திருவள்ளுவர் பிரசார பயணம்: ஜனவரி 11-இல் கன்னியாகுமரியில் தொடங்குகிறார் தருண் விஜய்

-
திருவள்ளுவர், பாரதியாரின் சிறப்புகளை நாடு முழுவதும் எடுத்துரைக்கும் பிரசார பயணத்தை பாஜகவின் மாநிலங்களவை உறுப்பினர் தருண் விஜய் கன்னியாகுமரியில் ஜனவரி 11-ஆம் தேதி தொடங்க உள்ளார்.

"திருவள்ளுவர் திருப்பயணம்' என்ற பெயரில் இந்தப் பயணத்தை தருண் விஜய் மேற்கொள்ள உள்ளார். இந்தப் பயணத்தை மத்திய மனிதவள மேம்பாட்டுத் துறை அமைச்சர் ஸ்மிருதி இரானி ஜனவரி 11-ஆம் தேதி காலை 10.30 மணியளவில் கன்னியாகுமரியில் இருந்து துவக்கி வைக்கிறார்.

மத்திய கப்பல் போக்குவரத்துத் துறை அமைச்சர் பொன்.ராதாகிருஷ்ணன், பாஜக மாநிலத் தலைவர் தமிழிசை செüந்தரராஜன் உள்பட தமிழறிஞர்கள் பலர் இந்த துவக்க நிகழ்ச்சியில் பங்கேற்க உள்ளனர். இந்தப் பயணம், தூத்துக்குடி, மதுரை, சிவகங்கை, திருச்சி, தஞ்சாவூர், கங்கைகொண்ட சோழபுரம் வழியாக ஜனவரி 15-ஆம் தேதி சென்னை வந்தடைய உள்ளது.
-
நாகர்கோவிலில் உள்ள செய்குத்தம்பி பாவலர், கவிமணி தேசிக விநாயகம் பிள்ளை ஆகியோரின் நினைவிடங்கள், ஒட்டப்பிடாரத்தில் உள்ள வ.உ.சிதம்பரம் பிள்ளை பிறந்த இடம், எட்டயபுரத்தில் உள்ள பாரதியார் பிறந்த இடம், மதுரையில் பாரதியார் ஆசிரியராகப் பணியாற்றிய சேதுபதி மேல்நிலைப் பள்ளி, சிவகங்கை மாவட்டம் சிறுகூடல்பட்டியில் உள்ள கண்ணதாசன் இல்லம், நாட்டரசன் கோட்டையில் உள்ள கம்பர் நினைவிடம், வேலுநாச்சியார் நினைவிடம், திருச்சியில் உள்ள வ.வே.சு. அய்யர் நினைவு இல்லம், தஞ்சாவூரில் உ.வே.சாமிநாத அய்யர் நினைவு இல்லம், ராஜேந்திரன் சோழன் பெருமையைக் கூறும் கங்கை கொண்ட சோழபுரம் ஆகிய முக்கிய இடங்களின் வழியாக வந்து, மயிலாப்பூரில் உள்ள திருவள்ளுவர் சிலையில் இந்த பயணம் நிறைவடைய உள்ளது.
-
இதன் தொடர்ச்சியாக மதுரை, திருச்சி, சென்னை ஆகிய இடங்களில் பொது நிகழ்ச்சிகளும் நடைபெற உள்ளன. இதில் தமிழ் அறிஞர்கள், அரசியல் பிரமுகர்கள் பங்கேற்க உள்ளனர்.
================
--தினமணி