கங்கைகொண்ட தமிழனை

karaumalaithamizhazhan · karaumalaithamizhazhan Mon Sep 22, 2014 4:00 pm

கங்கைகொண்ட தமிழனை நெஞ்சில் நிறுத்துவோம்
                        பாவலர் கருமலைத்தமிழாழன்

தஞ்சையினை   உலகின்முன் நிமிர்த்தி வைத்த
          தந்தையைப்போல்   கங்கைகொண்ட சோழ   புரத்தால்
வெஞ்சமரில்   சோழன்தன்   களிறு என்று
          வெற்றிக்கே   இலக்கணத்தை   வகுத்த   மன்னன்
பஞ்சவனாம்   மாராயன்   பட்டத்   தோடு
          பகைவரெல்லாம்   நடுநடுங்க    வடநி   லத்தை
விஞ்சுபுகழ்   சோழர்தம்    நாடாய்   ஆக்கி
          வீற்றிருந்து   பொற்கால   ஆட்சி   செய்தோன் !

இலங்கையினை   வென்றுவந்தோன்    மாலத்   தீவை
          இனியதமிழ்   நாட்டுடனே    இணைய   வைத்தோன்
கலத்தினிலே   படைநடத்திக்   கடல்க   டந்து
          கடாரத்தைச்   சுமத்திராவைத்   தனதாய்   ஆக்கி
நிலம்தாண்டிக்   கடல்தாண்டிச் சோழ   நாட்டை
          நீள்புவியில்   பேரரசாய் நிலைநி றுத்தித்
துலங்குகின்ற   இந்திரன்தன்   ரத்ன   வாளை
          தூயமுத்து   மாலைதன்னைக் கொணர்ந்த   ளித்தோன் !

ஆயிரமாம்   ஆண்டுகள்தாம்   கடந்த   பின்பும்
          அவன்வடித்த   வரலாற்றால்   வாழு   கின்றான்
பாயிரமாய்   அவன்வீரம்   தன்மா   னத்தைப்
          பதிக்காமல்   விட்டதனால்   சுயமி   ழந்தோம்
போயிழந்த   ஈழமுடன்   காவிரி   கங்கை
          பொலிவுடனே   நம்முரிமை   ஆக்கு   தற்கு
வாயிலாக    இராசேந்திரன்   வகுத்து வைத்த
          வரலாற்றைப் புதுப்பிக்க   உறுதி   ஏற்போம் !

                                  *************

**T.N.Balasubramanian** · **T.N.Balasubramanian** Mon Sep 22, 2014 6:03 pm

நெஞ்சில் நிலைத்து நிற்க வைக்கும் கவிதை .
ரசித்தேன் அன்பு மலர்

ரமணியன்

(பிகு :இரு முறை பதிவாகி இருந்தது . ஒன்றை நீக்கி விட்டேன் .
ரமணியன் )

கங்கைகொண்ட தமிழனை

கங்கைகொண்ட தமிழனை

Re: கங்கைகொண்ட தமிழனை

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக