திருவண்ணாமலை மாவட்டத்தில் 600 ஏரிகள் தண்ணீர் இல்லாமல் வறண்டது

தண்டராம்பட்டு தாலுகாவில் சாத்தனூர் அணை, செங்கம் தாலுகாவில் குப்பனத்தம் அணை, கலசப்பாக்கம் தாலுகாவில் மிருகண்டா அணை, போளூர் தாலுகாவில் செண்பகத்தோப்பு அணை என 4 அணைகள் திருவண்ணாமலை மாவட்டத்தில் உள்ளன. இதன் மூலமாக விவசாய பணிகள் நடந்து வருகின்றன.

சாத்தனூர் அணையின் உயரம் மொத்தம் 119 அடி. நேற்றைய நிலவரப்படி அணையின் நீர் இருப்பு 77.30 அடி. குப்பனத்தம் அணையின் உயரம் 59 அடி. நீர் இருப்பு 14.76 அடி. மிருகண்டா அணையின் உயரம் 23 அடி. நீர் இருப்பு ஏதுமில்லை. செண்பகத்தோப்பு அணையின் உயரம் 62 அடி. நீர் இருப்பு 10.23 அடியாகும்.

அதே போல பொது பணித்துறையின் கண்காணிப்பில் திருவண்ணாமலை தாலுகாவில் 89 ஏரிகளும், செங்கம் தாலுகாவில் 50 ஏரிகளும், போளூர் தாலுகாவில் 106 ஏரிகளும், ஆரணி தாலுகாவில் 57 ஏரிகளும், வந்தவாசி தாலுகாவில் 146 ஏரிகளும், செய்யாறு தாலுகாவில் 135 ஏரிகளும், தண்டராம்பட்டு தாலுகாவில் 17 ஏரிகள் என மொத்தம் 600 ஏரிகள் உள்ளன. எந்த ஏரியிலும் தண்ணீர் கிடையாது. ஒரு சில ஏரிகளில் கால்நடை உபயோகத்துக்கு மட்டுமே குட்டையளவு தண்ணீர் உள்ளன.

சாத்தனூர் அணையில் இப்போதுள்ள நீர் இருப்பில் கூட்டு குடிநீர் திட்டம். மீன் வளர்ப்பு, பூங்கா பராமரிப்பு ஆகியவற்றுக்காக மட்டுமே பயன்படுத்தப்பட்டு வருகிறது. சாத்தனூர் நீர்ப்பிடிப்பு பகுதியில் இருந்து திருவண்ணாமலை நகரம், தானிப்பாடி – தண்டராம்பட்டு, வானாபுரம் – லாடவரம், செங்கம் – புதுப்பாளையம், சாத்தனூர் கிராமம் என 5 கூட்டு குடிநீர் திட்டங்களுக்காக ஆண்டு முழுவதும் 179.89 மில்லியன் கன அடிநீர் பயன்படுத்தப்பட்டு வருகிறது.

அணையின் நீர்மட்டம் வெகுவாக குறைந்துள்ளதால் குடிநீர் திட்டத்துக்கு தொடர்ந்து தண்ணீர் கிடைக்குமா? என திருவண்ணாமலை மாவட்டத்தில் பொதுமக்கள் அச்சம் அடைந்துள்ளனர்.