ஆதார் அட்டை விவரங்களை உறுதிப்படுத்த ஆன்-லைன் முறையில் வசதி

**சிவா** · **சிவா** Sat May 25, 2013 11:06 am

தில்லியில் நடைபெற்ற ஆதார் அட்டை தொடர்பான ஆன்-லைன் சேவை அறிமுக நிகழ்ச்சியில் மத்திய திட்டக்குழுத் துணைத் தலைவர் மான்டேக் சிங் அலுவாலியா (இடது), ஆதார் அட்டை வழங்கும் அமைப்பின் தலைவர் நந்தன் நிலகேணி.
தில்லியில் நடைபெற்ற ஆதார் அட்டை தொடர்பான ஆன்-லைன் சேவை அறிமுக நிகழ்ச்சியில் மத்திய திட்டக்குழுத் துணைத் தலைவர் மான்டேக் சிங் அலுவாலியா (இடது), ஆதார் அட்டை வழங்கும் அமைப்பின் தலைவர் நந்தன் நிலகேணி.

ஆதார் அட்டைகளை வைத்திருப்போர் குறித்த விவரங்களை ஆன்-லைனில் தெரிந்துகொள்ளும் வகையில் புதிய வசதி ஏற்படுத்தித் தரப்பட்டுள்ளது.

நல உதவிகள் உள்ளிட்ட பல்வேறு திட்டங்கள் தொடர்பாக மனு செய்யும்போது, பயனாளி ஆதார் அட்டையை தனக்கான அடையாளச் சான்றிதழாகக் காட்டியிருந்தால், அதில் உள்ள விவரங்களை உறுதிப்படுத்திக் கொள்ள வசதியாக ஆன்-லைன் சேவை தொடங்கப்பட்டுள்ளது.

இது குறித்து மத்திய திட்டக்குழு துணைத் தலைவர் மான்டேக் சிங் அலுவாலியா கூறியதாவது:

நலத்திட்ட உதவிகளை பயனாளிகளுக்கு அளிக்கும்போது 20 முதல் 40 சதவீதம் சரியான நபர்களுக்குப் போய்ச்சேருவதில்லை. இதைத் தடுக்க இந்த ஆன்-லைன் சேவைகள் உதவும்'' என்றார்.

இது தொடர்பாக ஆதார் அடையாள அட்டை வழங்கும் அமைப்பின் தலைவர் நந்தன் நிலகேணி கூறியதாவது: இ-கேஒய்சி (வாடிக்கையாளரை தெரிந்துகொள்ளுங்கள்), ஓடிபி (ஒருமுறை குறியீட்டு எண் அத்தாட்சி முறை), கருவிழி அத்தாட்சி முறை ஆகிய ஆன்-லைன் (கணினி மூலம்) சேவைகளை தொடங்கவுள்ளோம். பயனாளிகள் குறித்த விவரங்களை சரிபார்க்க விரும்பும் அரசு அலுவலகங்கள், இந்த ஆன்-லைன் வசதியை பயன்படுத்திக்கொள்ளலாம். பயனாளியின் பெயர், முகவரி, பிறந்த தேதி, பாலினம், புகைப்படம், செல்போன் எண் உள்ளிட்ட விவரங்களை தெரிந்துகொண்டு அவர் பற்றிய தகவல்களை உறுதிப்படுத்திக்கொள்ள முடியும். அதே சமயம், இந்த விவரங்களைப் பெற்று தவறாகப் பயன்படுத்த இயலாத வகையிலான பாதுகாப்பு ஏற்பாடுகளும் செய்யப்பட்டுள்ளன.

இ-கேஒய்சி முறையில் ஆன்-லைன் மூலம் சம்பந்தப்பட்டவரின் ஒப்புதலுடன் அவர் குறித்த விவரங்களை தெரிந்துகொள்ளலாம். ஓடிபி முறையில், ஆதார் அட்டை பெற்றுள்ளவர் குறித்த விவரங்களை எப்போது வேண்டுமானாலும் செல்போன் சேவை மூலம் பெற முடியும். கருவிழி அத்தாட்சி முறையில் சம்பந்தப்பட்டவரின் ஆதார் எண்ணை கணினியில் உள்ளீடு செய்து, அவரின் கருவிழியை ஏற்கெனவே அட்டை பெறும்போது பதிவு செய்யப்பட்டுள்ள கருவிழி புகைப்படத்துடன் சரிபார்த்த பின்பே விவரங்களைப் பெற முடியும்.

1000 மையங்கள்: ஆதார் அட்டையை பொதுமக்களுக்கு வழங்குவதற்காக நாடு முழுவதும் 300 நிரந்தர மையங்களை அமைக்க நடவடிக்கை எடுத்து வருகிறோம். இந்த மையங்களின் எண்ணிக்கை வரும் செப்டம்பர் மாதத்துக்குள் 1000-ஆக அதிகரிக்கப்படும்'' என்றார்.

தினமணி