இஸ்ரேல்-பாலஸ்தீனம் மோதல்

ரமலான் மாதம் தொடங்கியதுமே ஜெருசலேமில் மோதல் வெடித்தது. கடந்த மார்ச் 25 அன்று மசூதிக்குள் வழிபாட்டில் ஈடுபட்டிருந்த இஸ்லாமியர்களை வலுக்கட்டாயமாக வெளியேற்றியது இஸ்ரேல் காவல்துறை.

நீண்ட நெடுங்காலமாகத் தொடரும் பிரச்னைகளில் ஒன்று இஸ்ரேல்-பாலஸ்தீன மோதல். இனத்தாலும் மதத்தாலும் வேறுபட்ட யூதர்களுக்கும், இஸ்லாமியர்களுக்கும் இடையிலான இந்தப் பிரச்னைக்கு நாட்டைப் பிரிப்பதே தீர்வு என்று பலமுறை சொல்லப்பட்டாலும், இதுவரை பாலஸ்தீனம் தனிநாடாக அங்கீகரிக்கப்படவில்லை. இருப்பினும், பாலஸ்தீனத்தை மீட்டெடுத்து, தனி நாடாக்கும் முயற்சியின் ஒரு பகுதியாக, `ஹமாஸ் படை’ இஸ்ரேல் ராணுவத்தோடு மோதிவருகிறது.

1967-ம் ஆண்டு நடந்த போரில் கிழக்கு ஜெருசலேமைக் கைப்பற்றிய இஸ்ரேல், அதைத் தங்களது தலைநகராகவும் அறிவித்தது. இதற்கு, எதிர்ப்பு தெரிவித்த பாலஸ்தீனியர்கள், `பாலஸ்தீனம் தனி நாடானதும் ஜெருசலேம்தான் எங்கள் தலைநகர்’ என்று சொன்னார்கள். கிழக்கு ஜெருசலேமில் அமைந்திருக்கும் அல் அக்சா மசூதிதான் மெக்கா, மதீனாவுக்குப் பிறகு இஸ்லாமியர்களின் மூன்றாவது பெரிய புனிதத்தலம். அதே மசூதியைச் சுற்றியிருக்கும் `வெஸ்ட் வால்’ என்ற சுவரை `டெம்பிள் மவுன்ட்’ என்று அழைத்து புனிதத்தலமாகக் கருதுகிறார்கள் யூதர்கள். எனவே, இரு தரப்பினரும் அல் அக்சா மசூதி வளாகத்துக்கு வருவதால் அடிக்கடி மோதல்கள் வெடிக்கும்.

இந்த நிலையில், ரமலான் மாதம் தொடங்கியதுமே ஜெருசலேமில் மோதல் வெடித்தது. கடந்த மார்ச் 25 அன்று மசூதிக்குள் வழிபாட்டில் ஈடுபட்டிருந்த இஸ்லாமியர்களை வலுக்கட்டாயமாக வெளியேற்றியது இஸ்ரேல் காவல்துறை. `அடுத்த நாள் காலையில் யூதர்கள் தங்களது புனிதத்தலத்துக்கு வரவிருந்தனர். அவர்களைத் தாக்குவதற்கு அங்கிருந்த இஸ்லாமியர்கள் திட்டமிட்டிருந்ததால்தான் நாங்கள் அவர்களை வெளியேற்றினோம்’ என்றது இஸ்ரேல் அரசு. ஏப்ரல் 4-ம் தேதி துப்பாக்கியுடன் மசூதிக்குள் நுழைந்த இஸ்ரேல் படையினர், இஸ்லாமியர்களை மீண்டும் அங்கிருந்து வெளியேற்ற முயன்றனர். இதனால், இரு தரப்புக்கும் மோதல் வெடிக்க, 300-க்கும் மேற்பட்ட பாலஸ்தீனியர்களைக் கைதுசெய்தது இஸ்ரேல் காவல்துறை.

இதற்கு பதிலடி கொடுக்க நினைத்த ஹமாஸ் படையினர், இஸ்ரேலை நோக்கி ராக்கெட் தாக்குதல் நடத்த, அந்த ராக்கெட்டை வானிலேயே சுட்டு வீழ்த்தியது இஸ்ரேல் விமானப்படை. மேலும், ஹமாஸ் ஆயுதக் கிடங்கின் மீதும் விமானப்படை தாக்குதல் நடத்தியது. இதனால், அங்கு மீண்டும் போர்ச்சூழல் உருவாகியிருக்கிறது. மறுபுறம், `பாலஸ்தீனியர்கள் பயங்கரவாத குற்றச்சாட்டில் தண்டிக்கப்பட்டால், அவர்களுடைய குடும்பத்தினரின் குடியுரிமை ரத்துசெய்யப்படுவதோடு, வீடுகளும் புல்டோசர் கொண்டு இடிக்கப்படும்’ என்ற தண்டனையை நடைமுறைப்படுத்த முயன்றுவருகிறார் இஸ்ரேல் பிரதமர் பெஞ்சமின் நெதன்யாஹு. இதனால், இஸ்ரேல்-பாலஸ்தீன மோதல் அடுத்தகட்டத்துக்குச் செல்லும் அபாயம் ஏற்பட்டிருக்கிறது.

மதமும் அரசியலும் ஒன்று சேர்ந்தால் நாடு நாசமாகும் என்பதற்கு இந்த மோதல்களே சாட்சி!

“மதமும் அரசியலும் ஒன்று சேர்ந்தால் நாடு நாசமாகும்” - இப்போதைய தேவை இந்த நீதிதான்!