கிரிக்கெட்டை கைகழுவ முடிவு: அரசியலில் குதிக்கிறார் லாலு மகன்

பாட்னா: கிரிக்கெட் போட்டிகளில் விளையாட வேண்டும் என்ற தன் ஆசை நிறைவேறி விட்டதால், அடுத்து அரசியலில் குதிக்க ஆயத்தமாகி வருகிறார் லாலு பிரசாத் யாதவின் இளையமகன் தேஜஸ்வி,23.
பீகார் மாநில முன்னாள் முதல்வர் மற்றும் ராஷ்டிரிய ஜனதா தளம் கட்சியின் தலைவர் லாலு பிரசாத் யாதவ். இவருக்கு ஏழு மகள்கள், இரண்டு மகன்கள் என, மொத்தம் ஒன்பது பிள்ளைகள். லாலுவின் இளைய மகனான தேஜஸ்வி, கிரிக்கெட் போட்டிகளில் விளையாடி சாதிக்க வேண்டும்; புகழ் பெற வேண்டும் என, ஆசைப்பட்டார். அவரின் ஆசை நிறைவேறி விட்டது. ஐ.பி.எல்., கிரிக்கெட் போட்டிகளில், டில்லி டேர்டெவில் அணியில் இடம் பெற்று விளையாடினார். இருந்தாலும், அவரின் முக்கியமான ஆசை, தந்தையைப் போல, அரசியலில் சேர்ந்து சாதிக்க வேண்டும் என்பதே. உ.பி.,யில் சமாஜ்வாதி கட்சித் தலைவர் முலாயம்சிங் யாதவின் மகன் அகிலேஷ் யாதவ் முதல்வராகியுள்ளதும், தேஜஸ்வியின் ஆசையை மேலும் தூண்டியுள்ளது.

இளைஞர் அணி: தேஜஸ்வி அரசியலில் குதிக்கவுள்ளது குறித்து, ராஷ்டிரிய ஜனதா தளம் கட்சியின் மூத்த தலைவர்கள் யாரும் வாய் திறக்கவில்லை என்றாலும், கட்சியில் கீழ் மட்டத்தில் உள்ளவர், அவர் அரசியலுக்கு வருவது நிச்சயம். ஜூன் 11ம் தேதி, ராஷ்டிரிய ஜனதா தளம் கட்சியின் இளைஞர் அணி தலைவர் தேர்தல் நடைபெற உள்ளது. அதில், தேஜஸ்வி தலைவராவார் என்றும் கூறுகின்றனர். லாலு - ரப்ரி தம்பதியர், தற்போது தங்கள் மகள் அனுஷ்காவின் திருமணம் (ஏப்ரல் 24) தொடர்பான வேலைகளில் தீவிரமாக ஈடுபட்டுள்ளதால், திருமணம் முடிந்த பின், தங்கள் மகனின் அரசியல் பிரவேசம் தொடர்பான, முறையான அறிவிப்பை வெளியிடுவர் என, எதிர்பார்க்கப்படுகிறது.

தினமலர்