ஓர் இந்தியரின் ஆங்கில நாவல்!

**Muthumohamed** · **Muthumohamed** Sat Jun 15, 2013 9:10 pm

இங்கிலாந்தில் வாழ்ந்துவந்த கிரஹாம் க்ரீன் என்பவர் பிரபல ஆங்கில எழுத்தாளர். பூர்ணா என்ற இந்தியர் இவருக்கு நெருங்கிய நண்பர்.

ஒருநாள் டைப் செய்யப்பட்ட ஒரு பெரிய காகிதக் கட்டுடன் கிரஹாம் வீட்டிற்கு வந்த பூர்ணா, அந்த காகிதக் கட்டை அவரிடம் தந்து, ""மிஸ்டர் கிரஹாம், என் நண்பர் ஒருவர் எழுதிய நாவல் இது. படித்துப் பாருங்கள். நன்றாயில்லையென்றால், ஒரு கல்லைக் கட்டித் தேம்ஸ் நதியில் எறிந்துவிடுங்கள்..'' என்று கூறிவிட்டுச் சென்றார்.

கிரஹாம் க்ரீனின் மேஜை மேல் பல நாள்கள் தூசு படிந்து கிடந்தது அந்த காகிதக் கட்டு. ஒருநாள் இரவு பலத்த மழை பெய்ததால், கிரஹாம் வெளியே எங்கும் போகமுடியாத சூழ்நிலை. தற்செயலாக அவரின் கவனம் மேஜையின் மேல் இருந்த காகிதக் கட்டின் மேல் சென்றது. கட்டைப் பிரித்துப் படிக்க ஆரம்பித்தார். நாவலின் சுவை படிப்படியாக அதிகரிக்க முழுவதையும் படித்து முடித்தார்.
மறுநாளே லண்டனில் உள்ள ஒரு பிரபல பதிப்பகத்திற்கு அதைக் கொண்டு சென்று அதை வெளியிட ஏற்பாடும் செய்தார். புத்தகம் வெளிவந்தது. இந்தியாவில் நான்கு பதிப்பகங்களால் நிராகரிக்கப்பட்ட அந்த நாவலை எழுதியவர் ஆர்.கே.நாராயண். அவர் எழுதிய நாவலின் தலைப்பு: சுவாமியும் சிநேகிதர்களும் (Swami and friends).

("அம்பலவாணனின் பல்சுவை விருந்து' புத்தகத்திலிருந்து)
- மா. சந்திரசேகர், மேட்டுமகாதானபுரம்.
தினமணி