மே மாதம் உள்ளாட்சித் தேர்தல் அறிவிப்பு: நீதிமன்றத்தில் தேர்தல் ஆணையம் உத்தரவாதம்

தமிழகத்தில் உள்ள உள்ளாட்சி அமைப்புகளுக்கான தேர்தல்
குறித்து வருகின்ற மே மாதம் இறுதி வாரத்தில் அறிவிப்பு
வெளியிடப்படும் என உயர்நீதிமன்றத்தில் மாநில தேர்தல்
ஆணையம் உத்தரவாதம் அளித்துள்ளது.

தமிழகத்தில் உள்ளாட்சித் தேர்தலை கடந்த 2017 ஆம்
ஆண்டு நவம்பர் 17 ஆம் தேதிக்குள் நடத்தி முடிக்கவும்
, அதுதொடர்பான அறிவிப்பாணையை 2017 ஆம் ஆண்டு
செப்டம்பர் 18 ஆம் தேதிக்குள் வெளியிடவும்
உயர்நீதிமன்றம் உத்தரவிட்டிருந்தது.

நீதிமன்ற உத்தரவை நிறைவேற்றத் தவறிய மாநில தேர்தல்
ஆணையர் எம்.மாலிக் பெஃரோஸ் கான் மற்றும் மாநில
தேர்தல் ஆணைய செயலாளர் டி.எஸ்.ராஜசேகர் மீது திமுக
அமைப்புச் செயலாளர் ஆர்.எஸ்.பாரதி சென்னை
உயர்நீதிமன்றத்தில் நீதிமன்ற அவமதிப்பு வழக்கு
தொடர்ந்தார்.

இந்த வழக்கு நீதிபதிகள் எம்.சத்தியநாராயணன்
மற்றும் பி.ராஜமாணிக்கம் ஆகியோர் அடங்கிய அமர்வு முன்
விசாரணைக்கு வந்தது.

அப்போது மாநில தேர்தல் ஆணையத்தின் சார்பில் ஆஜரான
வழக்குரைஞர்கள் ராஜா கார்த்திக், நெடுஞ்செழியன் ஆகியோர்,
உள்ளாட்சித் தேர்தலுக்கான வார்டு மறுவரையறை செய்யும்
பணிகள் நிறைவடைந்து விட்டது.

வரும் ஜனவரி 31-ஆம் தேதிக்குள் இடஒதுக்கீடு தொடர்பான
பணிகளும் முடிந்துவிடும்.பின்னர் இனசுழற்சி ஒதுக்கீடு
செய்யும் பணி மேற்கொள்ளப்படும். அதன் பின்னர் வாக்காளர்கள்
பட்டியல் வார்டு வாரியாக தயாரிக்கப்படும்.

இந்தப் பணிகள் அனைத்தும் நிறைவடைய மே மாதம் ஆகும்.
அந்த சமயத்தில் நாடாளுமன்றத் தேர்தல் நடைபெற உள்ளது.

நாடாளுமன்றத் தேர்தலுடன் உள்ளாட்சித் தேர்தலை நடத்த
மாநில தேர்தல் ஆணையம் விரும்பவில்லை.எனவே வருகின்ற
மே மாதம் இறுதி வாரத்தில் உள்ளாட்சித் தேர்தலுக்கான
அறிவிப்பு வெளியிடப்படும் என தெரிவித்தனர்.

இதனைப்பதிவு செய்து கொண்ட நீதிபதிகள், மாநில தேர்தல்
ஆணையர் எம்.மாலிக் பெஃரோஸ் கான் மற்றும் மாநில தேர்தல்
ஆணைய செயலாளர் டி.எஸ்.ராஜசேகர் ஆகியோர் நேரில்
ஆஜராவதிலிருந்து விலக்கு அளித்தனர்.

மேலும் உள்ளாட்சித் தேர்தல் நடத்துவது தொடர்பாக மாநில
தேர்தல் ஆணையம் தாக்கல் செய்துள்ள மனு தொடர்பாக
அடுத்த விசாரணையின்போது விளக்கம் அளிக்க உத்தரவிட்டு,
விசாரணையை வரும் ஜனவரி 28-ஆம் தேதிக்கு ஒத்திவைத்தனர்.
-
--------------------------------
தினமணி