நாணய சேகரிப்பில் அசத்தும் பள்ளி மாணவன் !

மதுராந்தகம் : மதுராந்தகம் அருகே, பழங்கால நாணயங்களை சேகரிக்கும் பணியில், பள்ளி மாணவர் அசத்தி வருகிறார்.மதுராந்தகம் அடுத்த, பழுமத்தூர் கிராமத்தைச் சேர்ந்தவர் பழனி என்பவர் மகன் பாலசந்தர், 11. செங்கல்பட்டில் உள்ள தனியார் பள்ளியில் 6ம் வகுப்பு படித்து வருகிறார்.அவர், கடந்த இரண்டு ஆண்டுகளாக, 1835ம் ஆண்டு நாணயம் முதல் தற்போது புழக்கத்தில் உள்ள நாணயங்கள் வரை சேகரிக்கும் பணியில் ஈடுபட்டு வருகிறார். குறுகிய காலத்திற்குள், தற்போது வரையில் மொத்தம் 960 நாணயங்களை அவர் சேகரித்துள்ளார்.

இத்தகைய ஆர்வம் குறித்து, அவரிடம் கேட்டதற்கு அவர் கூறியதாவது:இரண்டு ஆண்டுகளுக்கு முன் சென்னை தீவுத்திடலில் நடந்த பொருட்காட்சியில் ரிசர்வ் வங்கியின் நாணய கண்காட்சிக்கு, என் தந்தை அழைத்து சென்றார்.அங்கு பார்வைக்காக வைக்கப்பட்டு இருந்த பழங்கால நாணயங்களை பார்த்து அது குறித்து விளக்கம் கேட்டு வியப்படைந்தேன். அன்று முதல் நான், எனது தந்தையின் உதவியுடன் பழங்கால இந்திய நாணயங்களை சேகரிக்க துவங்கினேன்.

மேலும், இணையதளங்கள் மூலம் நாணயங்களின் வரலாறு கண்டறிய பெரும் உதவியாய் இருந்தது. என்னிடம் தற்போது சோழர் கால நாணயங்கள், 1835ம் ஆண்டு கிழக்கிந்திய கம்பெனி நாணயங்கள், 1878 விக்டோரியா ராணி நாணயம், 1904, 1906, 1910 எட்வர்ட் ஏழாவது கிங், 1915, 1916, 1919, 1933 ஜார்ஜ் ஐந்தாம் ராஜா, 1939, 1942, 1943, 1944, 1947 ஜார்ஜ் ஆறாம் ராஜா, அனா பைசாக்கள், தொண்டிகாலனா, 4 அனா, 1/2 அனா, 1 அனா, 2 அனா வைத்து உள்ளேன்.

சுதந்திரத்திற்கு பிறகில் இருந்து காளை மாடு, குதிரை காலனா பைசாக்கள் முதல் இன்று வரையிலான நாணயங்கள் வரை சேகரித்து உள்ளேன்.120 வெளிநாட்டு நாணயங்கள், அச்சு பிழை நாணயங்களும் சேகரித்து உள்ளேன். மேலும் பல்வேறு நாணயங்கள் சேகரிக்கும் பணியில் ஈடுபட்டு வருகிறேன்.இவ்வாறு அவர் கூறினார்.

நன்றி : தினமலர்

நல்ல முயற்சி...வாழ்த்துக்கள் பாலசந்தர்

வாழ்த்துக்கள் பாலசந்தர் .

உங்கள் பயணம் தொடரட்டும்...