தானாக ஓடிப்போகும் காங்., கவர்னர்கள்

புதுடில்லி: மத்தியில் புதிய ஆட்சி அமைந்த பின்னர் கவர்னர்களை மாற்றுவது, குற்றச்சாட்டுக்கள் இருந்தால் கவர்னர்களை பதவியில் இருந்து நீக்குவது என்பது ஆட்சிகள் மாறும் போது நடக்கத்தான் செய்யும். சுப்ரீம் கோர்ட் அறிவுரையின்படி கவர்னர்கள் மாற்றத்தில் அரசு தானாக எந்தவொரு முடிவும் எடுக்க முடியாது என்றாலும் மாற்றம் செய்ய முடியும். ஆனால் மோடி அரசின் முடிவை கண்டு மாற்றத்தை ஏற்று கொள்ளாமல், மேலும் மோடி அரசின் கீழ் பணியாற்ற விரும்பாமல் தங்களுக்கு பதவியே வேண்டாம் என துறந்து கவர்னர்கள் தாங்களாகவே ஓடி செல்லும் நிலை உருவாகியுள்ளது.

மோடி புதிய பிரதமராக பொறுப்பேற்ற பின்னர் உ.பி., ராஜஸ்தான், சட்டீஸ்கர், ஜார்கண்ட், கர்நாடகா, ஆந்திரா, கவர்னர்களை மாற்ற நினைத்தது. ஆனால் சில கவர்னர்கள் இடம் மாற மாட்டோம் என்று அடம் பிடித்தனர். இதனால் மகாராஷ்ட்டிர மாநில கவர்னராக இருந்த சங்கரநாராயணன், மிசோரமுக்கு செல்லாமல் பதவியை ராஜினாமா செய்தார். குற்றச்சாட்டு அடிப்படையில் புதுச்சேரி கவர்னர் கட்டாரியா, மிசோரம் கவர்னர் பெனிவால் (குஜராத்தில் கவர்னராக இருந்தவர்) பதவி நீக்கம் செய்யப்பட்டனர்.

இவர் நிருபர்களிடம் பேசுகையில் , நான் மாற்றத்திற்கு விரும்பவில்லை எனவே பதவியை ராஜினாமா செய்கிறேன். இதில் அரசியல் இருக்கிறது என்றார். இந்நிலையில் சோனியாவில் நம்பிக்கை நட்சத்திரமான, ஷீலா தீட்ஷித் (டில்லி முதல்வராக இருந்தவர்) . காங்., ஆட்சி இழந்ததும் அவருக்கு கேரள கவர்னராக நியமனம் செய்து அழகு பார்த்தார் சோனியா.

அரசியலே தொழிலாக கொண்ட தீட்ஷித், இன்று டில்லியில் முகாமிட்டுள்ளார். மதியம் உள்துறை அமைச்சரை சந்தித்து பேசினார். இன்று இரவு 7 மணியளவில் ஜனாதிபதியை சந்திக்கவுள்ளார். இவர் தனது ராஜினாமா கடிததத்தை கொடுப்பார் என்று எதிர்பார்க்கப்படுகிறது.

புதிய கவர்னர்கள் நியமனம்: இதற்கிடையில் புதிய கவர்னர்கள் பட்டியல் இன்று மாலையில் வெளியாகலாம் என்றும் ஜனாதிபதி அலுவலக வட்டாரம் தெரிவிக்கிறது.