சட்ட விரோத சுரங்கத் தொழிலை முறியடிக்கபுதிய சட்டம் : மொய்லி தகவல்

பெல்லாரி :
"சட்ட விரோத சுரங்கத் தொழிலை தடை செய்யும் வகையிலான புதிய
சட்டம் விரைவில் கொண்டு வரப்படும். இதுகுறித்த அதிகாரப்பூர்வ அறிவிப்பை
பிரதமர் மன்மோகன் சிங், இன்னும் 20 நாட்களுக்குள் அறிவிப்பார்' என, மத்திய
சட்ட அமைச்சரும், காங்., மூத்த தலைவர்களில் ஒருவருமான வீரப்ப மொய்லி,
பெல்லாரியில் நடந்த கூட்டத்தில் ஆவேசமாக பேசினார்.
கர்நாடகாவில் எடியூரப்பா தலைமையிலான பா.ஜ., அமைச்சரவையில் அமைச்சர்களாக
இருக்கும் கருணாகர ரெட்டி, ஜனார்த்தன ரெட்டி சகோதரர்கள், பெல்லாரியில்
சட்ட விரோத சுரங்கத் தொழிலில் ஈடுபடுவதாக, காங்கிரஸ் குற்றம் சாட்டியது.
அவர்கள் மீது சி.பி.ஐ., விசாரணைக்கு உத்தரவிட வேண்டும் என்றும், காங்கிரஸ்
சார்பில் வலியுறுத்தப்பட்டது.இந்த கோரிக்கையை வலியுறுத்தி, கர்நாடக மாநில
காங்., மூத்த தலைவர்கள் கடந்த 25ம் தேதி பாதயாத்திரையை துவக்கினர்.
"கர்நாடகாவை காப்பாற்றுவோம்' என்ற தலைப்பிலான இந்த பாதயாத்திரையில்
ஏராளமான காங்., தொண்டர்கள் பங்கேற்றனர். ஒன்பது மாவட்டங்களை கடந்து வந்த
இந்த பாதயாத்திரை, 16வது நாளான நேற்று, ரெட்டி சகோதரர்களின் சொந்த ஊரான
பெல்லாரியில் முடிந்தது. இதையொட்டி, காங்கிரஸ் சார்பில், பெல்லாரியில்
பிரமாண்ட பொதுக் கூட்டத்துக்கு ஏற்பாடு செய்யப்பட்டிருந்தது.
இக்கூட்டத்தில் பங்கேற்ற மத்திய சட்ட அமைச்சரும், காங்., மூத்த தலைவர்களில் ஒருவருமான வீரப்ப மொய்லி பேசியதாவது:

கர்நாடகாவின்
இயற்கை வளம் கொள்ளையடிக்கப்படுகிறது. சட்ட விரோத சுரங்கத் தொழிலை
முற்றிலும் தடை செய்யும் வகையிலான புதிய சட்டம் விரைவில்
கொண்டுவரப்படவுள்ளது. இதற்கான அதிகாரப்பூர்வ அறிவிப்பை பிரதமர் மன்மோகன்
சிங் இன்னும் 20 நாட்களுக்குள் வெளியிடுவார்.இந்த பிரமாண்ட பாதயாத்திரை
நாட்டு மக்களுக்கு ஒரு உண்மையை வெளிப்படுத்தியுள்ளது. நாட்டின் கனிம
வளங்கள் கொள்ளையடிப்பதை தடுக்க வேண்டும் என்ற விழிப்புணர்வு
ஏற்பட்டுள்ளது.சட்ட விரோத சுரங்கத் தொழிலில் ஈடுபடுவோர், கடுமையான
சட்டங்களில் கைது செய்யப்படுவர். கர்நாடகா பா.ஜ., அரசு, சட்ட விரோத
சுரங்கத் தொழிலில் ஈடுபடுவோருடன் கைகோர்த்து செயல்படுகிறது. சட்ட விரோத
சுரங்கத் தொழிலில் ஈடுபடுவோருக்கு எதிராக, சி.பி.ஐ., விசாரணைக்கு உத்தரவிட
முதல்வர் எடியூரப்பா மறுப்பது ஏன்?இவ்வாறு வீரப்ப மொய்லி பேசினார்.
வெளியுறவு அமைச்சரும், காங்., மூத்த தலைவருமான கிருஷ்ணா பேசுகையில்,
"ஊழல் மலிந்த பா.ஜ., மாநில அரசுக்கு எதிராக, மிகப் பெரிய பாதயாத்திரையை
நடத்தி முடித்துள்ளதன் மூலம், காங்கிரஸ் கட்சி இன்று புதிய வரலாறு
படைத்துள்ளது' என்றார்.
மத்திய அமைச்சரும், கர்நாடக மாநில காங்., பொறுப்பாளருமான குலாம் நபி ஆசாத் பேசுகையில்,
"கர்நாடகாவில், பா.ஜ., அரசும், அதில் அங்கம் வகிக்கும் சில அமைச்சர்களும்,
நாட்டின் இயற்கை வளங்களை கொள்ளையடிக்கின்றனர். மத்திய அரசு இதை வேடிக்கை
பார்த்துக் கொண்டிருக்காது' என்றார்.
கடைகள் அடைப்பு:

காங்கிரஸ் கட்சியின் இந்த பொதுக் கூட்டத்தை
அடுத்து, சர்ச்சைக்குரிய அமைச்சர்களான ரெட்டி சகோதரர்கள், நேற்று
பெல்லாரியில் இருப்பதை தவிர்த்தனர். கூட்டத்தையொட்டி, பெல்லாரியில்
ஆயிரக்கணக்கான போலீசார் பாதுகாப்பு பணியில் ஈடுபட்டிருந்தனர். முக்கிய
இடங்களில் ரகசிய கண்காணிப்பு கேமராக்கள் பொருத்தப்பட்டு இருந்தன. கடைகள்
அடைக்கப்பட்டு இருந்தன.