இசா: எதிர்க் கட்சி நாடாளுமன்ற உறுப்பினரிடம் போலீசார் முரட்டுத்தனமாக நடந்து கொண்டனர்

* ஆர்ப்பாட்டம், நாட்டு விசுவாச கடமை
* அடிப்படை உரிமைகளுக்கு எதிரான போலீஸ் செயல்

இன்று நடைபெற்ற இசாவுக்கு எதிரான பேரணியில், மஸ்ஜிட் நெகாராவுக்கு வெளியே, எதிர்க்கட்சி நாடாளுமன்ற உறுப்பினர் டாக்டர் ஹட்டா ரம்லியிடம் போலீசார் முரட்டுத்தனமாக நடந்து கொண்டனர்.
அந்த குவால கிராய் பாஸ் நாடாளுமன்ற உறுப்பினர், தொழுகையை நடத்திய பின்னர், வெளியே கூடியிருந்த சுமார் ஈராயிரம் ஆர்ப்பாட்டக்காரர்களிடையே உரை நிகழ்த்துவதற்கு பள்ளிவாசலிலிருந்து வெளியே வந்தார்.

சோகோ விற்பனைத் தொகுதியை நோக்கிச் செல்லும்படி தமது ஆதரவாளர்களை கேட்டுக் கொள்ளும் முன்னர், ஒரு சிறிய உரையை நிகழ்த்தவிருந்தபோது, போலீசார் கூட்டத்தினரிடையே புகுந்து, தம்மை பின்புறத்திலிருந்து இழுத்துச் சென்றதாக ஹட்டா கூறினார்.

“நான் ஒரு கணம் நிலைகுலைந்து, எனது ஆதரவாளர்கள் மீது விழுந்தேன்,” என்றாரவர்.

ஹட்டாவை பாதுகாப்பாகச் சூழ்ந்து கொண்ட ஆதரவாளர்களுக்கும் போலீசாருக்குமிடையே நிகழ்ந்த கைகலப்பை மலேசியா மிர்ரர் (Malaysian Mirror) ஊடகவியலாளர் எடுத்த விடியோ படம் காட்டியுள்ளது.

அந்த போராட்டத்தில் ஹட்டாவின் டி- ஷர்ட் கிழிக்கப்பட்டது.

எந்த எச்சரிக்கையும் கொடுக்கப்படவில்லை

“அவர்கள் பின்புறத்திலிருந்து வந்ததால் நாங்கள் தடுமாறிவிட்டோம். கலைந்து செல்லும்படி எந்த எச்சரிக்கையும் விடுக்கப்படவில்லை.” என்று ஹட்டா கூறினார். அவர் கைது செய்யப்படவில்லை.

“ஆனால் இது எங்களது போராட்டத்தின் ஒரு பகுதிதான், நாங்கள் சோகோ வரை அணிவகுத்துச் சென்றோம்.”

இதனிடையே, அமைதிப் பேரணி மீது போலீசார் கட்டவிழ்த்துள்ள நடவடிக்கையை அலிரான் தலைவர் பி. ராமகிருஷ்ணன் ஓர் அறிக்கையில் வன்மையாகச் சாடியுள்ளார்.

இசாவை வெறுக்கும் பேரணியில், ஆயிரக்கணக்கான அக்கறையுடைய, பரிவுமிக்க மலேயர்கள் பங்கேற்றுள்ளனர். இந்நாட்டு குடிமக்களின் சட்டப்பூர்வ உரிமைகளை அடக்கி ஒடுக்குவதற்கு தேமு இச்சட்டத்தை பயன்படுத்தி வருகிறது,” என்றாரவர்.

‘பொது ஒழுங்கை சீர்குலைப்பது அல்லது குழப்பத்தை ஏற்படுத்துவது’ ஆர்ப்பாட்டத்தின் நோக்கமல்ல,”. யாங் டி பெர்துவான் அகோங்கிடம் ஒரு மகஜரை சமர்ப்பிப்பதற்கு அரண்மனையை நோக்கி அமைதி ஊர்வலமாகச் செல்வதே அதன் நோக்கமாகும்.”

ஆட்சியில் தொடர்ந்து இருப்பதற்கு தனது நம்பகத்தன்மையையும் தார்மீக அதிகாரத்தையும் வெகு வேகமாக இழந்து வரும் தேமு அரசாங்கம் மீது, மக்கள் அதிருப்தியும் வெறுப்பும் அடைந்துள்ளதை நாட்டில் மற்ற மக்களும் அறிந்து கொள்வதை தேமு விரும்பவில்லை.

‘ஒரே மலேசியா’ வெறும் வெற்றுப் பேச்சு

“ஓர் அமைதி ஊர்வலத்தை அழிப்பதற்கு இத்தகைய அதிகாரமும் அடக்குமுறையும் ஒன்று திரட்டப்படும்போது, தெரு குற்றச் செயல்களை எதிர்கொள்வதற்கு இதே முயற்சியும் ஆர்வமும் ஏன் இருக்க முடியாது,” என்றும் ராமகிருஷ்ணன் வினவினார்.

பிகேஆர் இளைஞர் அணியும் போலீஸ் வன்செயலை கண்டித்தது

“போலீஸ் நடவடிக்கை முற்றிலும் தேவையற்றது. அது மக்களாட்சி மற்றும் மனித உரிமை கோட்பாடுகளை மீறுகிறது. அவர்கள் அகோங்கிடம் ஒரு மகஜரைதான் சமர்ப்பிக்க முயன்றனர்,” என்று இளைஞர் தலைவர் ஷன்சுல் இஸ்கந்தர் மொகமட் அகின் கூறினார்.

போலீசார் கட்டவிழ்த்துள்ள அராஜகம், பிரதமர் நஜிப் துன் ரசாக்கின் ‘ஒரே மலேசியா’ கோட்பாடு, சாரமற்ற வெறும் பேச்சு என்பதைக் காட்டுகிறது.”

“போலீசாரால் காவலில் வைக்கப்பட்டுள்ள அனைவரையும் பிரதமர் உடனடியாக விடுதலை செய்து, போலீஸ் படைத் தலைவரையும் இதர உயர் அதிகாரிகளையும் இடைநீக்கம் செய்ய வேண்டும். மேலும் இன்றைய வெட்ககேடான போலீஸ் நடவடிக்கை குறித்து சுயேச்சையான விசாரணை நடத்த வேண்டும்,” என்றும் அவர் கேட்டுக் கொண்டார்.