தமிழகத்தின் எல்லைகளுக்குத் தூக்கியடிக்கப்பட்ட காங்கிரஸ்!

தமிழக சட்டமன்றத் தேர்தலில் படுதோல்வி அடைந்த காங்கிரஸ் கட்சி 63 இடங்களில் போட்டியிட்டு 5 இடங்களில் மட்டுமே வெற்றி பெற முடிந்தது. காங்கிரஸை கரை சேர்ந்த 5 தொகுதிகளில் 4 தொகுதிகள் தமிழகத்தின் எல்லைகளில் அமைந்திருக்கும் தொகுதிகள் ஆகும். மற்றொரு தொகுதியும் வங்காள விரிகுடாவின் எல்லையிலேயே அமைந்துள்ளது.

கன்னியாகுமரி மாவட்டம் கேரளாவை ஒட்டி இருப்பதாலோ அல்லது திமுக மற்றும் அதிமுக ஆகிய இரு கட்சிகளின் அரசுகளாலும் தொடர்ந்து புறக்கணிக்கப்படுவதாலோ, கன்னியாகுமரி மாவட்ட மக்கள் இதுவரை தேசிய கட்சிகளுக்கே தங்கள் ஆதரவைத் தெரிவித்து வந்துள்ளனர். இந்த வழக்கத்தின் விளைவாகவே காங்கிரஸ் கட்சி கன்னியாகுமரி மாவட்டத்தில் உள்ள 6 தொகுதிகளில் 3 தொகுதிகளைப் பிடித்துள்ளது.

தமிழகத்தின் தெற்குப் பகுதியில் 3 தொகுதிகளில் வெற்றி பெற்ற காங்கிரஸ் வடக்கில் ஓசூர் தொகுதியில் வெற்றி பெற்றது. இதுவும் கர்நாடக எல்லையில் அமைந்துள்ள தொகுதியாகும்.

இந்த நான்கு தொகுதிகளை விடுத்து காங்கிரஸ் வெற்றி பெற்ற 5ஆவது தொகுதி பட்டுக்கோட்டை. இங்கும் காங்கிரஸ் கட்சி வெற்றி பெற்றது என்பதை விட காங்கிரஸ் கட்சியின் சார்பில் நிறுத்தப்பட்டிருந்த வேட்பாளர் வெற்றி பெற்றார் என்று சொல்வதே சரியாக இருக்கும்.

பட்டுக்கோட்டை சட்டமன்றத் தொகுதியில் இதற்கு முன் இரண்டு முறை தேர்ந்தெடுக்கப்பட்டு, மூன்றாவது முறையும் வெற்றி பெற்றுள்ளார் என்.ஆர். ரெங்கராஜன். தொகுதிக்காக எதையும் செய்யவில்லை என்ற குற்றச்சாட்டு இவர் மீது உண்டு. என்றாலும் மற்ற அரசியல்வாதிகளைப் போன்று எவ்விதக் குற்ற வழக்குகளிலும் இவருக்குத் தொடர்பில்லை என்பதே இவர் வெற்றியை உறுதி செய்தது.

ஆனால் இவரை எதிர்த்து தேமுதிகவின் சார்பில் நிறுத்தப்பட்டிருந்த செந்தில்குமார், குற்றப் பின்னணி உடைய தமிழக வேட்பாளர்களிலேயே நான்காவது இடத்தைப் பெற்றிருந்தவர் என்ற தகவல் நாளிதழ் ஒன்றில் வெளியாகி இருந்தது. தவிர, மதிமுகவுக்கு ஓரளவு செல்வாக்குள்ள தொகுதிகளில் ஒன்றான இத்தொகுதியின் மதிமுகவினர் ரெங்கராஜனுக்கு வாக்களித்திருப்பார்கள் என்று நம்பப்படுகிறது.

ஆக, காங்கிரஸ் கட்சி தமிழகத்தின் எல்லைகளுக்குத் தூக்கியடிக்கப்பட்டுள்ளது. வெற்றி பெற்ற காங்கிரஸ் வேட்பாளர்கள் பெற்ற வாக்குவிவரம் வருமாறு:

கிள்ளியூர்

ஜான் ஜேக்கப் (காங்) -
சந்திரகுமார் (பாஜக)

வாக்கு வித்தியாசம் - 24,486

விளவங்கோடு

விஜயதரணி (காங்)
லீமாரோஸ் (மார்க்சிஸ்)

வாக்கு வித்தியாசம் - 23,789

ஓசூர்

கே. கோபிநாத் (காங்)
எஸ். ஜான் திமோதி (தேமுதிக)

வாக்கு வித்தியாசம் - 14,152

குளச்சல்

ஜே.ஜி. பிரின்ஸ் (காங்)
பி. லாரன்ஸ் (அதிமுக)

வாக்கு வித்தியாசம் - 11,821

பட்டுக்கோட்டை

என்.ஆர். ரெங்கராஜன் (காங்)
என். செந்தில்குமார் (தேமுதிக)

வாக்கு வித்தியாசம் - 8,779
tmt

அடுத்த தேர்தலில் இது கூட இவர்களுக்கு கிடைக்காது