வீரபாண்டி ஆறுமுகம், அன்பரசனை பதவியிலிருந்து நீக்க ஜெ., கோரிக்கை

"கொலைக் குற்றவாளியை சேலம் சிறையில் சந்தித்த அமைச்சர் வீரபாண்டி ஆறுமுகம் மற்றும் கம்யூனிஸ்டுகளை மிரட்டிய அமைச்சர் அன்பரசன் இருவரையும், அமைச்சர் பதவியிலிருந்து உடனடியாக நீக்க வேண்டும்' என, அ.தி.மு.க., பொதுச்செயலர் ஜெயலலிதா கூறியுள்ளார்.



அவரது அறிக்கை: சேலத்தில் ஓய்வு பெற்ற இன்ஸ்பெக்டர் குப்புராஜ் உட்பட அவரது குடும்பத்தினர் ஆறு பேர் சொத்து தகராறு காரணமாக, கடந்த ஆகஸ்ட் மாதம் கொடூரமாக படுகொலை செய்யப்பட்டனர். இந்த கொலை வழக்கை விசாரித்து வந்த மாநில குற்றப் புலனாய்வுத் துறை, பனைமரத்துப்பட்டி தி.மு.க., ஒன்றியச் செயலரும், அமைச்சர் வீரபாண்டி ஆறுமுகத்தின் தம்பி மகனுமான சுரேஷ்குமாருக்கு தொடர்பு இருப்பதாக கிடைத்த ஆதாரத்தின் அடிப்படையில் அவரை கைது செய்தது. இந்த வழக்கில் இவருடன் சேர்த்து தி.மு.க.,வை சேர்ந்த வக்கீல் சம்பத், அம்மாபாளையத்தை சேர்ந்த செந்தில் ஆகியோரும் கைது செய்யப்பட்டனர். இவர்களை 15 நாள் போலீஸ் காவலில் வைக்க, சேலம் குற்றவியல் கோர்ட் உத்தரவிட்டுள்ளது. இந்நிலையில் சுரேஷ்குமாரை, வீரபாண்டி ஆறுமுகம் சைரன் பொருத்தப்பட்ட தேசிய கொடி கட்டப்பட்ட அரசு வாகனத்தில், சேலம் மத்திய சிறைக்கு சென்று சந்தித்து ஆறுதல் வார்த்தை கூறியுள்ளார். இவரை தொடர்ந்து தி.மு.க.,வை சேர்ந்த ஆதிசங்கர் எம்.பி., சின்னதுரை எம்.எல்.ஏ., சேலம் மேயர் உட்பட பலர் சுரேஷ்குமாரை நேரில் சந்தித்து ஆறுதல் வார்த்தை கூறியுள்ளனர்.



ஓர் அமைச்சர், கொலைக் குற்றத்திற்காக கைது செய்யப்பட்ட ஒருவரை சிறையில் சென்று பார்ப்பது, இந்திய அரசியலமைப்புச் சட்டத்திற்கு எதிரானது. அமைச்சரின் இந்த நடவடிக்கையின் மூலம் உண்மையான குற்றவாளியை தி.மு.க., அரசு தப்ப விடுமோ என்ற சந்தேகம் தற்போது மக்கள் மத்தியில் பரவலாக எழுந்துள்ளது. அமைச்சர் அன்பரசன் சில நாட்களுக்கு முன் காஞ்சிபுரத்தில், "காஞ்சிபுரம் மாவட்டத்தில் கம்யூனிஸ்ட் கட்சியில் ஊருக்கு ஒருவர் உள்ளார். நாங்கள் நினைத்தால் நீங்கள் கூட்டம் போட முடியுமா? அடக்கி வாசியுங்கள். இல்லையென்றால் தெருவில் நடமாட முடியாது. ஜாக்கிரதை' என, மிரட்டும் தொனியில் பேசி இருக்கிறார்.



சேலம் கொலை வழக்கை மத்திய புலனாய்வுத் துறையிடம் ஒப்படைக்கவும், கொலைக் குற்றவாளியை சேலம் சிறையில் சந்தித்த அமைச்சர் வீரபாண்டி ஆறுமுகம் மற்றும் கம்யூனிஸ்ட் தோழர்களை மிரட்டிய அமைச்சர் அன்பரசன் ஆகிய இருவரையும் அமைச்சர் பதவியிலிருந்து உடனடியாக நீக்கி, நடவடிக்கை எடுக்க வேண்டும். இதை கருணாநிதி செய்யவில்லை என்றால் சட்டம் ஒழுங்கை காக்க, கருணாநிதிக்கு விருப்பமில்லை என்ற அடிப்படையிலே தி.மு.க., அரசை டிஸ்மிஸ் செய்து, தமிழகத்தில் ஜனாதிபதி ஆட்சியை அமல்படுத்த மத்திய அரசு நடவடிக்கை எடுக்க வேண்டும். இவ்வாறு ஜெயலலிதா கூறியுள்ளார்.