பரபரப்பான அரசியல் சூழ்நிலையில் தமிழக சட்டப்பேரவை 8ம் தேதி கூடுகிறது?

பரபரப்பான அரசியல் சூழ்நிலையில் தமிழக சட்டப்பேரவை 8ம் தேதி கூடுகிறது?

சென்னை :
தமிழக சட்டப்பேரவை கூட்டம் ஒவ்வொரு ஆண்டு தொடக்கத்திலும்
கவர்னர் உரையுடன் கூடுவது மரபு. அதன்படி, 2018ம் ஆண்டின்
முதல் சட்டப்பேரவை கூட்டம் வருகிற 8ம் தேதி கூட வாய்ப்புள்ளதாக
கூறப்படுகிறது.

அன்றைய தினம் கவர்னர் பன்வாரிலால் புரோகித் உரை
நிகழ்த்துவார். ஆங்கிலத்தில் அச்சடிக்கப்பட்ட உரையை கவர்னர்
படித்து முடித்ததும், அதன் தமிழ் உரையை சட்டப்பேரவை தலைவர்
படிப்பார்.

அதைத்தொடர்ந்து அன்றைய கூட்டம் முடிவுக்கு வரும். தொடர்ந்து
பேரவைத் தலைவர் தனபால் தலைமையில் அலுவல் ஆய்வு குழு
கூட்டம் நடைபெறும். இதில் கவர்னர் உரையுடன் தொடங்கும்
சட்டப்பேரவை கூட்டத்தை எத்தனை நாள் நடத்துவது என்று
முடிவு செய்து அறிவிக்கப்படும்.

கவர்னர் உரையுடன் தொடங்கும் சட்டப்பேரவை கூட்டத்தொடர்
அதிகப்பட்சமாக 3 அல்லது 4 நாட்கள் நடைபெறலாம். கவர்னர்
உரை மீதான விவாதத்துக்கு நன்றி தெரிவித்து இறுதிநாள்
கூட்டத்தில் முதல்வர் எடப்பாடி பழனிச்சாமி பேசுவார்.

அதைத்தொடர்ந்து, பேரவை கூட்டம் ஒத்திவைக்கப்படும்.
தொடர்ந்து மார்ச் மாதம் 2018-19ம் ஆண்டுக்கான தமிழக அரசு
பட்ஜெட் தாக்கல் செய்யப்படும்.

கவர்னர் உரையுடன் தொடங்கும் சட்டமன்ற கூட்டத்தில் திமுக,
காங்கிரஸ் உள்ளிட்ட எதிர்க்கட்சிகள் பல்வேறு பிரச்னைகளை
கிளப்ப முடிவு செய்துள்ளன.

குறிப்பாக ஓகி புயல் பாதிப்பு, பாலிடெக்னிக் விரிவுரையாளர்
தேர்வில் நடந்த முறைகேடு, போக்குவரத்து, மின்வாரிய ஊழியர்
பிரச்னைகள் உள்ளிட்ட பல்வேறு மக்கள் பிரச்னைகளை எழுப்பி
பேசுவார்கள்.

இதனால் கவர்னர் உரையுடன் தொடங்கும் சட்டப்பேரவை
கூட்டத்தில் அனல் பறக்கும் விவாதங்களுக்கு பஞ்சம் இருக்காது.
அதேநேரத்தில் சுயேட்சை வேட்பாளர் டிடிவி தினகரனும் முதல்
முறையாக சட்டப்பேரவைக்குள் செல்கிறார்.

இதனால், அவரது வருகையும் பெரிய எதிர்பார்ப்பை ஏற்படுத்தியுள்ளது.
-
--------------------------------
தினகரன்