வெள்ளெருக்கு செடி வீட்டில் வளர்க்கலாமா?

வணக்கம்!

(எச்சரிக்கை 1: இக்கட்டுரையை ஆரம்பம் முதல் நிறைவு வரை ஊன்றிப் படிக்கவும். எதையாவது விட்டுவிட்டீர்களேயானால் அடியேன் பொறுப்பு எடுத்துக்கொள்ளமுடியாது.)

இன்று நாம் பார்க்க இருப்பது ஓர் அற்புதமான செடி. வீட்டில் அத்தியாவசியம் வளர்க்க வேண்டிய செடிகளில் ஒன்று இது ஆகும்.

இந்தச்செடி வறண்ட பிரதேசத்திலும் வளரும். ஒரு ஆள் உயரத்திற்குக் கூட உயர்ந்து அடர்த்தியாக படர்ந்து வளரும். நிறைய கிளைகள் விட்டு நுனியில் கொத்துக் கொத்தாக மொட்டு விட்டு மலர்ந்து காய்க்கும். அடியிலை பழுத்து மஞ்சள் நிறமாக மாறி கீழே விழுந்து விடும். இச்செடியின் நுனி முதல் அடிவேர் வரை பால் போன்று நீரோட்டமிருக்கும். இந்தச் செடியின் எந்த பாகத்தை ஒடித்தாலும் பால் போல் வெளிப்படும். சில துளிகள் வெளி வந்தவுடன் தானே நின்று விடும்.

இந்தசெடி, துஷ்ட ஆவிகள் வீட்டிற்குள் நுழையாமல் தடுப்பதாகவும், பில்லி, சூனியம், செய்வினை போன்றவற்றை முடக்குவதாகவும் நம்புவதால், மேட்டூர் பகுதியை சேர்ந்த பெரும்பாலான மக்கள் வீட்டு முன் இச்செடியை வளர்க்கின்றனர். சென்னையில் கொளத்தூரின் சில பகுதிகளில் ஒவ்வொரு வீட்டிலும் இச்செடியை வளர்ப்பதை இன்றும்கூட நாம் பார்க்கலாம்.

இவ்வளவு சிறப்புகள் வாய்ந்த செடி எது தெரியுமா? அது வெள்ளெருக்கஞ்செடி ஆகும்.
எருக்கஞ்செடிகளில் நீலம், வெள்ளை, முத்து என பல்வேறு வகைகள் உள்ளது. இதில், வெள்ளை நிற பூக்கள் பூக்கும் எருக்கஞ்செடி வேரில் விநாயகர் சிலை செய்து பக்தர்கள் வழிபாடு செய்கின்றனர். மேலும், வெள்ளை எருக்கனில் லட்சுமி வாசம் செய்வதாகவும் நம்புகின்றனர்.

வெள்ளை எருக்கன் செடியை வீட்டின் முன்புறம் வளர்த்தால், வீட்டில் செல்வம் கொழிக்கும். வீட்டிற்குள் துஷ்ட ஆவிகள் நுழையாது. பில்லி, சூனியம், செய்வினை போன்றவற்றால் வீட்டில் வசிப்பவர்கள் பாதிக்காமல் தடுக்கும் என மக்கள் நம்புகின்றனர்.

புதையல், ரத்தினங்கள், சிலைகள், தங்கம் பதுக்கி வைத்திருக்கும் இடம் ஆகிய இடங்களில் மட்டுமே வெள்ளெருக்கு முளைக்கும் என விருட்ச நூல்களில் கூறப்பட்டுள்ளது. அரிதான பொருள்கள் இருக்கும் இடத்தில்தான் வெள்ளெருக்கு செடி முளைக்கும் என சங்க கால நூல்களில் குறிப்பிடப்பட்டுள்ளது. அதன்படி பார்த்தோமேயானால் வெள்ளெருக்கு இருக்கும் இடத்தில் தெய்வீக சக்தி இருக்கிறது என்று அர்த்தம்.

வெள்ளெருக்கு சிவனாருக்கு உகந்தது என்பர், வெள்ளெருக்கு செடி வீட்டின் முன் வைப்பது விஷேசம், அதன் வளர்ச்சி, வீட்டில் செல்வச் செழிப்பை ஏற்படுத்தும். இந்த செடியை தாண்டி பாம்புகள் வராது என்பதால், வீட்டு வாசலில் வெள்ளெருக்கு கட்டாயம் வளர்க்க வேண்டும் என்பது நம் முன்னோர்களின் நம்பிக்கையாக இருந்துள்ளது. பொதுவாக வெள்ளெருக்குச் செடிக்கு தனி சக்தி உண்டு. வெள்ளெருக்கை தேவ மூலிகை அல்லது தேவவிருக்ஷம் என்றும் கூறலாம்.

(எச்சரிக்கை 2: மேலே நீங்கள் படித்தது எதுவும் என்னுடைய கருத்து கிடையாது. இவை அனைத்தும் இண்டர்நெட், வாட்ஸ் ஆப், பேஸ்புக், யூட்யூப் போன்ற சமூக ஊடகங்களில் வரக்கூடிய செய்திகளாகும்.)

(எச்சரிக்கை 3: இனிமேல் வரக்கூடிய செய்திகள் அடியேனுடையது. ஆகையால் மிகக் கவனமாக படிக்கவேண்டியது உங்களுடைய தலையாய கடமையாகிறது.)

“ஐயா வணக்கம்! வெள்ளெருக்கஞ் செடி வீட்டில் வளர்க்கலாமா? கூடாதா?”

“கூடாது!”

“வீட்டில் வளர்க்கலாம் என இண்டர்நெட்டில் வெளியிடப்பட்டுள்ள செய்திகள் சொல்கிறதே!”

“இண்டர்நெட், வாட்ஸ் ஆப், பேஸ்புக், யூட்யூப் போன்ற சமூக ஊடகங்களில் வரக்கூடிய செய்திகளை, ஏதோ தேவவாக்கு போல நம்பி விடுவதால் நீங்கள் இப்படிக் கேட்கிறீர்கள் என நினைக்கிறேன்! அந்த ஊடகங்கள் தாங்கள் வெளியிடும் செய்திகளுக்கு உண்டான ஆதாரங்கள் எதையும் காட்டுவதில்லை. வெறுமனே இது ஐதீகம், நம்முடைய முன்னோர்களின் பழக்கவழக்கங்கள் எனச் சொல்லி முடித்துவிடுவார்கள்!”

நீங்கள் சொல்வது உண்மைதான் ஐயா! உங்களுடைய கருத்துக்கள்தான் எங்களுக்கு முக்கியம். ஏன் வளர்க்கக் கூடாது என நீங்கள் சொல்லுங்கள் ஐயா!

பாழடைந்த இடத்திற்கு அடையாளமாகச் சொல்லப்படுவது சில விஷயங்கள். குட்டிச்சுவர், கரையான் புற்று, கள்ளிச்செடிகள், முட்செடிகள், பாம்பு போன்ற விஷ ஜந்துக்கள் வாழ்வதுது போன்றவை. அதில் ஒன்றுதான் இந்த வெள்ளெருக்கஞ்செடியும்! என்ன நம்பிக்கை வரவில்லையா? பாட்டி பாடுவதைக் கேளுங்கள்!

வேதாளஞ் சேருமே வெள்ளெருக்குப் பூக்குமே
பாதாள மூலி படருமே-மூதேவி
சென்றிருந்து வாழ்வளே சேடன் குடிபுகுமே
மன்றோரஞ் சொன்னார் மனை.

இது நம்ம ஒளவைப்பாட்டி பாடியருளிய ‘நல்வழி’யில் வரும் பாடலாகும். இந்தப்பாடலின் பொருளைப் பார்ப்போமா?

நீதி மன்றத்தில் பொய்சாட்சி சொல்பவர்கள் வீட்டில், பேய் பிசாசு வந்து சேருமாம், வெள்ளெருக்கம்பூ செடிகள் முளைத்து படர்ந்து மலர்விட்டு கொழிக்குமாம், துர் தேவதையாக அறியப்படும் மூதேவி வந்து வாழ்வாளாம், விஷ ஜந்தான பாம்பு வந்து குடி புகுந்து விடுமாம். இப்படி பல தண்டனைகள் நிகழுமாம்.

பாழடைந்த இடங்களில் வளரும் செடியை, வீட்டில் வளர்த்து, வாழுகின்ற வீட்டைப் பாழாக்கலாமா? சிந்திக்கவும்!