தோல்வியின் விளிம்பில் புலிகள் இலங்கை தலைவர் கூறுகிறார்

கொழும்பு:"தோல்வியில் இருந்து தப்பிப்பதற்காகவே, இந்தியாவில் உள்ள அரசியல் கட்சித் தலைவர்களின் உதவியை விடுதலைப் புலிகள் நாடியுள்ளனர்' என, இலங்கை பாதுகாப்பு செயலர் கோடாபாயா கூறியுள்ளார்.இலங்கை அதிபர் மகிந்தா ராஜபக்சேவின் சகோதரரும், அந்நாட்டு பாதுகாப்பு செயலருமான கோடாபாயா ராஜபக்சே, பத்திரிகை ஒன்றுக்கு அளித்த பேட்டியில் கூறியதாவது:


இலங்கை ராணுவம், விடுதலைப் புலிகள் மீது தீவிர தாக்குதலை நடத்தி வருகிறது. புலிகள் தற்போது தோல்வியின் விளிம்பில் நிற்கின்றனர். அவர்கள் தோல்வியடைவதை யாராலும் தடுத்த நிறுத்த முடியாது. தோல்வியில் இருந்தும், தாக்குதலில் இருந்தும் தப்பிப்பதற்காகவே, தமிழகத்தைச் சேர்ந்த அரசியல் கட்சித் தலைவர்களின் உதவியை நாடியுள்ளனர்.இந்திய அரசு மூலமாக இலங்கைக்கு நெருக்கடி கொடுத்து வருகின்றனர். இதன் காரணமாகவே இலங்கைக்கு திடீர் நெருக்கடி வந்துள்ளது. இதைத் தவிர புலிகளுக்கு தற்போது வேறு வழி எதுவும் இல்லை.


இருந்தாலும், புலிகள் இனிமேல் ராணுவ தாக்குதலில் இருந்து தப்பிக்க முடியாது. தமிழக மீனவர்கள் இலங்கை ராணுவத்தால் தாக்கப்படுவதாகவும் குற்றச்சாட்டு கூறப்படுகிறது. இந்த விஷயத்தில் தமிழக அரசு, இலங்கைக்கு நெருக் கடி ஏற்படுத்துவதை கைவிட்டு, இலங்கையின் கடல் பாதுகாப்பு குறித்து மீனவர்களுக்கு அறிவுறுத்த வேண்டும்.நல்ல எண்ணத்தின் அடிப்படையில், இலங்கை கடல் பகுதிக்குள் மீன் பிடிக்க இந்திய மீனவர்களுக்கு அனுமதி அளிக்கப்படுகிறது.


இவர்கள், சர்வதேச கடல் எல்லையை தாண்டி வந்து மீன் பிடிக்கின்றனர்.அவர்கள் மீது நாங்கள் எந்த ஒரு நட வடிக்கையும் எடுப்பதில்லை.பாதுகாப்பு குறித்து அவர்களுக்கு அறிவுறுத்துவதை மட்டுமே செய்து வருகிறோம். இலங்கை கடற்படை மீது தாக்குதல் நடத்துவதற்காக, இந்திய மீனவர்களை விடுதலைப்புலிகள் பயன்படுத்தி வருகின்றனர். கண்காணிப்பு அதிகமாக உள்ள பகுதிகளில் மீன் பிடிக்க வேண்டாம் என, இந்திய மீனவர்களிடம் நாங்கள் அறிவுறுத்தி வருகிறோம்.


இந்திய-இலங்கை நாடுகளுக்கு இடையே நல்லுறவு தொடர வேண்டும் என்பது எங்கள் விருப்பம்.முன்னாள் பிரதமர் ராஜிவ், புலிகளால் படுகொலை செய்யப்பட்ட சம்பவத்தை தமிழக அரசியல்வாதிகள் மறந்து விடக் கூடாது.இவ்வாறு கோடாபாயா கூறினார்.