தேனீக்கள் கொட்டி 50 பேர் படுகாயம்

நவீன் · நவீன் Tue Aug 17, 2010 6:09 pm

ப.வேலூர்:

பரமத்தி அருகே மரவாபாளையம் கிராமத்தில் ராட்சத தேனீக்கள்
கடித்து, போலீஸ் இன்ஸ்பெக்டர், எஸ்.ஐ., மற்றும் போலீசார் உட்பட 50 பேர்
காயமடைந்தனர். அவர்களில் எட்டு பேர், அரசு மருத்துவமனையில் தீவிர சிகிச்சை
பிரிவில் அனுமதிக்கப்பட்டுள்ளனர். நாமக்கல் மாவட்டம், மரவாபாளையம்
கிராமத்தில் உள்ள வீரமாத்தி கோவிலில் ஆடி மாதம் கடைசி நாளன்று கிடா வெட்டி
பூஜை நடந்தது. கோவில் தனியார் இடத்தில் அமைந்துள்ளதால், பொதுமக்கள் வர,
அனுமதி மறுக்கப்பட்டது. அதனால் மோதல் ஏற்படும் சூழல் உருவானது.
போலீசார்
தலையிட்டு, பொதுமக்கள் கோவிலுக்குள் சென்று வழிபாடு நடத்த அனுமதித்தனர்.
அப்போது, விவசாய தோட்டம் ஒன்றிலிருந்து கும்பலாக பறந்து வந்த ராட்சத
தேனீக்கள், அங்கிருந்தோரை கொட்டியது. வலி பொறுக்க முடியாமல் பலர்
அலயறித்து ஓடினர். அவர்களை தேனீக்கள் விரட்டி விரட்டிக் கடித்தன. அதில்,
பரமத்தி எஸ்.ஐ., பாலமுருகன் உட்பட 50 பேர் காயமடைந்தனர். அனைவரும் பரமத்தி
அரசு மற்றும் தனியார் மருத்துவமனையில் சிகிச்சைக்காக
அனுமதிக்கப்பட்டுள்ளனர். அதில் எட்டு பேர், பரமத்தி அரசு மருத்துமனையின்
தீவிர சிகிச்சை பிரிவில் அனுமதிக்கப்பட்டுள்ளனர். தேனீக்கள் கூட்டை
கலைக்கச் சென்ற பரமத்தி இன்ஸ்பெக்டர் பாலசுப்ரமணியத்தையும் தேனீக்கள்
கடித்ததில், அவரும் அரசு மருத்துவமனையில் அனுமதிக்கப்பட்டுள்ளார்.