ஆஸி.,யை வீழ்த்த வியூகம் 'ரெடி!': கிறிஸ்டன் அதிரடி

பெங்களூரு: ""டெஸ்ட் தொடரில் ஆஸ்திரேலியாவை வீழ்த்த சரியான திட்டம் வகுத்துள்ளோம். அவர்களின் பலம், பலவீனத்தை அறிவோம்,''என்கிறார் இந்திய அணியின் பயிற்சியாளர் கிறிஸ்டன்.இந்தியா வந்துள்ள ஆஸ்திரேலிய அணி நான்கு போட்டிகள் கொண்ட டெஸ்ட் தொடரில் விளையாடுகிறது. முதல் டெஸ்ட் அடுத்த மாதம் 9ம் தேதி பெங்களூருவில் துவங்குகிறது. இதில் பங்கேற்கும் இந்திய வீரர்களுக்கான ஐந்து நாள் பெங்களூரு பயிற்சி முகாம் நேற்றுடன் முடிவடைந்தது. டெஸ்ட் தொடரில் ஆஸ்திரேலியாவை வீழ்த்த தயாராக இருக்கிறோம் என இந்திய பயிற்சியாளர் கிறிஸ்டன் தெரிவித்துள்ளார்.


இது குறித்து அவர் அளித்த பேட்டி:வீரர்களின் பயிற்சி முழு திருப்தி அளிக்கிறது. அவர்கள் 100 சதவீதஈடுபாடுடன் பயிற்சி மேற்கொண்டனர். ஆஸ்திரேலியா போன்ற வலிமையான அணியை எதிர்கொள்ளும் போது வீரர்கள் அனைவரும் ஒன்றாக இணைந்து விளையாட வேண்டும். கூட்டு முயற்சி தான் வெற்றியை கொடுக்கும் என்பதால் ஓர் அணியாக போட்டிகளில் கவனம் செலுத்த கடும் பயிற்சி மேற்கொண்டுள் ளோம். பயிற்சியாளர் பதவிக்கு வந்த பின் இப்போது தான் முதன் முறையாக இந்திய அணியினருடன் அதிக நேரம் செலவழிக்க முடிந்தது. இரு அணிகளும் சமபலத்துடன் இருப்பதால் நெருக்கடி அதிகரித்துள்ளது.


மறுக்க முடியாது: இதை எந்த அணி நிதானமாக எதிர்கொள்கிறதோ அவர்களுக்கே வெற்றி வாய்ப்பு அதிகம். இந்திய தொடர் என்பதால் ஆஸ்திரேலியர்கள் நிச்சயம் நன்றாக பயிற்சி செய்திருப்பார்கள். இந்தியா, ஆஸ்திரேலிய அணிகள் மோதிய கடைசி 20 போட்டிகளை எடுத்துக் கொண்டால், மற்ற அணிகளை விட இந்தியா, ஆஸ்திரேலியாவுக்கு கடும் சவால் கொடுத்துள்ளது என்பதை மறுக்க முடியாது. ஆஸ்திரேலியாவுக்கு எதிராக டெஸ்டில் எப்படி விளையாட வேண்டும் என்பதை அறிந்து கொண்டோம். அவர்களின் பலம். நமது பலம் ஆகியவை தெரியும். அவர்களை வீழ்த்த சரியான வியூகம் வகுத்துள்ளோம்.இவ்வாறு கிறிஸ்டன் தெரிவித்தார்.


சேவக் காய்ச்சல்: கடந்த இரண்டு நாட்களாக சேவக் பயிற்சியில் பங்கேற்கவில்லை. அவர் "ப்ளூ' காய்ச்சலால் அவதிப்படுகிறார். இது குறித்து பயிற்சியாளர் கிறிஸ்டன் கூறுகையில்,"" சேவக்கின் காய்ச் சல் குறித்து கவலைப்பட தேவையில்லை. விரைவில் குணமாகிவிடும். அவர் நிச்சயம் முதல் டெஸ் டில் விளையாடுவார்,'' என்றார்.