குடும்ப விளக்கு – தமிழ் பண்பாடு அறிவோம் – தொடர் பதிவு

**சாமி** · **சாமி** Mon May 07, 2012 1:23 am

குடும்ப விளக்கு - பாவேந்தர் பாரதிதாசன் எழுதியது – முதற்பகுதி

ஒரு நாள் நிகழ்ச்சி -
அகவல் -
1 . காலை மலர்ந்தது

இளங்கதிர் கிழக்கில் இன்னும் எழவில்லை,
இரவு போர்த்த இருள் நீங்கவில்லை.
ஆயினும் கேள்வியால் அகலும் மடமைபோல்,
நள்ளிரவு மெதுவாய் நடந்துகொண் டிருந்தது.
தொட்டி நீலத்தில் சுண்ணாம்பு கலந்த
கலப்பென இருள்தன் கட்டுக் குலைந்தது.
புலர்ந்திடப் போகும் பொழுது, கட்டிலில்
மலர்ந்தன அந்த மங்கையின் விழிகள்.

விளக்கம்:
காலைக் கதிரவனின் கதிர்கள் கிழக்குத்திசையில் இன்னும் வரவில்லை.
இருள் என்ற போர்வையை போர்த்திக் கொண்டிருந்த இரவு இன்னும் விலகவில்லை.
ஆனாலும் கூட, எப்படி கேள்வி அறிவை வளர்த்துக் கொண்டவர்களிடத்தில் அதுவரையிலும் சூழ்ந்து கொண்டிருந்த அறியாமை மெதுவாக நீங்கி விடுதலைப் போன்று அந்த இரவு மெதுவாக விலகி நடந்து கொண்டிருந்தது. தொட்டியில் கரைக்கப்பட்ட சுண்ணாம்பினில் நீலத்தைக் கலந்தது போன்று வெளிர் நீல நிறத்தில் மேகங்கள் இருள் விலகி விடியல் வருவதை உணர்த்தியது. விடியப் போகிற அந்தக் காலைப்பொழுதில் அங்குக் கட்டிலில் உறங்கிக் கொண்டிருந்த அந்தப்பெண் தன் மலர் போன்ற கண்கள் விரியும்படியாக விழித்தாள்

(விளக்கு தொடர்ந்து எரியும்)

சதாசிவம் · சதாசிவம் Mon May 07, 2012 10:28 am

தொடருங்கள் சாமி,
பாரதிதாசனின் படைப்புகளில் குடும்ப விளக்கு முத்தானது.

ஆரூரன் · ஆரூரன் Mon May 07, 2012 2:42 pm

பாரதிதாசன் கவிதைகள் புரியும்படியாகவே உள்ளது.
ஆனாலும் உங்கள் முயற்சி நன்று .

பத்மநாபன் · பத்மநாபன் Tue May 08, 2012 10:57 am

சாமி wrote: விடியப் போகிற அந்தக் காலைப்பொழுதில் அங்குக் கட்டிலில் உறங்கிக் கொண்டிருந்த அந்தப்பெண் தன் மலர் போன்ற கண்கள் விரியும்படியாக விழித்தாள்

அதாவது ஆறு மணிக்கு முன்னாலேயே எழுந்திருக்க சொல்றிங்க!!! அதிர்ச்சி

**சாமி** · **சாமி** Tue May 08, 2012 9:56 pm

2 . அவள் எழுந்தாள்

தூக்கத் தோடு தூங்கி யிருந்த
ஊக்கமும் சுறுசுறுப் புள்ளமும், மங்கை
எழுந்ததும் எழுந்தன இருகை வீசி;
தெளிவிலாக் கருக்கலில் ஒளிபடும் அவள்விழி
குளத்து நீரில் குதிக்கும் கெண்டைமீன்!

விளக்கம்:
மங்கை மட்டும் தூங்கவில்லை; சுறுசுறுப்பான உள்ளமும் ஆர்வமும் அவளுடன் தூங்கியிருந்தன. இப்போது அவள் எழுந்ததினால் அவை இரண்டும், இரண்டு கைகளையும் வீசியபடி எழுந்தன. விடிந்தும் விடியாத அந்தக் காலை வேளையில் ஒளிவீசிய அவளுடைய விழிகள், காண்பதற்கு குளத்தில் உள்ள நீரில் குதித்துக் கொண்டிருக்கும் கெண்டை மீன்களைப் போன்று இருந்தது

(விளக்கு தொடர்ந்து எரியும்)

குடும்ப விளக்கு – தமிழ் பண்பாடு அறிவோம் – தொடர் பதிவு

குடும்ப விளக்கு – தமிழ் பண்பாடு அறிவோம் – தொடர் பதிவு

Re: குடும்ப விளக்கு – தமிழ் பண்பாடு அறிவோம் – தொடர் பதிவு

Re: குடும்ப விளக்கு – தமிழ் பண்பாடு அறிவோம் – தொடர் பதிவு

Re: குடும்ப விளக்கு – தமிழ் பண்பாடு அறிவோம் – தொடர் பதிவு

Re: குடும்ப விளக்கு – தமிழ் பண்பாடு அறிவோம் – தொடர் பதிவு

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக