தூது செல்வாய் வெண்ணிலவே !

நினைவெல்லாம் அவளாக நித்தமும் தவிக்கின்றேன்
...நித்திரை தொலைத்துவிட்டேன் நிம்மதி இழந்துவிட்டேன்
மனையிலுள்ள சுவரெல்லாம் மங்கையவள் பேரெழுதி
...மதியிழந்து நிற்கின்றேன் மாற்றுவழி அறியாமல்
எனையாளும் தெய்வங்கள் என்னைக் கைவிட்டதுவே
...என்னுயிரை மாய்த்திடவே எண்ணுகின்ற வேளையிலே
கனைகுரல் பல்லியொன்று காதோரம் சொல்லியதே
...காதல் நிறைவேற தூதனுப்பு என்றதுவே !

சுந்தரனாம் சூரியனைத் தூதனுப்ப முடிவெடுத்தேன்
...சுட்டுவிடும் கிரணங்கள் அவனுக்கு இருப்பதனால்
இந்திரனைத் தூதனுப்ப முடிவெடுத்த வேளையிலே
...இராமாயண அகலிகை நினைவுக்கு வந்ததுவே
தொந்தியுள்ள கணபதியைத் தூதனுப்ப எண்ணுகையில்
...தாரமற்ற கடவுளுக்குத் தகுதியில்லை என்பதனால்
விந்தைமிகு வெண்ணிலவே உன்னைத் தேர்ந்தெடுத்தேன்
...விரைந்துவா வெண்ணிலவே தூதுசெல்ல விரைந்துவா !

அவளழகை எடுத்துரைக்க வெண்ணிலாவே !
...ஆயிரம்நா போதாது வெண்ணிலாவே !
குவளைமலர்க் கண்ணழகி வெண்ணிலாவே !
...குங்குமத்தின் பொட்டழகி வெண்ணிலாவே !
துவள்கின்ற இடையழகி வெண்ணிலாவே !
...தும்பைப்பூ சிரிப்பழகி வெண்ணிலாவே !
பவளம்போல் உதட்டழகி வெண்ணிலாவே !
...பார்ப்பதற்கு ரம்பையடி வெண்ணிலாவே !

உடல்மெலிந்து போனதடி வெண்ணிலாவே !
...ஊணுறக்கம் இல்லையடி வெண்ணிலாவே !
கடலன்ன காமத்தால் வெண்ணிலாவே !
...கருத்தழிந்து போனேனே வெண்ணிலாவே !
திடமாகச் சொல்லுகிறேன் வெண்ணிலாவே !
...திருமணமும் அவளுடனே வெண்ணிலாவே !
மடலேறும் என்முடிவை வெண்ணிலாவே !
...மங்கையிடம் சொல்லிவிடு வெண்ணிலாவே !

வஞ்சமிலா என்இதயம் வெண்ணிலாவே ! – அந்த
...வஞ்சியிடம் இருக்குதடி வெண்ணிலாவே !
கெஞ்சினால் மிஞ்சுகிறாள் வெண்ணிலாவே ! – அவள்
...கேட்பதெல்லாம் தருகின்றேன் வெண்ணிலாவே !
தஞ்சமென உனையடைந்தேன் வெண்ணிலாவே ! – என்
...தாபத்தை சொல்லிவிடு வெண்ணிலாவே !
மஞ்சத்தில் அவளுடனே வெண்ணிலாவே ! – நான்
...மகிழ்ந்திடவே துணைநிற்பாய் வெண்ணிலாவே !

மடல் ஒன்றை எழுதி
மங்கையிடம் சேர்க்க சொல்லி
மதி மகளை தூதனுப்பும்
மன்னனே ... கவிதை ..அருமை..

நன்றி ! செந்தில் குமார் .

கவிதை , காதலன் ஒருவன் , வெண்ணிலவைக் காதலியிடம் தூது அனுப்புவதுபோல் அமைந்துள்ளது. ஆதலால் தங்கள் படத்தில் காதலிக்குப் பதிலாகக் , காதலன் இருந்தால் பொருத்தமாக இருக்கும் .

அருமை!
ரமணி

வெண்ணிலாவே,வெண்ணிலாவே ஜெதீஸ் அருமையோ அருமை நன்றி.

ரமணி ,பழ . முத்து ராமலிங்கம் ஆகியோருக்கு நன்றி .