கஷ்டம் : பர்வதவர்த்தினி

--
‘‘சிரமப்பட்ட காலத்தில் எங்கப்பா யார் யாரிடம் எவ்வளவு
கடன் வாங்கினார்னு உங்களுக்குத் தெரியுமா?’’ - சிவராம்
என்னிடம் கேட்டான்.

நண்பரின் மகன். பொறுப்பானவன். சின்ன வயசில்
கஷ்டத்தில் தவித்து இப்போது வெற்றி நடை போடுபவன்.
இப்போது வந்து ஏன் இப்படிக் கேட்கிறான்? யோசித்தேன்.

‘‘உன் அம்மாவைக் கேட்டுப் பாரேன்!’’ என்று தட்டிக்
கழிக்கப் பார்த்தேன்.

அவன் விடுவதாக இல்லை. பேச்சை மாற்றி, அவனையும்
கூட்டிக்கொண்டு ஹாலுக்கு வந்தேன். அங்கே அவனது
அம்மா, சத்தமாக என் மனைவியிடம் பேசிக் கொண்டிருந்தாள்.

‘‘அந்த நாளில் நாங்க கஷ்டப்பட்டபோது யாரிடமாவது
கடன், உதவி, யாசகம்னு கையை நீட்டி வாங்கி
இருப்போமா? குடும்ப மானத்தைக் காப்பாத்தி, என்
பிள்ளையை வளர்த்து, படிக்க வச்சு, இன்னைக்கு பெரிய
வேலைக்கும் அனுப்பிட்டோம்... உங்களுக்கே தெரியும்.
நீங்களே சொல்லுங்க அக்கா...’’

என் மனைவி என்னைப் பார்த்தாள். அவள் பார்வையில்
நிறைய அர்த்தம் இருந்தது. அவர்கள் கிளம்பிச் சென்றதும்
என் மனைவி என்னிடம் சொன்னாள்...

‘‘நல்லவேளை... உங்க ஃபிரண்ட் நம்மிடம் கடனா வாங்கின
பணத்தைப் பற்றி பையன் எதிரில் படார்னு
சொல்லிடுவீங்களோன்னு பயந்தேன். என் பார்வையைப்
புரிஞ்சுக்கிட்டு அமைதியா இருந்துட்டீங்க...

அவங்க ரகசியமாக அந்த பணத்தைத் திருப்பிக் கொடுத்துட்டுப்
போயிருக்காங்க.
இது பிள்ளைக்குத் தெரிஞ்சா, அவனுக்கு தாழ்வு மனப்பான்மை
வந்துடப் போறதேன்னு பயம். அதான் அப்படி பேசினாங்க!’’
-
---------------------------
குங்குமம்