திருவனந்தபுரத்திலிருந்து புறப்பட்ட பயணிகள் விமானம் துபாயில் தரையிறங்கிய போது விபத்து: 300 பேர் உயிர் தப்பினர்

-

திருவனந்தபுரத்திலிருந்து துபாய் புறப்பட்ட எமிரேட்ஸ் விமானம் துபாயில் தரையிறங்கிய போது விபத்துக்குள்ளானது, ஆனல் 282 பயணிகளும், 18 பணியாளர்களும் பத்திரமாக மீட்கப்பட்டதாகவும் காயம் எதுவும் ஏற்படவில்லை என்றும் அதிகாரிகள் தரப்பில் கூறப்பட்டுள்ளது.

ஈ.கே.521 என்ற எமிரேட்ஸ் விமானம் துபாய் சர்வதேச விமான நிலையத்தில் தரையிறங்கிய போது விபத்துக்குள்ளானது. உள்ளூர் நேரம் 12.45 மணியளவில் இந்த விபத்து ஏற்பட்டுள்ளது.

அதாவது போயிங் 777 பயணிகள் விமானம் திருவனந்தபுரத்திலிருந்து காலை 10.19 மணிக்கு புறப்பட்டது. இது 12.50 மணிக்கு துபாயில் தரையிறங்க வேண்டும்.

282 பயணிகளில் 226 இந்தியர்கள், 24 பிரித்தானியர்கள், 11 எமிரகர்கள், அமெரிக்கா மற்றும் சவுதியைச் சேர்ந்த முறையே 6 பயணிகள் இதில் அடங்குவர் என்று விமான நிலைய அதிகாரிகள் தெரிவித்தனர்.

விமானம் ஓடுபாதையில் மோதித் தரையிறங்கியதன் காரணமாக தீப்பிடித்து பெரிய அளவில் கரும்புகை அப்பகுதியைச் சூழ்ந்த வீடியோ காட்சிகள் வெளியாகியுள்ளன. தீயணைப்புப் படையினர் உடனடியாகச் செயல்பட்டு தீயை அணைத்தனர். விமானத்தைச் சுற்றி மஞ்சள் நிற தீயணைப்பு வண்டிகள் குழுமியிருந்தன.

இந்த விபத்தையடுத்து போக்குவரத்து நெரிசல் மிகுந்த துபாய் சர்வதேச விமான நிலையத்தில் புறப்படும் விமானங்கள் தற்காலிகமாக நிறுத்தி வைக்கப்பட்டுள்ளன. சுமார் 8 மணி நேர தாமதம் ஏற்படும் என்று துபாய் விமான நிலைய அதிகாரிகள் தெரிவித்துள்ளனர்.

விபத்துக்கான காரணம் குறித்து இதுவரை தகவல்கள் இல்லை, விசாரணை செய்யப்பட்டு வருவதாக அதிகாரிகள் தெரிவித்தனர்.
-
தி இந்து