அண்ணாமலை பல்கலைக்கழகத்தில் இருந்து மேலும் 300 பேர் அரசு கல்லூரிகளுக்கு மாற்றம்?

சிதம்பரம் அண்ணாமலைப் பல்கலைக்கழகத்தில் கூடுதலாக இருக்கும் மேலும் 300 பேரை அரசு கலை, அறிவியல் கல்லூரிகளில் பணியமர்த்த தமிழக அரசு முடிவு செய்திருப்பதாகவும், இதற்கான உத்தரவு ஒரிரு நாள்களில் அளிக்கப்பட உள்ளதாகவும் கல்வித் துறை வட்டாரங்கள் கூறுகின்றன.

பெரும் முறைகேட்டில் சிக்கிய இந்தப் பல்கலைக்கழகம் தமிழக அரசின் கட்டுப்பாட்டில் வந்த பிறகு, பல்வேறு சீர்திருத்தங்கள் எடுக்கப்பட்டு வருகின்றன.

இதையொட்டி, கடந்த மார்ச் மாதத்தில் கூடுதலாக இருந்த 370 உதவிப் பேராசிரியர்களை 3 ஆண்டுகள் ஒப்பந்த அடிப்படையில் அரசு கலை, அறிவியல் கல்லூரிகளுக்கு மாற்றம் செய்து தமிழக அரசு உத்தரவு பிறப்பித்தது.

இதில், பி.பி.ஏ. துறைக்கு மாற்றப்பட்டவர்கள் பலர் எம்.பி.ஏ. மட்டுமே முடித்தவர்கள் என்பதும் பேராசிரியர் தகுதிக்கான "செட்' அல்லது "நெட்' தேர்வுகளில் தேர்ச்சியோ அல்லது எம்.ஃபில்., பிஎச்.டி படிப்பை படிக்காதவர்கள் என்பதும் பலர் மூன்றாண்டு இளநிலை பட்டப் படிப்பை 6 ஆண்டுகள் படித்தவர்கள் என்பதும் தெரியவந்தது.

பணியில் சேர்க்கப்படாமல் புறக்கணிக்கப்பட்ட நிலையில், கல்லூரிக் கல்வி இயக்குநர் அலுவலகத்தின் அறிவுறுத்தல் காரணமாக, சேர்க்கப்பட்டனர். மேலும், உரிய தகுதியே இல்லாத 4 பேரை மட்டும் திருப்பி அனுப்பப்பட்டனர்.

மேலும் 300 பேர் மாற்றம்? இந்த நிலையில், கூடுதலாக இருக்கும் மேலும் 300 பேரை அரசு கலை, அறிவியல் கல்லூரிகளுக்கு மாற்ற தமிழக அரசு இப்போது முடிவு செய்துள்ளதாகக் கல்வித் துறை வட்டாரங்கள் கூறுகின்றன.

இதுகுறித்து அரசுக் கல்லூரி ஆசிரியர் கழக பொதுச் செயலாளர் தாமோதரன் கூறியது:-

அரசுக் கல்லூரிகளில் கல்வித் தரத்தை உயர்த்தும் வகையில் ஆசிரியர் தேர்வு வாரியம் (டிஆர்பி) மூலம் தகுதியான பேராசிரியர்கள் நியமிக்க வேண்டும்.

அரசுக் கல்லூரிகளின் கல்வித் தரம் பாதிக்கப்படும் என புகார்: ஆனால், அண்ணாமலைப் பல்கலைக்கழகத்திலிருந்து தகுதியற்ற 370 பேராசிரியர்கள் 3 ஆண்டுகள் ஒப்பந்த அடிப்படையில் ஏற்கெனவே பணியமர்த்தப்பட்டனர்.

இவர்களில் பெரும்பாலானோர் முறையான கல்வி பயிலாதவர்கள். சிலர் பல்கலைக்கழகத் தொலைநிலைக் கல்வி மையங்களில் தொடர்பு அலுவலர்களாகப் பணியில் இருந்தவர்கள்.

இதுபோன்ற தகுதியில்லாதவர்களை, மீண்டும் பல்கலைக்கழகத்துக்கே பணிமாற்றம் செய்ய வேண்டும் என்று வலியுறுத்திவருகிறோம்.

இந்த நிலையில்,மேலும் 300 பேரை அரசுக் கல்லூரிகளில் பணியமர்த்த அரசு முடிவு செய்திருப்பது, ஏழை மாணவர்கள் படிக்கும் அரசுக் கல்லூரியின் கல்வித் தரத்தை முற்றிலும் பாதிக்கும். எனவே, இந்த முயற்சியைக் கைவிட வேண்டும் என்றார்.
-
தினமணி