கல்லூரி மாணவி பரபரப்பு புகார்

**இளமாறன்** · **இளமாறன்** Wed 20 Jul 2011 - 23:56

புதன்கிழமை, 20, ஜூலை 2011 (20:6 IST)

கல்லூரி மாணவி பரபரப்பு புகார்

திருப்பதி குர்லகொண்டா பகுதியை சேர்ந்தவர் 17 வயது இளம்பெண். இவர் திருப்பதியில் உள்ள ஒரு தனியார் கல்லூரியில் இன்டர்மீடியட் (பிளஸ் 2) 2ம் ஆண்டு படித்து வருகிறார்.

இவர், நேற்று திருப்பதி கிழக்கு போலீஸ் நிலையத்தில் டிஎஸ்பி கேசப்பாவிடம் ஒரு புகார் மனு கொடுத்தார்.

அம்மனுவில், ‘’திருப்பதி குர்லகொண்டா பகுதியில் பெற்றோருடன் வசித்து வருகிறேன். எனது தந்தை, திருப்பதி பஸ் நிலையம் அருகே உள்ள ஒரு லாட்ஜில் ரூம் பாயாக வேலை பார்த்து வருகிறார். எனது தாயார் உடல்நிலை சரியில்லாமல் வீட்டில் உள்ளார்.

எனது தந்தையின் குறைந்த வருமானத்தில்தான் வாழ்ந்து வருகிறோம். கடந்த சில மாதங்களுக்கு முன்பு நான் பட்டமேற்படிப்பு படிக்க விரும்புகிறேன் என எனது பெற்றோரிடம் கூறினேன். அதற்கு அவர்கள், குடும்பம் நடத்தவே வழியில்லை.

எங்களால் உன்னை படிக்க வைக்க முடியாது. நீ விபச்சாரத்தில் ஈடுபட்டால் நாம் நிம்மதியாக வாழ முடியும் என கூறினர். இதை கேட்டதும் நான் கடுமையாக அதிர்ச்சி அடைந்தேன்.

இதைத்தொடர்ந்து கடந்த சில நாட்களாக என்னை விபச்சாரத்தில் ஈடுபடும்படிகட்டாயப்படுத்து கின்றனர். எனவே, எனது பெற்றோருடன் தங்கியிருக்கவே தற்போது பயமாக உள்ளது.

என்னை காப்பாற்றி பட்டப்படிப்பு படிக்க உதவி செய்யுங்கள்’ என அதில் கூறியுள்ளார்.

இதையடுத்து டிஎஸ்பி கேசப்பா, சப்&இன்ஸ்பெக்டர் நிரஞ்சன்குமார் ஆகியோர் மாணவியின் பெற்றோரை அழைத்து கடுமையாக எச்சரித்து அறிவுரை கூறினர். அப்போது அவர்கள், ‘எங்களது மகளை விபச்சாரத்தில் ஈடுபடுத்த மாட்டோம்‘ என உறுதியளித்தனர்.

பின்னர் மாணவியை அவரது பெற்றோருடன் செல்லுமாறு போலீசார் கூறினர்.

ஆனால், மாணவி பெற்றோருடன் செல்ல மறுத்துவிட்டார். இதையடுத்து மாணவியை, போலீசார் திருப்பதியில் உள்ள மறுவாழ்வு இல்லத்துக்கு அனுப்பி வைத்தனர்.

நக்கீரன்