மதுக்கடைகளை உடனே திறக்க வேண்டும் - 10 மாநில முதல்வர்களுக்கு மதுபான தயாரிப்பாளர் கூட்டமைப்பு கடிதம்

புதுடில்லி :
'மதுக்கடைகளை உடனடியாக திறக்காவிட்டால், கள்ளச்சாராய விற்பனை அதிகரித்து, மாநில அரசுகளுக்கு பெரும் வருவாய் இழப்பு ஏற்படும்.'எனவே, மதுக்கடைகளை உடனடியாக திறக்க அனுமதி வேண்டும்' என, கர்நாடகா உள்ளிட்ட, 10 மாநிலங்களின் முதல்வர்களுக்கு, மதுபான தயாரிப்பாளர் கூட்டமைப்பு கடிதம் எழுதியுள்ளது.

கொரோனா வைரஸ் தடுப்பு நடவடிக்கை காரணமாக, நாடு முழுதும் மதுக்கடைகள், 'பார்'கள் அடைக்கப்பட்டுள்ளன. இதனால், மது பழக்கத்துக்கு அடிமையானவர்கள் கடும் மன உளைச்சலுக்கு ஆளாகி உள்ளதாகவும், கள்ளச்சாராயம் உள்ளிட்டவற்றை குடிப்பதாகவும் தகவல் வெளியாகி வருகிறது. இந்நிலையில், இந்திய மதுபான தயாரிப்பு நிறுவனங்கள் கூட்டமைப்பு சார்பில், டில்லி, ஹரியானா, கர்நாடகா, மத்திய பிரதேசம், மஹாராஷ்டிரா, பஞ்சாப், ராஜஸ்தான், தெலுங்கானா, உத்தர பிரதேசம், மேற்கு வங்கம் ஆகிய மாநிலங்களின் முதல்வர்களுக்கு கடிதம் எழுதப்பட்டுள்ளது.

அந்த கடிதத்தில் கூறப்பட்டுள்ளதாவது:கொரோனா வைரஸ் பிரச்னை காரணமாக, நாடு முழுதும் மதுக்கடைகள், பார்கள் அடைக்கப்பட்டுள்ளன. இதனால், கள்ளச்சாராயம் உள்ளிட்ட சட்டவிரோத மது விற்பனையில் பலரும் ஈடுபட்டுள்ளனர். இதை குடிப்போரின் உயிருக்கு ஆபத்து உள்ளது. மேலும், இதனால், மாநிலங்களுக்கு பெருமளவு வருவாய் இழப்பும் ஏற்படும். மதுபான விற்பனை வாயிலாகத் தான், மாநில அரசுகளுக்கு அதிக வருவாய் கிடைக்கிறது. எனவே, மதுக்கடைகளை உடனடியாக திறக்க அனுமதி வேண்டும்.

சமூக விலகலை பின்பற்றும் வகையில், பார்களை அடைப்பதில் தவறு எதுவும் இல்லை. அதேபோல், மதுபான விற்பனைக்கான உரிமத்தை, ஒரு சில மாதங்களுக்கு நீட்டித்தும் உத்தரவிட வேண்டும். இவ்வாறு, அந்த கடிதத்தில் கூறப்பட்டுள்ளது. மதுபான நிறுவனங்கள் சார்பில், 10 மாநிலங்களின் முதல்வர்களுக்கு கடிதம் எழுதப்பட்டிருந்தாலும், அந்த பட்டியலில் தமிழகம் இடம் பெறவில்லை. தமிழக முதல்வருக்கு, மதுபான நிறுவனங்களிடம் இருந்து கடிதம் எதுவும் அனுப்பப்படவில்லை என்பது குறிப்பிடத்தக்கது.

தினமலர்