கங்கையே சூதகமானால்...

வெளிநாட்டவர்களுக்கு பனாரஸ், வட மாநிலத்தவர்களுக்கு வாரணாசி, நமக்கு காசி. நாட்டிலேயே பழமையும்,பெருமையுமிக்க புராதனமான நகரம்.இந்த பழம் பெருமை பேசி,பேசியே இந்த ஊரை நம்மூர் அரசியல்வாதிகள் காசியை இருபத்தைந்து ஆண்டுகளுக்கு பின்னோக்கி வைத்திருக்கின்றனர்.
ஊருக்குள் காரில் போவது என்பது தேரில் போவது போலத்தான். இதன் அர்த்தம் அவ்வளவு சுகமானது என்பதல்ல அவ்வளவு மெதுவாக போகுமென்பதாகும்.வேகமாக போகவேண்டும் என்றால் காரைவிட்டு இறங்கி இங்கே ஒடும் ஒரு லட்சத்திற்கும் அதிகமான சைக்கிள் ரிக்ஷாக்களில் ஒன்றில்தான் ஏறிக்கொள்ள வேண்டும்.

காசியில் இறந்தால் முக்தி என்றார்களே தவிர கங்கை கரையில் அரைகுறையாக எரித்து ஆற்றில் இழுத்துவிட்டால்தான் முக்தி என்று எங்கும் சொல்லவில்லை.மின் மயானம் வந்த பிறகும் அரிச்சந்திரன் காலம் போலவே ஆற்றில் வைத்து பிணங்களை எரிப்பதும், அடுத்த பிணம் வந்ததும் எரிந்து கொண்டிருக்கும் பிணத்தை அரைகுறையாக ஆற்றில் இழுத்து விடவும் எந்த புராணத்தில் சொல்லப்பட்டு இருக்கிறது என்று தெரியவில்லை.
இதில் சிறு வயது பிணங்கள், பாம்பு கடித்து இறந்த பிணங்கள்,சாதுக்களின் பிணங்களை எரிக்கமாட்டார்களாம் அப்படியே கல்லைக்கட்டி ஆற்றுக்குள் போட்டுவிடுவார்களாம்,பாவம் கங்கை எவ்வளவுதான் தாங்குவாள்.
ஊரில் எங்கெல்லாமோ இருந்து கொண்டுவரும் குப்பை கூளங்களை படகில் கொண்டு போய் நடு ஆற்றில் கொட்டுகிறார்கள்,துணிகளை துவை துவை என்று துவைக்கிறார்கள்,மாடுகளை குளிப்பாட்டுகிறார்கள்,இங்கே மனிதர்களைவிட அதிக உரிமையுடன் நடமாடும் மாட்டின் சாணங்களை புனிதமான படிக்கட்டுகளில் எருவாட்டிக்காக தட்டி வைக்கின்றனர்,இவைகளுக்கு நடுவே கங்கையில் மூழ்கி ஹரஹர மகாதேவ சொல்லி பக்தர்கள் குளிக்கின்றனர்.

கங்கைக்கு சிறப்பு சேர்ப்பவை வருண் மற்றும் அசி நதிகளாகும்,இதில் அசி நதி நம்மூர் கூவம் போல உள்ளூர் கழிவுகளை சுமந்துகொண்டு சாக்கடையாகிவிட்டது, இந்த சாக்கடை தண்ணீர் நேரடியாக போய் கங்கையில்தான் கலக்கிறது.ராஜாக்கள் ஆண்ட பராம்பரியமான கட்டிடங்கள் இப்போது அவர்களது வாரிசுகளின் சண்டை வழக்கு காரணமாக கவனிப்பாரின்றி அதன் பெருமையை இழந்து வருகிறது.கஞ்சாவை டாஸ்மாக் ரேஞ்சுக்கு கூவி கூவி விற்கின்றனர் இதற்கான உறிஞ்சு குழாய்களையும் படித்துறைகளில் பரப்பிவைத்து விற்கின்றனர்.

மங்கை சூதகமானால் கங்கையில் முழ்கலாம், ஆனால் கங்கையே சூதகமானால் எங்கே போவது என்ற பழமொழியை எந்த நேரத்தில் சொல்லிவைத்தார்களோ இப்போது அது நிஜமாகிக் கொண்டு இருக்கிறது.உள்ளூர் மக்களும் வெளியூர் மக்களும் கங்கையை எந்த அளவு பாழ்படுத்த முடியுமோ அந்த அளவிற்கு போட்டிபோட்டு பாழாக்கிக்கொண்டு இருக்கின்றனர்.இதை எல்லாம் சரி செய்ய சரியான ஒருவர் இந்த தொகுதியில் தேர்ந்து எடுக்கப்பட வேண்டும்.


- எல்.முருகராஜ்