பழைய நோட்டுகளை மாற்றினால் விரலில் மை: மோடி அரசின் அடுத்த அதிரடி

அழியாத மை

தில்லியில் செய்தியாளர்களை செவ்வாய்க்கிழமை சந்தித்த மத்திய
அரசின் பொருளாதார விவகாரங்களுக்கான செயலாளர்
சக்திகாந்த தாஸ் கூறியதாவது:

சில வங்கிகள் பல நபர்கள் மீண்டும் மீண்டும் வந்து பழைய பணத்தை
மாற்றிச் செல்வதாகவும், ஒரே நபர் வெவ்வேறு வங்கிகளுக்குச் சென்று
பணத்தை மாற்றி வருவதாகவும் மத்திய அரசுக்கு தகவல் வந்துள்ளது.

கருப்புப் பணம் வைத்திருப்போர், குழுக்களாக நபர்களை நியமித்து
இந்த முறையில் தங்கள் கருப்புப் பணத்தை மாற்றி வருவதாகத்
தெரிகிறது. இதனைத் தடுக்கும் வகையில் பழைய நோட்டுகளுக்கு
புதிய நோட்டுகளை மாற்றும்போது பணத்தை மாற்றும் நபரின் விரலில்
அழிக்க முடியாத மையால் அடையாளம் இட முடிவு செய்யப்பட்டுள்ளது.

இதன் மூலம் ஒரே நபர் மீண்டும், மீண்டும் வெவ்வேறு வங்கிகளுக்குச்
சென்று பணத்தை மாற்றுவது தடுக்கப்படும்.
மை வைக்கும் திட்டத்தை எவ்வாறு நடைமுறைப்படுத்துவது என்ற
விதிகளை வங்கிகள் முடிவு செய்யும். உண்மையிலேயே பணம் தேவைப்
படும் மக்களுக்கு ரொக்கம் கிடைப்பதை உறுதி செய்யவும், கருப்புப்
பணம் மாற்றுவதைத் தடுக்கவுமே இந்த நடவடிக்கை எடுக்கப்பட்டுள்ளது.

வங்கிகளின் பண இருப்பு: பொதுமக்கள் யாரும் வேறு நபர்களின் பணத்தை
வாங்கி தங்கள் வங்கிக் கணக்கில் செலுத்தி கருப்புப் பணத்தை மாற்ற
உதவக் கூடாது என்று மீண்டும் ஒருமுறை கேட்டுக் கொள்கிறோம்.

பொதுமக்களுக்குத் தட்டுப்பாடு இன்றி வழங்குவதற்காக வங்கிகளுக்கு
போதுமான அளவு ரொக்கம் அனுப்பப்பட்டுள்ளது.

எனவே, பணம் கிடைக்காது என்று பொதுமக்கள் யாரும் பீதியடைய
வேண்டாம் என்றார் அவர்.
-
---------------------