மீன் வரத்து அதிகரிப்பு: குலுங்கியது காசிமேடு

காசிமேடு:
காசிமேடில் சிறிய மீன்களின் வரத்து அதிகரித்ததால், இரண்டு
மாதங்களுக்குப் பின், மீன் விலை குறைந்தது. இதனால்,
அசைவ பிரியர்கள் மகிழ்ச்சி அடைந்தனர்.

தமிழகத்தில் ஏப்ரல் 15ம் தேதி முதல் ஜூன் 14ம் தேதி வரை
61 நாட்கள் மீன்பிடி தடைக்காலம் அமலில் இருந்தது.இதனால்
திருவள்ளூர் மாவட்டம், ஆரம்பாக்கம் துவங்கி கன்னியாகுமரி
வரை உள்ள விசைப்படகு மீனவர்கள், கடலுக்குள் மீன் பிடிக்கச்
செல்லவில்லை.

இந் நேரங்களில், நாட்டு படகுகள், பைபர் படகுகள், கட்டுமரங்கள்
வாயிலாக மீன்பிடி தொழில் நடந்தது. அதனால் மீன் வரத்து
குறைந்து, விலையும் உயர்ந்து காணப்பட்டது.

இதையடுத்து காசிமேடிற்கு கேரளா, கர்நாடகா, கோவா,
மகாராஷ்டிரா, ஆந்திரா உள்ளிட்ட வெளி மாநிலங்களில் இருந்தும்
மீன்கள் விற்பனைக்கு வந்தன.

தமிழகத்தில் மீன்பிடி தடைக்காலம், கடந்த 14ம் தேதி நிறைவு
பெற்றதையடுத்து, அன்று இரவு முதல், மீனவர்கள் கடலில்
மீன்பிடிக்கச் சென்றனர்.
இந்நிலையில்,
ஞாயிற்றுக்கிழமையான நேற்று, காசிமேடில் மீன்களை வாங்க
மக்கள் கூட்டம் அலைமோதியது.மீன் பிடிக்கச் சென்ற 100க்கும்
மேற்பட்ட படகுகள், நேற்று கரை திரும்பின.

ஆனாலும், வஞ்சிரம், பாறை, வவ்வால் உள்ளிட்ட பெரிய வகை
மீன்கள் கிடைக்கவில்லை. இதனால் மீன் வாங்க வந்தோர் ஏமாற்றம்
அடைந்தனர்.

சங்கரா, நெத்திலி, கிழங்கா, வெள்ளை ஊடான், கவலை மீன்,
காரப்பொடி, நவர உள்ளிட்ட சிறிய மீன்களின் வரத்து அதிகரித்து
காணப்பட்டது.இரு மாதங்களாக மீன் விலை உயர்ந்து காணப் பட்ட
நிலையில், தற்போது இரு மாதங்களுக்கு பிறகு மீன்களின் வரத்து
அதிகரித்துள்ளதால், விலை குறைந்தது.
இதனால், அசைவ பிரியர்கள் மகிழ்ச்சி அடைந்தனர்.

அடுத்த வாரத்தில் பெரிய மீன் கிடைக்கும்

இதுகுறித்து மீனவர்கள் கூறுகையில், 'மீன்பிடி தடைக்காலம் முடிந்து
ஆழ்கடலில் மீன் பிடிக்கச் சென்ற மீனவர்கள், 20 நாட்கள் முதல்
30 நாட்கள் கழித்து கரை திரும்புவர்.ஜூன் 14ம் தேதி, ஆழ்கடலுக்கு
மீனவர்கள் மீன்பிடிக்க சென்ற நிலையில், அடுத்த வாரம் அல்லது
அதற்கடுத்த வாரமே கரை திரும்பினர்.

அப்போது, அதிக அளவில் பெரிய மீன்களின் வரத்து இருக்கும் என
எதிர்பார்க்கப்படுகிறது' என்றனர்.