நழுவுகிறாரா சரத் பவார்? - குழப்பத்தில் I.N.D.I.A கூட்டணி

பிரதமர் மோடிக்கான பாராட்டு விழா மேடையில் ஒன்றாகப் பங்கேற்று, I.N.D.I.A கூட்டணிக்கு எனிமா கொடுத்திருக்கிறார் தேசியவாத காங்கிரஸ் கட்சித் தலைவர் சரத் பவார்!

மகாராஷ்டிரா மாநிலம், புனேயில் பிரதமர் மோடிக்கு ‘திலகர் விருது’ வழங்கும் விழாவில் சரத் பவார் கலந்துகொண்டதே சர்ச்சையின் மையம். `எதிர்க்கட்சித் தலைவர்களை ஒன்றுபடவைத்ததிலும், ‘I.N.D.I.A கூட்டணி’யை உருவாக்கியதிலும் முன்னின்று செயல்பட்ட சரத்பவாரா இப்படி நடந்து கொள்கிறார்?’ என்று ஜீரணிக்க இயலாமல் முணுமுணுக்கின்றனர் எதிர்க்கட்சியினர்.

இது குறித்து நம்மிடம் பேசிய காங்கிரஸ் கட்சியின் மகாராஷ்டிரா துணைத் தலைவர் மோகன் ஜோஷி, ‘‘நிகழ்ச்சி நடைபெறுவதற்கு இரண்டு நாள்களுக்கு முன்பிருந்தே, ‘மோடியின் நிகழ்ச்சியில் பங்கேற்க வேண்டாம்’ என்று கோரிக்கைவைப்பதற்காக காங்கிரஸ், தேசியவாத காங்கிரஸ், ஆம் ஆத்மி கட்சி, சிவசேனா (உத்தவ்), மார்க்சிஸ்ட் கம்யூனிஸ்ட் கட்சித் தலைவர்கள் சரத் பவாரைச் சந்திக்க அனுமதி கேட்டோம். ஆனால், அனுமதி கொடுக்கவே இல்லை’’ என்றார் ஆதங்கத்துடன்.

உத்தவ் தாக்கரே தலைமையிலான சிவசேனாவும் சரத்பவாரின் செயலால் மிகவும் அதிருப்தியடைந்திருக்கிறது. இது குறித்து அந்தக் கட்சியின் எம்.பி-யான பிரியங்கா சதுர்வேதி நம்மிடம் பேசியபோது, ‘‘சிவசேனா, தேசியவாத காங்கிரஸ் கட்சிகளை உடைத்த மோடிக்கு ஏன் சரத் பவார் மரியாதை கொடுக்கிறார் என்ற குழப்பத்தைத் தெளிவுபடுத்த வேண்டும். தேசியவாத காங்கிரஸ் கட்சியை உடைத்ததோடு, அந்தக் கட்சியை `ஊழல் கட்சி’ என்றும் மோடி விமர்சித்திருக்கிறார். மோடியின் கூட்டத்தில் பங்கேற்பதன் மூலம் சரத் பவார் தனது புகழை, தானே கெடுத்துக் கொள்வதாகத்தான் அர்த்தமாகும்’’ என்றார் காட்டமாக.

சிவசேனாவின் கட்சிப் பத்திரிகையான ‘சாம்னா’விலும் சரத் பவார் குறித்துக் கடுமையாக விமர்சனம் செய்யப்பட்டிருக்கிறது. தேசியவாத காங்கிரஸ் கட்சிக்குள்ளேயே வித்யா சவான் போன்ற தலைவர்கள், சரத் பவாரிடம் ‘மோடி விழாவில் பங்கேற்க வேண்டாம்’ என்று தனிப்பட்ட முறையில் கேட்டுக்கொண்டதாக அந்தக் கட்சி வட்டாரங்கள் தெரிவிக்கின்றன.

இந்த விவகாரம் குறித்துப் பேசும் அரசியல் விமர்சகர்கள், ‘‘சரத் பவார் குழப்பத்தில் இருக்கிறார். கடந்த 2019-ம் ஆண்டே பா.ஜ.க-வுடன் சேர்ந்து மகாராஷ்டிராவில் கூட்டணி ஆட்சி அமைக்கத் திட்டமிட்டார். அது முடியாமல் போய்விட்டாலும் பா.ஜ.க-வுடன் இன்னமும் தொடர்பில் இருந்துகொண்டுதான் இருக்கிறார்’’ என்கின்றனர்.

சரத் பவார் பிரதமர் மோடியின் நிகழ்ச்சியில் பங்கேற்றது குறித்து அந்தக் கட்சியின் செய்தித் தொடர்பாளர் கிளைட் காஸ்ட்ரோவிடம் கேட்டோம். “விழா அமைப்பாளர்களுக்குக் கொடுத்த வாக்குறுதியை நிறைவேற்றவும், லோக்மான்ய திலகர் மீதான மரியாதை காரணமாகவுமே எங்கள் தலைவர் அந்த விழாவில் கலந்துகொண்டார். எனவே, அந்த மேடையில் எங்கள் கட்சி உடையக் காரணமாக இருந்தவர்களைப் பற்றி அவர் கவலைப்படவில்லை” என்றார்.