மார்பகப் புற்றுநோய்

பெண்களிடம் மார்பகப் புற்றுநோய் நாளுக்கு நாள் பெருகி வருகிறது. இதற்குக் காரணம், நாகரிகம்தான்.

மார்பகப் புற்றுநோயை உடனே கண்டுபிடித்துவிட்டால், குணப்படுத்திவிட முடியும். இல்லையென்றால், மார்பகத்தை அறுத்து எடுக்கவேண்டிய ஆபத்து ஏற்படும்.

மார்பகப் புற்று

பெண்களைத் தாக்கும் புற்று நோய்களில் மார்பகப் புற்றுநோய் முக்கியமானது. இது பெண்களின் உயிரையே குடிக்கக் கூடியது.

முன்பெல்லாம் நூற்றில் ஒன்று இரண்டு பெண்களுக்குத்தான் மார்பகப் புற்றுநோய் வரும். கடந்த பத்தாண்டில் இது பெருகிவிட்டது. இப்போது பத்துப் பெண்களில் ஒரு பெண்ணுக்கு மார்பகப் புற்றுநோய் வரக்கூடிய ஆபத்து இருக்கிறது.

இதற்கு என்ன காரணம்?

நாகரிகம்

பெண்களிடம் வளர்ந்துவரும் நாகரிகம்தான் இதற்கு முக்கிய காரணம்.

நாகரிகப் பெண்கள் தங்களின் மார்பு அழகு பற்றிக் கவலைப்படுகிறார்களே தவிர, புற்றுநோயைப் பற்றி நினைப்பதேயில்லை.

தாய்ப்பால் கொடுக்காத பெண்களைத்தான் மார்பகப் புற்று அதிகமாக தாக்குகிறது. ஆனால் நாகரிகப் பெண்கள், குழந்தைகளுக்குப் புட்டிப்பால் கொடுக்கிறார்கள். தாய்ப்பால் கொடுத்தால் மார்பின் அழகு குறைந்துவிடும் என்று அஞ்சுகிறார்கள்.

வேலைக்கு போகும் பெண்களுக்கு தாய்ப்பால் கொடுக்க நேரம் இருப்பதில்லை.

மார்பகப் புற்றுநோய்க்கு இறுக்கமான வட்டுடையும் ஒரு காரணம். நைலான் வட்டுடைகளைப் பயன்படுத்தினாலும் புற்றுநோய் வரக்கூடும்.

எப்படிக் கண்டு பிடிப்பது?

மார்பகப் புற்றுநோயை உடனே கண்டுபிடித்துவிட்டால், எளிதாகக் குணப்படுத்தி விட முடியும். கண்டு பிடிப்பதும் எளிது. 40 வயதுக்கு மேலான பெண்கள், குளிக்கும் போது, தங்கள் மார்பகங்களைக் கையால் தடவிப் பார்க்க வேண்டும். கட்டி எதுவும் தட்டுப்பட்டால், புற்றுநோயின் தொடக்கம் என்று அறிந்து கொள்ளலாம். மார்பகத்தின் வடிவம் மாறியிருந்தாலும் சந்தேகப்படவேண்டும். உடனே மருத்துவரிடம் போய் வைத்தியம் தொடங்கவேண்டும். விரைவில் குணப்படுத்திவிட முடியும்.

ஒரே வழி

தொடக்கத்தில் பார்க்காமல் புற்று வளர்ச்சி அடைந்துவிட்டால், மருத்துவம் செய்வது சிரமம். செலவும் அதிகம்.

புற்று தாக்கிய மார்பகத்தை மருத்துவர்கள் அறுவை செய்து அகற்றி விடுவார்கள். இல்லையென்றால், அடுத்த மார்பகத்துக்குப் புற்று பரவிவிடும். மற்ற பகுதிகளுக்கும் பரவி, உயிருக்கேகூட ஆபத்து ஏற்படும்.

மாற்று மார்பகம்

ஒரு பக்க மார்பை மட்டும் அறுத்து எடுத்துவிட்டால், பெண்களின் அழகு குறைந்துவிடும். இதற்காக சிலபெண்கள் செயற்கை மார்பகம் வைத்து கொள்வார்கள். சிலிகான் என்ற பொருளால் இந்தச் செயற்கை மார்பகம் உருவாக்கப் படுகிறது. இது நிலைப்பது இல்லை. சிலருக்கு வேதனையும் தரும். மீண்டும் புற்று வரவும் வாய்ப்பு உண்டு.

அதற்குப் பதில், இரப்பர் கிண்ணம் போன்ற செயற்கை மார்பகம் செய்து கொடுக்கிறார்கள். இதை எப்போதும் வைத்துக் கொள்ள வேண்டும் என்பதில்லை. வெளியில் போகும்போது மட்டும் வைத்துக் கொள்ளலாம். வித்தியாசம் தெரியாது.

சோதனை

பெண்களின் மார்பகத்தை சோதித்து, புற்றுநோயைக் கண்டுபிடிக்கும் கருவிகள் பெரிய மருத்துவமனைகளில் இருக்கின்றன. வயதான பெண்கள் ஆண்டுக்கு ஒருமுறை அங்கே போய் சோதனை செய்து கொள்ளுவது நல்லது.

பொதுவாக, நோய்கள் வராமல் தடுப்பது நல்லது, வந்துவிட்டால், உடனே கண்டுபிடித்து வைத்தியம் செய்துகொள்ள வேண்டும் என்று சொல்லுவார்கள். இது மார்பகப் புற்று நோய்க்கு முற்றும் பொருந்தும்.

அழகுவேண்டுமா? ஆரோக்கியம் வேண்டுமா? இதை நாகரிகப் பெண்கள் முடிவு செய்து கொள்ளுவது நல்லது.