ஐ.ஏ.எஸ்.,ஆக 3 விஷயங்கள்அவசியம்!

-
சிவகங்கை மாவட்டம் சிங்கம்புணரியில் பிறந்து, தந்தையின் பணி
காரணமாக சென்னைக்கு குடிபெயர்ந்து, இங்குள்ள அரசு பள்ளியில்
படித்து, ஐ.ஏ.எஸ்., அதிகாரியான வெற்றிச்செல்வி:

என் அப்பா, தன் சிறு வயதில் நடந்த ஒரு சம்பவம் பற்றி அடிக்கடி
கூறுவார்... அதாவது, இளமைக் காலத்தில், அவரது ஊரில் ஒரு முறை
வெள்ளம் வந்த போது, அங்கு வந்த அதிகாரிகளில் ஒரு பெண் ஐ.ஏ.எஸ்.,
அதிகாரி, சிறப்பாக செயல்பட்டது குறித்து, பல முறை
பெருமையாகவும், ரசித்தும் கூறியிருக்கிறார்.

அந்தப் பெண் அதிகாரியின் தைரியம், கம்பீரம், வெள்ளப் பாதிப்பை
சரி செய்ய அவர் எடுத்த நடவடிக்கைகளை எல்லாம், 'சூப்பர் உமன்'
கதை போல, அவர் சொல்லச் சொல்ல, நானும் அப்படி ஒரு கலெக்டராக
வேண்டும்.மக்களுக்கு நல்லது செய்ய வேண்டும் என்ற எண்ணம், என்
மனதில் ஆழமாக விழுந்தது; பெற்றோர் ஊக்கப்படுத்த,அந்தப்
பயணத்தை ஆரம்பித்தேன்

யு.பி.எஸ்.சி., தேர்வில், என் இரண்டாவது முயற்சியில், வெற்றி பெற்றேன்.
முதல் முயற்சியில் நேர்காணல் வரை சென்று, ௨௦ மதிப்பெண்ணில் தவற
விட்டேன்; அடுத்த முயற்சியில் இந்திய அளவில், 144 வது, 'ரேங்க்' கிடைத்தது.

தற்போது, ஆந்திர மாநிலத்தில் பள்ளிக்கல்வித் துறையில், மாநில கல்வி
இயக்குனர் பொறுப்பில் உள்ளேன். தவிர, அரசு பள்ளிகளில் ஆங்கில வழிக்
கல்வியை மேம்படுத்துவதற்கான சிறப்பு அதிகாரியாகவும் நியமித்துஉள்ளனர்.

கல்வியே ஒரு தலைமுறையை மாற்றக்கூடிய மிகப்பெரிய ஆயுதம் என
நம்புகிறேன்.கொரோனா பெருந்தொற்று துவங்கிய காலத்தில் தான், கல்வித்
துறை மாநில இயக்குனராக நியமிக்கப்பட்டேன். அப்போது, எனக்கு இருந்த
பெரிய பொறுப்பு, பாடப் புத்தகங்களை புதிதாக மேம்படுத்துவது.

அத்துடன், இருமொழி பாடப் புத்தகத்தையும் அறிமுகம் செய்ய வேண்டும்.
அதாவது, புத்தகத்தின் ஒரு பக்கத்தில் பாடம் தெலுங்கில் இருக்கும்; அடுத்த
பக்கம் ஆங்கிலத்தில் இருக்கும்.ஒன்று முதல் ஏழாம் வகுப்பு வரை கிட்டத்தட்ட
100 பாடப் புத்தகங்களை புதிய தகவல்களுடன் மேம்படுத்த வேண்டிய சூழல்.

'கோவிட் - 19' தொற்றுக் காலத்தில் இவற்றை செய்வது இரண்டு மடங்கு
சவாலாக இருந்தது.ஐ.ஏ.எஸ்., ஆக மூன்று விஷயங்கள் அவசியம்...
கடின உழைப்பு, முயற்சியில் நேர்மை, அர்ப்பணிப்பு. இதில், சமரசமே
கூடாது.-

-தினமலர்