இந்தியாவை பாதித்த அமெரிக்க பங்குசந்தை வீழ்ச்சி: சென்செக்ஸ் 1200 புள்ளி சரிவு

மும்பை:
அமெரிக்க பங்கு சந்தையில் ஏற்பட்ட வீழ்ச்சி, உலக அளவில் கடும்
பாதிப்பை ஏற்படுத்தியது. இதன் தாக்கம் இந்திய பங்கு சந்தைகளிலும்
எதிரொலித்தது. சென்செக்ஸ் 1200 புள்ளிகளுக்கு அதிகமாகவும்,
நிப்டி 350 புள்ளிகளுக்கு அதிகமாகவும் சரிவுடன் ஆரம்பமாகின.

கடந்த இரு நாட்களாக இந்திய பங்குச்சந்தைகளிலும் சரிவு ஏற்பட்டு
வந்தது. இந்நிலையில், இன்று பங்கு சந்தைகள் மேலும் அதிகம் சரிந்தன.

இன்றைய வர்த்தகநேர துவக்கத்தில் (காலை 9.15மணி) மும்பை
பங்குச்சந்தையின் சென்செக்ஸ் 1240.45 புள்ளிகள் சரிந்து 33,516.71-
ஆகவும், தேசிய பங்குச்சந்தையின் நிப்டி 369.60 புள்ளிகள் சரிந்து
10,296.90-ஆகவும் வர்த்தகமாகின.

காரணம் என்ன?

கடந்த 2009-ம் ஆண்டுக்கு பிறகு அமெரிக்கர்களின் வருவாய் அதிகரித்து
உள்ளது. இதனால் பணவீக்கம் உயரும் சூழல் உருவாகி இருக்கிறது.
பணவீக்கத்தை கட்டுப்படுத்த, அமெரிக்காவின் பெடரல் வங்கி, தனது
வட்டி விகிதத்தை அதிகரிக்கப் போவதாக தகவல் வெளியானது.

இதையடுத்து, அமெரிக்க பங்குச்சந்தைகள் கடந்த 7 ஆண்டுகளில்
இல்லாத அளவுக்கு கடும் வீழ்ச்சி கண்டன. இதன் தாக்கம் உலக பங்குச்
சந்தைகளில் எதிரொலித்தது. குறிப்பாக ஆசியாவின் அநேக பங்குச்
சந்தைகள் சரிந்தன.

இதனால் முதலீட்டாளர்கள், அதிகளவில் பங்குகளை விற்க தொடங்கினர்.
இந்திய ரூபாயின் மதிப்பு வீழ்ச்சி அடைந்ததாலும் இன்றைய வர்த்தகம்
கடும் சரிவை சந்தித்து இருப்பதாக சந்தை வல்லுநர்கள் தெரிவித்துள்ளனர்.

ரூ.5.40 லட்சம் கோடி இழப்பு?

இந்திய பங்குச்சந்தைகள் இன்று கடும் வீழ்ச்சியை சந்தித்ததால்
சில நிமிடங்களில் ரூ.5.40 லட்சம் கோடி இழப்பு ஏற்பட்டதாக சந்தை
முதலீட்டாளர்கள் கவலை தெரிவித்துள்ளனர்.
-
--------------------------------------------
தினமலர்