காஸ் சிலிண்டர்கள் எடை குறைவு ? (விரைவாக தீரும் சமையல் காஸ்)

**இளமாறன்** · **இளமாறன்** Wed 28 Dec 2011 - 2:49

சென்னை: இந்துஸ்தான் பெட்ரோலியம் (எச்.பி.,) நிறுவனத்தின் சமையல் காஸ் சிலிண்டர்கள், வழக்கத்தைவிட விரைவாக தீர்ந்து விடுவதால், எடை குறைவாக உள்ளனவா என்ற சந்தேகம், வாடிக்கையாளர்கள் மத்தியில் எழுந்துள்ளது. இதுகுறித்து புகார் தெரிவித்தால், உரிய நடவடிக்கை எடுக்கப்படும் என, எச்.பி., நிறுவனம் தெரிவித்துள்ளது.
சந்தேகம்:சென்னை நகரில், 1.70 லட்சம் வாடிக்கையாளர்கள், எச்.பி., நிறுவனத்தில், சமையல் காஸ் இணைப்பு பெற்றுள்ளனர். இந்த நிறுவனத்தின் சிலிண்டர்கள், வழக்கத்தைவிட விரைவாக தீர்ந்து விடுவதாகவும், இதனால், அவற்றின் எடை குறைவாக உள்ளதா என்ற சந்தேகம் எழுகிறது என, வாடிக்கையாளர்கள் தெரிவிக்கின்றனர்.

25 நாட்களில் தீர்கிறது:இதுகுறித்து, புரசைவாக்கத்தைச் சேர்ந்த இல்லதரசி ஒருவர் கூறியதாவது:வழக்கமாக ஒரு சிலிண்டர், 45 நாட்களுக்கு வரும். மழை மற்றும் குளிர்காலத்தில் பயன்பாடு அதிகம் காரணமாக, 35 நாட்களுக்காவது வர வேண்டும். ஆனால், கடந்த மூன்று மாதங்களாக, 25 நாட்களிலேயே தீர்ந்து விடுகிறது. சிலிண்டரை எடை போட்டு காட்டும்படி, டெலிவரி செய்வோரிடம் பலமுறை கேட்டும் பயனில்லை; வாடிக்கையாளர் சேவை மையத்திற்கு புகார் செய்தும், நடவடிக்கை இல்லை.இவ்வாறு அவர் கூறினார்.

வாய்ப்பில்லை:எச்.பி., நிறுவன வாடிக்கையாளர் சேவை மைய அதிகாரி ஒருவர் கூறும்போது, ""எலக்ட்ரானிக் முறையில் காஸ் நிரப்பப்பட்டு, "சீல்' வைக்கப்படுவதால், எடை குறைய வாய்ப்பில்லை. சிலிண்டரை டெலிவரி செய்வோர், எடை போட்டு காட்ட மறுத்தால், 044 - 2498 5153 என்ற எண்ணில், புகார் தெரிவிக்கலாம்; உரிய நடவடிக்கை எடுக்கப்படும்,'' என்றார்.