இந்திய ராணுவ வீரர் விரைவில் விடுவிக்கப்படுவார் - பாகிஸ்தான்

இந்திய ராணுவ வீரர் விரைவில் விடுவிக்கப்படுவார் என்று பாகிஸ்தான் அதிகாரி தெரிவித்துள்ளார்.

காஷ்மீரில் இந்தியா–பாகிஸ்தான் எல்லைப்பகுதியில் உள்ள செனாப் ஆற்றில், நேற்று காலையில் 4 எல்லை பாதுகாப்பு வீரர்கள் படகின் மூலம் ரோந்து பணியில் ஈடுபட்டிருந்தனர். அக்னூர் அருகே ஒரு குறுகலான வளைவு பகுதியில் சென்ற போது, படகின் என்ஜின் பழுதடைந்தது. இதைத்தொடர்ந்து அவர்களை மீட்க மற்றொரு படகில் மீட்புக்குழுவினர் சம்பவ இடத்துக்கு விரைந்தனர். அதற்குள் சத்யஷீல் யாதவ் என்ற வீரர் ஆற்றில் அடித்து செல்லப்பட்டார். மற்ற 3 பேரையும் மீட்புக்குழுவினர் மீட்டனர்.

ஆற்றில் சுமார் 400 மீட்டருக்கு அப்பால் அடித்துச்செல்லப்பட்ட சத்யஷீல் யாதவை, பாகிஸ்தானின் சியால்கோட் பகுதியில் ரோந்து பணியில் ஈடுபட்டிருந்த பாகிஸ்தான் ராணுவத்தினர் பிடித்து சென்றனர். இது குறித்து தகவல் அறிந்ததும் இந்திய வீரரை மீட்பதற்கான நடவடிக்கைகளை இந்தியா மேற்கொண்டது. இந்நிலையில் இந்திய ராணுவ வீரர் விரைவில் விடுவிக்கப்படுவார். சோதனை பணிகள் தொடர்ந்து நடைபெற்று வருகிறது. உள்துறை, ஐ.எஸ்.ஐ. மற்றும் ராணுவ உளவு அமைப்புகள் பரிசோதித்து வருகின்றது. அனைத்தும் சரியாக இருந்தால் ராணுவ வீரர் விரைவில் திருப்பி அனுப்பபடுவார் என்று பாகிஸ்தான் ராணுவ ஜெனரல் தெரிவித்துள்ளார். இதற்கிடையே இந்திய எல்லைப் பாதுகாப்பு படையின் டி.ஜி. டி.கே.பாதக் "நடைமுறை பணிகள் அனைத்தும் முடிந்துவிட்டன. இந்திய ராணுவ வீரரை பாகிஸ்தான் ராணுவத்தினர் இரண்டு மணி நேரத்தில் விட்டுவிடுவார்கள்” என்று நம்பிக்கை தெரிவித்துள்ளார். இந்திய வீரரை மீட்பதற்காக இரு நாட்டு அதிகாரிகளுக்கு இடையேயான கொடி கூட்டம் நடத்தது. அப்போது பாகிஸ்தான் தரப்பில் எந்த பதிலும் தரப்படவில்லை என்று தகவல்கள் தெரிவித்துள்ளன.

இந்திய ராணுவ வீரர் ஒப்படைப்பு

ஸ்ரீநகர்: ஆற்றில் அடித்துச் சென்றதால் பாக்., ராணுவத்திடம் சிக்கிய இந்திய ராணுவ வீரரை பாக்., ராணுவம் இன்று ஒப்படைத்தது. கடந்த 48 மணி நேரமாக பாக். ராணுவ முகாமில் அடைத்து வைக்கப்பட்டிருந்த இந்திய எல்லை பாதுகாப்பு படை வீரர் சத்யஷீல் யாதவை பாக்., ராணுவ அதிகாரிகள் முறைப்படி இந்திய அதிகாரிகளிடம் ஒப்படைத்தனர். இதையடுத்து கடந்த இரண்டு நாட்களாக நிலவி வந்த பதற்றம் நீங்கியது.