விநாயகர் சதுர்த்தி பூஜைக்காக 400 கிலோ பேரிச்சம்பழத்தில் விநாயகர் சிலை வடிவமைப்பு

விநாயகர் சதுர்த்தியை முன்னிட்டு சென்னை தியாகராய நகரில் 400 கிலோ பேரிச்சம்பழத்தால் விநாயகர் வடிவமைக்கப்பட்டு பூஜை செய்யப்பட உள்ளது.

பேரிச்சம்பழம் விநாயகர்

இந்து முன்னணியினர் சென்னை தியாகராய நகர், வெங்கட்நாராயணா சாலையில் பேரிச்சம்பழம் மற்றும் உலர்ந்த பழங்களால் விநாயகர் சிலை செய்து வருகின்றனர்.

இதுகுறித்து விநாயகர் சதுர்த்தி விழாக்குழு பொதுச்செயலாளர் குட்டிகணேசன் கூறியதாவது:-

சுற்றுப்புற சூழல் மாசு ஏற்படாத வகையில் கடந்த காலங்களில் ஒவ்வொரு ஆண்டும் கொழுக்கட்டை, வெல்லம், காய்கறி, தேங்காய், அருகம்புல், மூலிகைகள், பழங்கள், நவதானியங்களால் விநாயகர் சிலைகள் வடிவமைக்கப்பட்டு பூஜிக்கப்பட்டது.

தற்போது சற்று வித்தியாசமாக பேரிச்சம்பழம் மற்றும் உலர்ந்த பழங்களால் இயற்கை விநாயகர் சிலை செய்ய முடிவு செய்யப்பட்டது. அதன்படி 400 கிலோ பேரிச்சம் பழம், முந்திரி, ஏலக்காய், அத்திப்பழம் ஆகிய உலர்ந்த பழங்கள் 50 கிலோ உட்பட 450 கிலோ பழங்கள் பயன்படுத்தப்பட்டுள்ளது.

கடல் வாழ் ஜீவராசிகளுக்கு உணவு

நாளை (19-ந் தேதி) காலை 4.30 மணிக்கு கணபதி ஹோமத்துடன் பூஜைகள் தொடங்குகின்றன. 21-ந்தேதி பகல் 12 மணிக்கு சமபந்தி விருந்து நடத்தப்படுகிறது. 23-ந்தேதி பட்டினப்பாக்கத்தில் கரைக்கப்படுகிறது.

இதன் மூலம் கடல் வாழ் ஜீவராசிகளுக்கு உணவு அளித்த புண்ணியமும் கிடைக்கிறது. உலர்ந்த பழங்களால் தயாரிக்கப்பட்ட விநாயகரை வழிபடுவதன் மூலம் நோய் நொடி இல்லாத வாழ்வை பெறுவதுடன், உலகில் இயற்கை சீற்றம் ஏற்படாமலும் தடுக்கவும் முடியும். விநாயகர் சிலை செய்பவர்களும் வரும் காலங்களில் இதுபோன்று வித்தியாச சிலைகள் செய்து பூஜை செய்யலாம்.

இவ்வாறு அவர் கூறினார்.

மாசு ஏற்பட வாய்ப்பு இல்லை

பேரிச்சம்பழம் வடிவமைக்கும் ஸ்தபதி செல்வம் கூறும்போது, திரைப்படங்களுக்கு ஆர்ட் டைரக்டராகவும், டெல்லியில் நடக்கும் குடியரசு தின விழா மற்றும் மைசூர் தசரா விழாக்களில் பல்வேறு கலைபொருட்களை உருவாக்கி வருகிறோம். தற்போது பேரிச்சம் பழத்தால் விநாயகர் உருவாக்கப்பட்டு வருகிறது. எந்தவித வேதி பொருட்களும் பயன்படுத்தாமல் உலர்ந்த பழங்களும், ஒட்டுவதற்கு மைதாமாவு கரைசலும் பயன்படுத்தப்படுகிறது. இதனால் சுற்றுப்புற சூழல் மாசு ஏற்பட வாய்ப்பு இல்லை என்றார்.

தினத்தந்தி

இதுவல்லவோ இறைதொண்டு.. இதுபோல் வாயில்லா ஜீவராசிகளும் பயன்பெறும் வகையில் இதை உருவாக்கியவர்களுக்கு எனது மனமார்ந்த நன்றிகள்.

உண்மையில் மிக அருமையான சிந்தனை.... இதன்மூலம் விநாயகசதுர்த்தியின் நோக்கம் முழுமை அடையும்.

விழாகுழுவினருக்கும் சிலை வடிவமைப்பாளர்களுக்கும் வாழ்த்துக்கள்

வடிவமைத்தவர்களுக்கு வாழ்த்துக்கள் .. மாறுபட்ட சிந்தனை

நல்லா இருக்கே இந்த விநாயகர் சூப்பர்