதிய 7.83 ஹெர்ட்ஸ் என்கிற அறிவியல் புதினத்தை அச்சுப் புத்தகமாக்குவதற்கு முன்பாக அமேசானில் வலையேற்றினார். இரண்டு நாள்களில் ஆர்வமுள்ள வாசகர்கள் சிலர் அந்த மின் புத்தகத்தை அதற்குண்டான தொகையைச் செலுத்திக் கிண்டிலில் தரவிறக்கிப் படித்தார்கள்.

திடீரென்று ஒரு நாள் அந்தப் புத்தகத்தை தங்களது இணையதளத்திலிருந்து நீக்கியது அமேசான். காரணத்தை ஆராய்ந்தால் ஆண்டிராய்ட் இயங்குதளம் கொண்ட சில மின்னணு சாதனங்களில் கிண்டில் மென் பொருளில் தமிழ் உருக்கள் தெளிவாகத் தெரியவில்லை என்று சொல்கிறார்கள்.

பத்திகளும் அதனுள் வரும் வரிகளும் கிண்டில் திரையில் சமச்சீராக வருவதற்கான நிரலிகள் இன்னும் உருவாக்கப்படாததாலும் எழுத்துருவிலிருந்து ஒலியிருவாகக் கேட்கும்படியான (Text to Speech) மேலதிக செüகர்யங்களும் கிண்டிலில் தமிழுக்கு இணைக்கப்படாமல் இருப்பதாலும் இதை நீக்கியிருக்கலாம் என்றும் நம்பப்படுகிறது.

யூனிகோட் என்றழைக்கப்படும் சர்வசாதன எழுத்துருக்களில் Tace - 16 என்ற தமிழ் வகையறா எழுத்துரு இதற்கெல்லாம் தீர்வாக அமையும் என்றும் ஒரு சாரார் கூறுகிறார்கள்.

வெறும் எண்பத்தைந்தாயிரத்துச் சொச்சம் மக்களே பேசும் Manx மொழியும், ஏழு இலட்சத்திச் சொச்சம் பேர் பேசும் Basque என்கிற ஒரு பகுதி பாஷையும் இடம்பிடித்த அமேசான் கிண்டிலில் எழுபது மில்லியனுக்கு மேற்பட்டவர்களின் தாய்மொழியாக இருக்கும் தமிழ் இடம்பிடிக்காதது துரதிர்ஷ்டமானதே.

பெருமளவில் தொழில்நுட்ப வல்லுனர்களைக் கொண்ட அமேசான் இந்தியா, வெகுஜன பயன்பாட்டில் இருக்கும் கிண்டில் போன்ற மின்னணு சாதனங்களில் பாரதத்தின் மாநில மொழிகளை வெளியிடுவதற்கு ஆவன செய்யவேண்டும்.

இந்திய மண்ணில் தான் சந்தைப்படுத்தும் பொருள்களை மட்டுமே ஜனங்கள் வாங்கவேண்டும் என்றும் அந்நாட்டின் நுகர்வோரின் விருப்பங்களைப் பரிசீலிப்பதில் ஒருதலைப்பட்சமாக செயல்படுவேன் என்கிற ரீதியில் அமேசான் தனது விற்பனையை மேற்கொண்டால் இந்திய அரசாங்கம் இவ்விவகாரத்தில் தலையிட்டு இத்திருநாட்டின் செம்மொழிகளுக்கு டிஜிட்டல் அங்கீகாரம் கிடைக்க ஏற்பாடு செய்யவேண்டும்.

ஓலைச்சுவடிகளில் அழியும் நிலையிலிருந்த அரும்பெரும் நூல்களை தமிழ்த்தாத்தா உ.வே.சா. அச்சுப்புத்தகமாக்கியது சென்ற நூற்றாண்டு சாதனை.

அது போல அடுத்த தலைமுறையினர் தங்கு தடையின்றி மின்னணு சாதனங்களில் தமிழில் படிக்க, இளைய தலைமுறையினர் அதிகம் பயன்படுத்தும் கிண்டில் போன்றவை பிழையின்றி தமிழை இணைக்கும் பட்சத்தில் இளைய தலைமுறையினரிடையே தமிழ் படிக்கும் ஆர்வத்தை முடுக்கிவிட முடியும். (dinamani)