மும்பை அணி "டென்ஷன் வெற்றி! * கடைசி பந்தில் வீழ்ந்தது டிரினிடாட்

பெங்களூரு: சாம்பியன்ஸ் லீக் பரபரப்பான போட்டியில் மும்பை இந்தியன்ஸ் அணி ஒரு விக்கெட் வித்தியாசத்தில் "திரில் வெற்றி பெற்றது. கடைசி பந்து வரை போராடிய டிரினிடாட் அணி, கைக்கு எட்டிய வாய்ப்பை கோட்டை விட்டது.
இந்தியாவில் மூன்றாவது சாம்பியன்ஸ் லீக் "டுவென்டி-20 தொடர் நடக்கிறது. நேற்றிரவு நடந்த "ஏ பிரிவு லீக் போட்டியில் மும்பை இந்தியன்ஸ், டிரினிடாட் அண்ட் டுபாகோ(வெ.இண்டீஸ்) அணிகள் மோதின. "டாஸ் வென்ற டிரினிடாட் அணி கேப்டன் டேரன் கங்கா "பேட்டிங் தேர்வு செய்தார்.
மும்பை பந்துவீச்சில் டிரினிடாட் அணி துவக்கத்திலேயே ஆட்டம் கண்டது. "வேகத்தில் மலிங்காவும், "சுழலில் கேப்டன் ஹர்பஜனும் மிரட்ட, விக்கெட்டுகள் மடமடவென சரிந்தன. மலிங்கா பந்தில் பரத்(11) வெளியேறினார். சிம்மன்ஸ்(21), ரன் அவுட்டானார். டேரன் கங்கா(5) சோபிக்கவில்லை.
குறைந்த ஸ்கோர்:
ஹர்பஜன் வலையில் ராம்தின்(0), டேரன் பிராவோ(18), ஷெர்வின் கங்கா(2) சிக்கினர். மலிங்கா பந்தில் கூப்பர்(0) காலியானார். போராடிய முகமது(23), போலார்டு "வேகத்தில் வீழ்ந்தார். டிரினிடாட் அணி 16.2 ஓவரில் 98 ரன்களுக்கு சுருண்டது. இதன் மூலம் "டுவென்டி-20 அரங்கில் தனது குறைந்த ஸ்கோரை பெற்றது. தவிர, சாம்பியன்ஸ் லீக் வரலாற்றில் 8வது குறைந்த ஸ்கோரை பதிவு செய்தது.
மும்பை சார்பில் ஹர்பஜன் 3, மலிங்கா 2 விக்கெட் வீழ்த்தினர்.
ராம்பால் மிரட்டல்:
சுலப இலக்கை விரட்டிய மும்பை அணி திணறல் துவக்கம் கண்டது. பத்ரி பந்தில் பிலிஜார்டு(2) அவுட்டானார். இதற்கு பின் ராம்பால் மிரட்டினார். இவரது "வேகத்தில் சுமன்(10), பிராங்க்ளின்(0), சைமண்ட்ஸ்(0) வெளியேற, சிக்கல் ஏற்பட்டது. நரைன் பந்தில் போலார்டு(9) "போல்டாக, மும்பை அணி 5 விக்கெட்டுக்கு 33 ரன்கள் எடுத்து தத்தளித்தது.
பின் ராயுடு, சதிஷ் இணைந்து பொறுப்பாக ஆடினர். சதிஷ் 14 ரன்களுக்கு அவுட்டானார். அடுத்து வந்த ஹர்பஜன்(9), ஒரு சிக்சர் அடித்த திருப்தியுடன் வெளியேற, மீண்டும் நெருக்கடி ஏற்பட்டது.
6 பந்தில் 11 ரன்கள்:
இறுதியில் ராயுடு, மலிங்கா துணிச்சலாக போராடினர். கடைசி 6 பந்தில் வெற்றிக்கு 11 ரன்கள் தேவைப்பட்டன. ஷெர்வின் கங்கா பந்துவீசினார். முதல் பந்தில் ராயுடு ஒரு ரன் எடுத்தார். 2வது பந்தில் மலிங்கா ஒரு "சூப்பர் சிக்சர் அடித்தார். 3வது பந்தில் ஒரு ரன். 4வது பந்தில் மலிங்கா(15) ரன் அவுட்டானார். 5வது பந்தில் ராயுடுவும்(36) ரன் அவுட்டாக "டென்ஷன் எகிறியது. கடைசி பந்தில் 2 ரன்கள் தேவைப்பட்டன. இம்முறை பந்தை அடித்த சாகல் 2 ரன்கள் ஓடினார். இவரை "ரன் அவுட் செய்யும் வாய்ப்பை விக்கெட் கீப்பர் ராம்தின் கோட்டை விட, மும்பை அணி 20 ஓவரில் 9 விக்கெட்டுக்கு 99 ரன்கள் எடுத்து "திரில் வெற்றி பெற்றது.
ஆட்ட நாயகன் விருதை டிரினிடாட் வீரர் ராம்பால் வென்றார்.

நன்றி தினமலர்