இந்தியா திணறல் வெற்றி! * கோஹ்லி, யுவராஜ் அபாரம் * ஆப்கன் போராட்டம் வீண்

கொழும்பு: "டுவென்டி-20' உலக கோப்பை தொடரை இந்திய அணி வெற்றிகரமாக துவக்கியது. நேற்றைய தனது முதல் லீக் போட்டியில் ஆப்கானிஸ்தானை 23 ரன்கள் வித்தியாசத்தில் வீழ்த்தியது. விராத் கோஹ்லி அரைசதம், யுவராஜின் "ஆல்-ரவுண்டர்' ஆட்டம் வெற்றிக்கு கைகொடுத்தது. ஆப்கானிஸ்தான் போராட்டம் வீணானது.

இலங்கையில் நான்காவது "டுவென்டி-20' உலக கோப்பை தொடர் நடக்கிறது. நேற்று நடந்த "ஏ' பிரிவு லீக் போட்டியில் இந்தியா, ஆப்கானிஸ்தான் அணிகள் மோதின. "டாஸ்' வென்ற ஆப்கன் கேப்டன் நவ்ரோஸ் மங்கள், "பவுலிங்' தேர்வு செய்தார்.

சேவக் ஏமாற்றம்:

இந்திய அணியின் துவக்கம் மோசமாக இருந்தது. சரியான "புட்வொர்க்' இல்லாமல் திணறிய காம்பிர்(10), ஷாபூர் ஜத்ரன் "வேகத்தில்' போல்டானார். தொடர்ந்து மிரட்டிய ஷாபூர் பந்தில் சேவக்கும்(8) அவுட்டாக, 4.1 ஓவரில் 2 விக்கெட்டுக்கு 22 ரன்கள் எடுத்து திணறியது.

பின் விராத் கோஹ்லி, யுவராஜ் இணைந்து அணியை மீட்டனர். ஷாபூர் பந்தில் ஒரு இமாலய சிக்சர் விளாசினார் யுவராஜ். மறுபக்கம் குல்போதின் பந்தில் கோஹ்லி ஒரு சிக்சர் அடிக்க, ஸ்கோர் விரைவாக உயர்ந்தது. யுவராஜ் 18 ரன்களுக்கு வெளியேறினார். அபாரமாக ஆடிய கோஹ்லி, ஷாபூர் ஓவரில் வரிசையாக 2 பவுண்டரி அடித்தார். அரைசதம் எட்டிய இவர், 50 ரன்களுக்கு(39 பந்து, 4 பவுண்டரி, 2 சிக்சர்) அவுட்டானார்.

தோனி அதிரடி:

முகமது நபி வீசிய கடைசி ஓவரின் முதல் பந்தில் பவுண்டரி அடித்த ரெய்னா, அடுத்த பந்தில் 38 ரன்களுக்கு போல்டானார். கடைசி இரு பந்துகளில் தோனி ஒரு பவுண்டரி, சிக்சர் அடித்து, கச்சிதமாக முடித்தார். இந்திய அணி 20 ஓவரில் 5 விக்கெட்டுக்கு 159 ரன்கள் எடுத்தது. தோனி(18), ரோகித் சர்மா(1) அவுட்டாகாகமல் இருந்தனர்.

நல்ல துவக்கம்:

சவாலான இலக்கை விரட்டிய ஆப்கானிஸ்தான் அணிக்கு ஷாஜத், நவ்ரோஸ் நல்ல துவக்கம் கொடுத்தனர். பாலாஜி வேகத்தில் ஷாஜத்(18) வெளியேறினார். பின் பாலாஜி பந்தில் நவ்ரோஸ் ஒரு சிக்சர் அடித்தார்.

யுவராஜ் திருப்புமுனை:

இந்த நேரத்தில் யுவராஜ் "சுழலில்' நவ்ரோஸ்(22) சிக்க, நிம்மதி பிறந்தது. போட்டியின் 12வது ஓவரை வீசிய யுவராஜ் இம்முறை கரிம்(26), அஸ்கரை(6) வரிசையாக அவுட்டாக்கி திருப்புமுனை ஏற்படுத்தினார். அடுத்த பந்தை ஷென்வாரி தடுத்து ஆட, "ஹாட்ரிக்' வாய்ப்பு நழுவியது. அஷ்வின் வலையில் ஷென்வாரி(1) வீழ்ந்தார். யுவராஜ் வீசிய 14வது ஓவரில் முகமது நபி, ஷபிக்குல்லா தலா ஒரு சிக்சர் அடிக்க, "டென்ஷன்' ஏற்பட்டது. இர்பான் பந்தில் ஷபிக்குல்லா(8) அவுட்டானார்.

ஜாகிர் சொதப்பல்:

தொடர்ந்து அசத்திய நபி, ஜாகிர் வீசிய போட்டியின் 16வது ஓவரில் ஒரு சிக்சர், பவுண்டரி அடிக்க, மொத்தம் 16 ரன்கள் எடுக்கப்பட்டன. இதனால் ஆட்டத்தில் சூடு பிடித்தது. மீண்டும் பந்துவீச வந்த அஷ்வின் "சுழலில்' முகமது நபி(31) வெளியேற, ஆபத்து நீங்கியது.

கடைசி ஓவரில் வெற்றிக்கு 24 ரன்கள் தேவைப்பட்டன. அருமையாக பந்துவீசிய பாலாஜி எஞ்சிய இரு வீரர்களான குல்போதின்(5), தவ்லத்தை(8) வெளியேற்றி அசத்தினார். ஆப்கானிஸ்தான் அணி 19.3 ஓவரில் 136 ரன்களுக்கு ஆல் அவுட்டாகி தோல்வி அடைந்தது. தொடரில் முதல் வெற்றியை பதிவு செய்த இந்திய அணி 2 புள்ளிகளை முழுமையாக பெற்றது.

இந்தியா சார்பில் பாலாஜி 3, யுவராஜ் 3, அஷ்வின் 2 விக்கெட் வீழ்த்தினர்.

ஆட்ட நாயகன் விருதை விராத் கோஹ்லி தட்டிச் சென்றார்.

நழுவிய கைகள்

ஆப்கன் வீரர்களின் "பீல்டிங்' மோசமாக இருந்தது. யுவராஜ் 17 ரன்னில் இருந்து போது, கொடுத்த "கேட்ச்சை' முகமது நபி நழுவவிட்டார். பின் 12வது ஓவரில் தனது பந்தில் ரெய்னா கொடுத்த "கேட்ச்சை' பிடித்து மீண்டும் தவறவிட்டார் முகமது. அப்போது ரெய்னா 2 ரன் தான் எடுத்திருந்தார். அடுத்த ஓவரில் கோஹ்லி 33 ரன்கள் எடுத்த நிலையில், அடித்த பந்தை எல்லைக்கோட்டு அருகே சமி தவறவிட, அது சிக்சராக மாறியது.

* ஆப்கன் பவுலர்கள் 16 உதிரிகளை விட்டுக் கொடுத்து ஏமாற்றினர்.


சாதனைகள் எங்கே

கத்துக்குட்டியான ஆப்கன் பந்துவீச்சை அடித்து நொறுக்கி இந்திய பேட்ஸ்மேன்கள் சாதனைகள் படைப்பார்கள் என எதிர்பார்க்கப்பட்டது. ஆனால், நம்மவர்கள் பல ஓவர்களில் ரன் எடுக்கவே திணறினர். சேவக், காம்பிர் உள்ளிட்ட டாப்-ஆர்டர் விரைவாக சரிந்தது.

இதே போல ஆப்கன் அணியை நமது அனுபவ பவுலர்கள் விரைவாக சுருட்டி விடுவர் என கருதப்பட்டது. இதற்கு நேர்மாறாக ஜாகிர் கான் ஓவரில் சிக்சர்கள் பறந்தன. கடைசி ஓவர் வரை தாக்குப்பிடித்த ஆப்கன் அணியினர் நமது பலவீனங்களை சுட்டிக்காட்டினர். இதிலிருந்து பாடம் கற்றுக் கொள்ளாவிட்டால், இந்திய அணிக்கு வரும் போட்டிகளில் சிக்கல் அதிகரிக்கும்.


"ஹாட்ரிக்' அரைசதம்

நேற்று "டுவென்டி-20' போட்டிகளில் தொடர்ந்து மூன்றாவது அரைசதம் அடித்தார் இந்தியாவின் விராத் கோஹ்லி. இதற்கு முன் இவர் சமீபத்திய இலங்கை, நியூசிலாந்துக்கு எதிரான போட்டிகளில் அரைசதம் அடித்திருந்தார்.

தினமலர்

நான் இந்தக் கொடுமையைப் பார்த்தேன் - ஒரு சமயம் தோன்றியது ஆப்கானிஸ்தான் ஜெயித்திருக்கலாம் என்று. மூன்று காட்சுகளை அவர்கள் பிடித்திருந்தால் நிச்சயம் அவர்கள் ஜெயித்திருப்பார்கள்.

இந்திய தோல்வியடைந்திருக்க வேண்டும்...அப்போதுதான் இவர்களின் கொழுப்பு கொஞ்சம் அடங்கும்.

இதுவும் ஒருவிதத்தில் தோல்விதான் ஐயா. எளிய வெற்றியை இப்படி சிரமமாக்கியதற்கு