சிங்கப்பூர் எதிர்க்கட்சித் தலைவரான யாழ்ப்பாணத்தைச் சேர்ந்த ஜே.பி.ஜெயரட்னம் காலமானார்

சிங்கப்பூரின் பிரபல மாற்றரசுக் கட்சித் தலைவர் ஜே.பி. ஜெயரத்தினம் இன்று அதிகாலை மாரடைப்பில் காலமானார். அவருக்கு வயது 82.

ஜெயரத்தினத்தின் புதல்வர் கென்னத் அச்செய்தியை உறுதிப்படுத்தியதாக சிங்கப்பூரிலிருந்து செயல்படும் சேனல் நியுஸ் ஆசியா கூறியது.

தொழிலாளர் கட்சியின் முன்னாள் தலைமைச் செயலாளரான தம் தந்தை, இன்று அதிகாலை மணி 1.30 அளவில் மூச்சு விடுவதற்கு சிரமப்பட்டார் என்று கென்னத் கூறினார்.

உடனே மருத்துவமனைக்குக் கொண்டு செல்லப்பட்டதாகவும் ஆனால் மருத்துவர்களால் அவரைக் குணப்படுத்த இயலவில்லை என்றும் அவர் சொன்னார்.

சிங்கப்பூர் நாடாளுமன்றத்தில், ஆளும் மக்கள் செயல் கட்சி (பிஏபி) அனுபவித்து வந்த ஏகபோகத்தை 1981 இல் உடைத்தெறிந்தவர் ஜோசுவா பெஞ்சமின் ஜெயரத்தினம்.

தொழிலாளர் கட்சியை அத்தீவின் முன்னணி மாற்றரசுக் கட்சியாக வளர்த்த பெருமைக்குரியவர் அவர்.

2001 இல், அவதூறு வழக்குகளில் பிஏபி கட்சி உறுப்பினர்களுக்கு இழப்பீடுகள் வழங்கத் தவறியதற்காக அவர் திவாலாகிப் போனதாக அறிவிக்கப்பட்டு அதன் விளைவாக நாடாளுமன்ற இடத்தை இழந்தார்.

வழக்குரைஞரான ஜெயரத்தினம், அவதூறு வழக்குகள் அரசியல் நோக்கம் கொண்டவை என்றும் தம்மை நாடாளுமன்றத்தைவிட்டுத் தூக்குவதற்காக போடப்பட்டவை என்றும் கூறிவந்தார்.

திவாலானதன் விளைவாக அவர் தேர்தலில் போட்டியிட தடை விதிக்கப்பட்டதுடன் வழக்குரைஞர் தொழிலும் செய்ய முடியாமல் போய்விட்டது.

1971 இலிருந்து வழிநடத்தி வந்த ஊழியர் கட்சியிலிருந்து 2001 அக்டோபரில் ஜெயரத்தினம் வெளியேறினார்.

2008 இல் அவர் திவாலானவர் என்ற நிலை ரத்துச் செய்யப்பட்டதும் ஜூலை மாதம் சீர்திருத்தக் கட்சி என்ற ஒன்றை அவர் தொடக்கினார்.

‘த ஹெட்சட் மேன் அப் சிங்கப்பூர்’ (The Hatchet Man of Singapore) என்று ஜெயரத்தினம் ஒரு நூல் எழுதியுள்ளார். அந்நூலில், சிங்கப்பூரின் தலைவரும் முன்னாள் பிரதமருமான லீ குவான் இயு, ஜெயரத்தினம் உள்ளிட்ட எதிரணித் தலைவர்களை ஒழித்துக்கட்ட மேற்கொண்ட முயற்சிகளை விவரித்துள்ளார்.