காதல் செடி !

**M.Jagadeesan** · **M.Jagadeesan** Tue Aug 11, 2015 3:46 pm

பெண்களே ! பேசுங்கள் !
வாய் வலிக்கப் பேசுங்கள் !
பேசுவதற்கு உங்களுக்கு சொல்லியா தரவேண்டும் ?
ஊர்வம்பு பேசாத நாளெல்லாம்
பிறவாத நாளல்லவா உங்களுக்கு !

எவளோ ஒருத்தி
யாரோ ஒருவனுடன் ஓடிப்போனால்
அவ்வளவுதான் !
சும்மா இருந்த வாய்க்கு அவல் கிடைத்தது போல
அம்மம்மா ! கண் , காது , மூக்கு வைத்து
கதை கட்டுவதில் கைதேர்ந்தவர்கள் அல்லவா நீங்கள் !

ஊர்ப்பெண்களே !
என் காதலைப் பற்றியும் பேசுகிறீர்கள் !
என் காதலனைப் பற்றியும் பேசுகிறீர்கள் !
குற்றமில்லா எங்கள் காதலை என் அன்னையிடம்
பற்ற வைத்தீர்கள் ! என் அன்னையோ
பெற்றமகள் என்றும் பாராது
பேசுகிறாள் ; ஏசுகிறாள்
கரித்துக் கொட்டுகிறாள் ! காறித் துப்புகிறாள் !

ஆனாலும் நான் கவலைப்படமாட்டேன்

காதலன் அவனைக் கைபிடிப்பேன் - அவன்
காரியம் யாவினும் கைகொடுப்பேன் !
மாதர் அறங்கள் அத்தனையும்
மாண்புறச் செய்வேன் இவ்வுலகில் !

பெண்களே ! நீங்கள் பேசும்
ஊர்வம்பையே உரமாகக் கொண்டு
அன்னையின் சொல்லை நீராகக் கொண்டு
அழகாக வளரும் எங்கள் காதல் செடி !

குறள்
======

ஊரவர் கௌவை எருவாக அன்னைசொல்
நீராக நீளுமிந்த நோய்

**T.N.Balasubramanian** · **T.N.Balasubramanian** Tue Aug 11, 2015 7:15 pm

ஆர்வத்தை தூண்டிய பதிவு அய்யா !
நன்றி .

சிறியதோர் விண்ணப்பம் :
குறளைத் தழுவி வரும் கவிதை .
அதிகாரம் எண்ணையும்-குறள் எண்ணையும் குறிப்பிட்டால் ,
உதவியாக இருக்கும் .

ரமணியன்