சனாதி அப்பண்ணா!

1977ல் "சனாதி அப்பண்ணா' என்ற கன்னட படம் வந்தது. மறைந்த பிரபல கன்னட நடிகர் ராஜ்குமார் அதில் ஒரு ஷெனாய் வித்வானாக நடித்தார். பின்னணியில் ஷெனாய் இசைப்பதற்காக காலம் சென்ற பிரபல ஷெனாய் மேதை பிஸ்மில்லாகானை வேண்டினார்கள். புரொடக்ஷன் மேனேஜர் ஸ்ரீனிவாஸ் அதற்காக காசியில் இருந்த பிஸ்மில்லாகான் வீட்டுக்குப் போனார். ஆனால் கான் லேசில் சம்மதிக்கவில்லை. ஒரு ஹிந்தி படத்தில் அவருக்கு கிடைத்த கசப்பான அனுபவம்தான் அதற்குக் காரணம். (அந்தப் படத்தில் வன்முறையும் செக்ஸþம் மிக அதிகமாக இருந்ததாம்). ஸ்ரீனிவாஸ், பிஸ்மில்லாகானிடம் ""நீங்கள் சம்மதிக்கவில்லை என்றால் நான் இங்கேயே உண்ணாவிரதம் இருந்து சாவேன். என் சாவுக்கு நீங்கள்தான் பொறுப்பாவீர்கள்'' என்று சொன்னார்.

பிறகு கான் ""முதலில் அந்தப் படத்தின் கதையை சொல்லுங்கள். எனக்கு பிடித்திருந்தால்தான் நான் சம்மதிப்பேன்'' என்றார். கதையை எழுதிய எழுத்தாளர் உதயசங்கரும், நடிகர் ராஜ்குமாரும் அவரிடம் கதையைச் சொன்னார்கள்.

கானுக்கு கதை ரொம்பப் பிடித்துவிட்டது. அவர் "சனாதி அப்பண்ணா' படத்துக்கு ஷெனாய் இசைக்க சம்மதித்தார்.

முதலில் ""ஐந்து நாட்களுக்கு மட்டுமே இந்தப் படத்துக்கு ஒதுக்குவேன்'' என்று சொன்ன அவர் பிறகு இருபது நாட்கள் படக்குழுவினருடன் இருந்து முழு ஒத்துழைப்பையும் தந்தார். அந்த இருபது நாட்களும் நடிகர் ராஜ்குமார், பிஸ்மில்லாகான் ஷெனாய் வாசிப்பதை உற்று கவனித்து அதை அப்படியே தன் நடிப்பில் கொண்டு வந்தார்.

படம் சூப்பர் ஹிட். படத்தைப் பார்த்த பிஸ்மில்லாகான், ராஜ்குமாரிடம் சொன்னார்.

""நான் என் ஆயுளில் பெற்ற வெற்றியை நீங்கள் மூன்று மணி நேரத்தில் பெற்று விட்டீர்கள்''.

"சனாதி அப்பண்ணா' படத்தில் இசையமைப்பாளர் ஜி.கே. வெங்கடேஷ். கதாநாயகி, ஜெயப்பிரதா. படத்தில் எஸ். ஜானகி பாடிய கடைசி பாட்டை பல நாட்கள் யாராலும் மறக்க முடியவில்லை.

அனிதா ராமச்சந்திரன்

தினமணி