நீட் தேர்வு தேதி அறிவிப்பு : இன்று முதல் விண்ணப்பிக்கலாம்.!

நாடுமுழுவதும் இளங்கலை மருத்துவ படிப்புக்கான நீட் தேர்வு வரும் செப்டம்பர் 12ஆம் தேதி நடைபெறும் என்று அறிவிக்கப்பட்டுள்ளது.

நாடு முழுவதும் எம்பிபிஎஸ், பிடிஎஸ், சித்தா, ஆயுர்வேதா,
யுனானி ஹோமியோபதி உள்ளிட்ட இளநிலை மருத்துவ
படிப்புகளுக்கு நீட் தேர்வு மூலம் மாணவர் சேர்க்கை
நடைபெற்று வருகிறது.

ஆண்டுதோறும் மே மாதத்தில் இந்த தேர்வு நடைபெறும்.
ஆனால் கொரோனா காரணமாக கடந்த ஆண்டு
செப்டம்பர் 13ஆம் தேதி தேர்வு நடத்தப்பட்டது.

இந்த ஆண்டில் கொரோனா பரவல் காரணமாக
சிபிஎஸ்இ 10 மற்றும் 12ம் வகுப்பு பொதுத்தேர்வுகள்
ரத்து செய்யப்பட்டன. இதனையடுத்து பல்வேறு
மாநிலங்களில் 10 மற்றும் 12ஆம் வகுப்பு பொதுத்தேர்வு
ரத்து செய்தன.

இதனால் இந்த ஆண்டு நீட் தேர்வு நடைபெறுமா என்ற
கேள்வி எழுந்தது மேலும் கொரோனா வைரஸின்
மூன்றாம் அலை வர வாய்ப்பு இருப்பதாக கூறப்படுவதால்
தேர்வும் தள்ளிவைக்க அள்ளது ரத்து செய்யப்பட
வாய்ப்புள்ளதாக கருதப்பட்டது.

இந்நிலையில் மத்திய கல்வி அமைச்சர்
தர்மேந்திர பிரதான் நீட் தேர்வு வரும் செப்டம்பர் 12ம்
தேதி நடைபெறும் என்று அறிவித்துள்ளார்.

இதுகுறித்து மத்திய கல்வி அமைச்சர் தர்மேந்திர பிரதான்
வெளியிட்டுள்ள அறிவிப்பில் நாடு முழுவதும் வரும்
செப்டம்பர் 12ஆம் தேதி நீட் தேர்வு நடைபெறும் என்றும்
நீட் தேர்வுக்கு இன்று மாலை 5 மணி முதல் தேசிய தேர்வு
முகமை இணையத்தில் மாணவர்கள் விண்ணப்பிக்கலாம்
என்று தெரிவிக்கப்பட்டுள்ளது.

மேலும் கொரோனா காலத்தை கருத்தில் கொண்டு சமூக
இடைவெளியை உறுதி செய்வதற்காக தேர்வு நடத்தப்படும்
நகரங்களின் எண்ணிக்கை 155 முதல் 198 ஆக
உயர்த்தப்பட்டுள்ளது என்றும் தேர்வு மையங்களும்
அதிகரிக்கப்படும் என்று அறிவிக்கப்பட்டுள்ளது.

மேலும் அனைத்து தேர்வு மையங்களிலும் மாணவர்களுக்கு
முக கவசம் கொடுக்கப்பட்டு தேர்வு மையங்கள்
கிருமிநாசினி கொண்டு சுத்தம் செய்யப்பட்டு நெறிமுறைகள்
பின் பற்றுவது உறுதி செய்யப்படும் என்றும்
தெரிவிக்கப்பட்டுள்ளது

குமுதம்